NGUÁTA mba̱yu̱u̱ʼ nda̱wa̱á dí Salomón niniñuʼ Jeobá, xa̱bu̱ Israel niwiʼthíi̱n nini̱ndxu̱u̱n a̱jma̱ reino, xó má Jeobá niʼthí. Rehoboam, bi̱ ndiyá corona, ra̱ʼkhá tháán migujkuʼ a̱jkiu̱u̱n niʼni gajmíi̱n mbá gu̱wa̱ʼ xuajin, dí naguanúu xígií náa norte ikhú xa̱bu̱ bi̱ kúwi̱i̱n ikhí niguanu nithí rí murawími̱jna̱. Imbíjma̱ xuajin rí niguájun jmbu náa naʼtáñajunʼ David náa Jerusalén, ikhíínʼ nigíiʼ mutañajunʼ xígií náa sur ndrígóo Judá.

Numuu dí tunimbu̱ún ga̱jma̱a̱ taguaʼda fe náa Xa̱bu̱ Ñajunʼ ndrígu̱ún nimbáa dí nájmi̱i̱n reino takúwi̱i̱n mba̱yu̱u̱ʼ mbiʼi tsímáá asndu ma taguaʼda wéñu. Mú dí itháan ra̱májánʼ niʼni ikhaa má reino ndrígóo norteño náa Israel, asndu nákha ginii reyes ndrígio̱o̱ nini mamidxu̱u̱ religión dí ragajkhun. Maski ajndu Diúu̱ nikuʼmaa Elías ga̱jma̱a̱ Eliseo —rí ajndu nini magabi̱i̱n tikhun xa̱bu̱—, mu tunimbu̱ún ikhíínʼ. Nda̱wa̱á, Diúu̱ má niniñuʼ rí xa̱bu̱ Asiria muxkawíín xa̱bu̱ Israel.

Nda̱wa̱á rí ninújngoo mbá cientu tsiguʼ reino bi̱ xtáa xígií náa sur ndrígóo Judá, Diúu̱ má niʼnigíniin numuu dí raʼkhí dí nini. Xa̱bu̱ gaʼyee ndrígio̱o̱ Diúu̱ nithúún reyes dí ma̱ri̱gá, mú guájmi̱i̱n bi̱ nidxawíín, nigíiʼ muni dí muxprigún xa̱bu̱ dí raʼkhí dí eni. Mbá xkrida, rí Josías nigíiʼ ma̱ʼni gámbaa ga̱jma̱a̱ dí nduyajmajkhun xándú ma̱ngaa maʼni̱i̱ lá guʼwóo Jeobá. Índo̱ nijkha̱ raguma ñajunʼ niku̱jma̱a̱ mbá i̱yi̱i̱ʼ rí nigumariyaa náa Xtángoo rí nikánaa Moisés, ikhú ra̱ʼkhá tháán nidxuu Josías rí asndu nigíminaʼ itháanʼ maʼnigámbíin ga̱jma̱a̱ xúgínʼ xándú.

Gina wéñuʼ rí bi̱ niguwaʼ kidxuuʼ Josías, nangua nini xóo niʼni ikhaa. Ikha jngó, Jeobá ma niniñuʼ rí xa̱bu̱ Babilonia muxkawíín xa̱bu̱ Judá ma̱ngaa munigámbáa Jerusalén ga̱jma̱a̱ guʼwóo ndrígóo. Bi̱ nikáwi̱i̱n nijkha̱ kiʼdiin matu̱ʼu̱u̱n náa guʼwáejua̱nʼ náa Babilonia, ma̱ngaa Diúu̱ ma niʼthí dí manújngoo ajtsú skiñuʼ gu̱wa̱ʼ tsiguʼ dí ma̱ndoo matangi̱i̱n náa ku̱ba̱ʼ ndrígu̱ún. Mú i̱ndó ikhaa ku̱ba̱ʼ gaguanúu, rí ni xakúwi̱i̱n xa̱bu̱ náa Judá.

Asndu índo̱ gáʼkha̱ Reyʼ bi̱ nijuiʼtá ma̱ʼkha̱ bi̱ ñajunʼ —Mesías—, nimbáa aʼdióo David xándoo maʼtáñajunʼ. Mbiʼin reyes bi̱ niguwaʼ nda̱wa̱á náa David nisngajma xóo nini ikhíínʼ dí xa̱bu̱ numbaaʼ nangua nigumiin mu muthañajunʼ. Gajkhun má, i̱ndó ma Mesías bi̱ ma̱ʼngo̱o̱ maʼtáñajunʼ. Ikha jngó, Jeobá niʼthúu̱n Mesías: «Ika maʼtañajunʼ mba xuguinʼ xabi Jacob asjndo jamu, jame asjndo jamu maʼtañajuinʼ» (Lucas 1:26, 33, AMM).

(Na̱ʼkha̱ náa 1 Reyes ga̱jma̱a̱ 2 Reyes, tsinaʼ mba̱ʼu̱ 10 asndu 36 ndrígóo 2 Crónicas ga̱jma̱a̱ Jeremías 25:8-11.)