NGÉDA bikiñe bi Israél ni bi Yuda bi bé ane, ntôñ bôt u tôbôtôbô u bi pam, u bé sébla le bapôdôl. Ba bééna ngandak hémle ni maként i legel mbagi Djob. Di wan le miño mi bibuk mina bapôdôl ba Djob ba bé pôdôl.

1. Tjiba i Yérusalem. Bapôdôl ba Djob, téntén Yésaya ni Yérémia ba bi bôdôl béhe le Yérusalem a ga tjiba, nkoñ wé u yégle hôlô. Ba bi legel hala ntandaa ngéda ilole mam mana ma nyon. Ba bi gwélél bibuk bi ngui, i unda inyuki hiun hi Djob hi ga kwél ngii tison. Ngadba i nyo i bôt ba Yérusalem le ba yé litén li Yéhôva i bé yanga inyule ba ba gwélél base bitembee, ba bak ki bôt ba mahindi ni ba manola.​—2 Bikiñe 21:10-15; Yésaya 3:1-8, 16-26; Yérémia 2:1–3:13.

2. Matémb ma bégés ipubi. Litén li Djob li ga kobla minkôm mi Babilôn mbus 70 ma ñwii. Li ga témb i loñ yé i Yérusalem, i tiimba oñ témpel i Yéhôva. (Yérémia 46:27; Amôs 9:13-15) Bebe ni 200 ñwii i bisu bi ngéda, Yésaya a bôg pot le kiñe yada i ga tjé Babilôn, i ga nwas ki litén li Djob le li témb li bôdôl bégés Yéhôva. Yésaya a bi sima ki jôl jé le Kirus. A tibil ki toñol lelaa Kirus a ga boñ inyu tét tison.​—Yésaya 44:24–45:3.

3. Malo ma Mésia ni mam a bé lama kôhna. Mésia a ga gwééne i tison i Bétléhém. (Mika 5:1) A ga ba mut suhul nyu, a ga jôp i Yérusalem a kéhi ngii jakas. (Sakaria 9:9) To hala kii a ga ba loñge mut, a bak ki ñwee, bôt ba ga oo nye. Ngandak ba ga tjél ki noñ nye. (Yésaya 42:1-3; 53:1, 3) A ga wo béba ­nyemb. Ndi baa hala a ga ba mamélél ma niñ i Mésia? Heni, inyule a ga ti niñ yé sesema le ngandak bôt i kôhna nwéhél i bibéba gwap. (Yésaya 53:4, 5, 9-12) Ndik bitugne gwé gwon bi nla yônôs jam lini.

4. Mésia a ane hisi. Bangitelepsép ba nla bé énél bomede ni nsañ. Kiñe Mésia nyen a’ sébla le Ñane nsañ. (Yésaya 9:6, 7; Yérémia 10:23) I si ane yé, bôt ba binam bobasôna ba ga niñ ikété nsañ i pôla yap, ba bak ki nsañ ni binuga. (Yésaya 11:3-7) Makon ma ga ba ha bé. (Yésaya 33:24) Nyemb y’a milbana i boga ni boga. (Yésaya 25:8) I si Ane Mésia, bawoga ba ga tuge i niñ hana isi.​—Daniel 12:13.

​—Biniigana bini bi nyôñna i bikaat bi Yésaya, Yérémia, Daniel, Amôs, Mika, ni Sakaria.