OSHITOPOLWA 14
Kalunga okwa li ha popi okupitila maapolofeti ye
Jehova okwa li a langeke po aapolofeti ye ku uvithe kombinga yomatumwalaka ge na ko nasha nepangulo, elongelokalunga lyashili nosho wo etegameno lyopaMesiasa
PETHIMBO lyaakwaniilwa yaIsraeli naJuda, ongundu yaalumentu yi ikalekelwa, sha hala okutya, aapolofeti, oya li yu uvitha etumwalaka lyaKalunga. Mbaka oya li aalumentu ye na eitaalo dhingi nosho wo uulaadhi wokuuvitha omageelo gaKalunga. Tala kiinima ine ya simana mbyono ya li yu uvithwa kaapolofeti yaKalunga.
1. Ehanagulo lyaJerusalem. Aapolofeti yaKalunga, Jesaja naJeremia oya li ya londodha komeho yethimbo kutya Jerusalem otashi ka hanagulwa po nokuthigwa po. Aapolofeti mbaka oya li ye shi holola momikalo dhi iwetikile kutya omolwashike Kalunga a li a geele aantu yomoshilando. Jerusalem osha li shi iti oshi lile po Jehova, ihe osha li shu udha omalongelokalunga giifundja, eyonuko nelongitho lyoonkondo.—2 Aakwaniilwa 21:10-15; Jesaja 3:1-8, 16-26; Jeremia 2:1–3:13.
2. Oshigwana shaKalunga osha tamekulula elongelokalunga lyashili. Konima yoomvula 70 muupongekwa oshigwana shaKalunga osha li tashi ka galuka okuza kuBabilonia. Osha li tashi ka shuna kevi lyasho ndyoka lya li lya thigwa po opo shi ka tungulule otempeli yaJehova muJerusalem. (Jeremia 46:27; Amos 9:13-15) Komeho yoomvula 200 lwaampoka, Jesaja okwa li a hunganeke kutya omulumentu gwedhina Kores oye ta ka sinda Babilonia nokweetha oshigwana shaKalunga shi ka tamekulule elongelokalunga lyashili. Jesaja okwa li wo a hokolola omukalo gwi ikalekelwa ngoka Kores ta ka longitha opo a kwate ko Babilonia.—Jesaja 44:24–45:3.
3. Okuya po kwaMesiasa nosho wo iiningwanima yomokukalamwenyo kwe. Mesiasa okwa li ta ka valelwa muBetlehem. (Mika 5:2) Okwa li ta ka kala i ishonopeka nokwa li te ke ya muJerusalem a londa kokasino. (Sakaria 9:9) Nonando okwa li ta ka kala e na ombili nohenda, okwa li ta ka kala inaa simana noyendji kaya li taye ke mu taamba ko. (Jesaja 42:1-3; 53:1, 3) Okwa li ta ka sa eso edhigu. Mbela onkalamwenyo ye oya li tayi ka hulila owala mpoka? Aawe, eiyambo lye olya li lye shi ningi tashi vulika opo oondjo dhoyendji dhi dhimwe po. (Jesaja 53:4, 5, 9-12) Eyumuko lye olyo owala lya li tali ke shi pondola.
4. Okupangela kwaMesiasa kwokombanda yevi. Aantu inaaya gwanenena ihaya vulu okwiipangela nombili, ihe Omukwaniilwa gwopaMesiasa okwa li te ki ithanwa Omukwaniilwa gwOmbili. (Jesaja 9:6, 7; Jeremia 10:23) Kohi yepangelo lye aantu ayehe otaya ka kala ye na ombili nayakwawo nosho wo niishitwa ayihe. (Jesaja 11:3-7) Uuwehame itau ka kala po we. (Jesaja 33:24) Nokuli neso otali ka hanagulwa po sigo aluhe. (Jesaja 25:8) Pethimbo lyokupangela kwaMesiasa aantu mboka ya sa otaya ka yumukila omwenyo kombanda yevi.—Daniel 12:13.
