PANDAŴI ja acayimwene ŵa Yisalayeli ni Yuda, papali likuga lya acalume ŵane ŵaŵasalaga mautenga ga Mlungu, ŵaŵakolanjikwaga kuŵa ŵakulocesya. Acalumeŵa ŵaliji ŵacikulupi cekulungwa, soni ŵakulimba mtima mnope, ŵaŵasalaga mautenga ga Mlungu. Kwende tulole ngani mcece syakusosekwa mnope syaŵasasile ŵakulocesya ŵa Mlungu.

1. Konasika kwa Yelusalemu. Kuli kusigele ndaŵi jelewu, ŵakulocesya ŵa Mlungu mpela Yesaya ni Yelemiya ŵatandite kwakalamusya ŵandu kuti Yelusalemu cacijonasika, soni kuti caciŵa masame. Mwakupikanika cenene, ŵakulocesyaŵa ŵasasile ligongo lyakwe Mlungu ŵatumbile ni msindawu. Atamose kuti ŵandu ŵa mu Yelusalemu ŵatiga kuti ŵajimilaga Yehofa, yawonece kuti yaliji yaunami, ligongo ŵanduŵa ŵatendaga yitendo ya dini jaunami, yipupu, soni yitendo yakuwulasyana.—2 Mafumu 21:10-15; Yesaya 3: 1-8, 16-26; Yeremiya 2:1–3:13.

2. Kuwucisya kulambila kweswela. Panyuma pa yaka 70 ali ku ukapolo, ŵandu ŵa Mlungu ŵaliji ŵakuti cacigopolwa ku Babelo. Caciwujila ku Yelusalemu ni kutaŵasoni nyumba jakupopelela ja Yehofa. (Yeremiya 46:27; Amosi 9:13-15) Ciŵandika yaka 200 mkanipaŵe, Yesaya ŵalocesye ya mundu lina lyakwe Kolesi, juŵaliji jwakuti cacisumula Babelo ni kwakunda ŵandu ŵa Mlungu kuti awucisye kulambila kusyesyene. Yesaya ŵasasilesoni litala lyakusimonjesya licacikamulicisya masengo Kolesi pakusumulako.—Yesaya 44:24–45:3.

3. Kwisa kwa Masiya ni yicacisimana nayo. Masiya ŵaliji jwakuti cacipagwila m’musi wa Betelehemu. (Mika 5:2) Caciŵa jwakulinandiya, soni caciyika ku Yelusalemu ali akwesile pa bulu. (Zekariya 9:9) Atamose kuti caciŵa jwakuwusimana mtima, soni jwacanasa, ŵajinji caciŵengana najo, soni cacimkana. (Yesaya 42:1-3; 53:1, 3) Caciwa ciwa cangalwe. Ana jeleji jaliji jakuti jiŵe mbesi ja Masiya? Iyayi, ligongo mbopesi jakwe jaliji jakuti jikombolekasye kululucila ulemwa wa ŵandu ŵajinji. (Yesaya 53:4, 5, 9-12) Kwimuka kwakwe ku ŵawe kwaliji kwakuti kukombolekasye yeleyi.

4. Ulamusi wa Masiya pacilambo capasi. Mwakulekangana ni ŵandu ŵaulemwa, ŵakulepela kulilamulila acimsyene, Mwenye jwa Umasiya cacikolanjikwaga kuŵa Mwenye jwa Mtunjelele. (Yesaya 9:6, 7; Yeremiya 10:23) Mu ulamusi wakwe, ŵandu wosope caciŵa pamtunjelele jwine ni mjakwe, soni atamose ni yinyama yosope. (Yesaya 11:3-7) Ŵandu ngasalwalaga. (Yesaya 33:24) Atamose ciwa cicimala kwa ndaŵi josope. (Yesaya 25:8) Pandaŵi ja ulamusi wa Masiya, ŵaŵawile cacajimusya ni kolasoni umi pacilambo capasi.—Danieli 12:13.

—Nganiji jityocele m’mabuku ga Yesaya, Yeremiya, Danieli, Amosi, Mika, ni Zekariya.