DANIEL, kiñe israelche püntütripakenolu Jewba mew, fey pichi wentrungelu yengey ñi konangeal Babilonia mew, petu ñi apümngenon Jerusalen. Kidu ka kakelu pu judio konangefule rume engün, welu ella lifrelekefuyngün chew ñi mülen. Feychi tripantu mew ñi mülemüm feyti waria mew, Ngünechen rumel (molkechi) kellukefi ta Daniel. Ka kellufi ñi tripatual rüngan mew chew ñi mülen pu trapial (fücha peñi) ka eluñmafi ñi peal ti küpalechi antü mu. Daniel ñi doy falin pelon dungu koneltuley ti Mesia mu ka ñi Ngünenien.

Tunten mew ñi akual ti Mesia. ¿Chem antü mew Ngünechen tañi pu che mülefuy ñi lliwatuafiel ñi akual ‘Ti Mesia Ñidol’ ngen? Mülefuy ñi wiño dewmangetual alüpürachi malal Jerusalen mew. Ka Daniel feypingey ñi pual 69 semana tripantu ngelu. Kiñe semana am nielu regle antü, kiñe semana tripantu mu müley ñi nieael regle tripantu. Feychi 455 tripantu mu petu ñi mülenon Jesu, mülefuy ñi dewmangeal Jerusalen waria, fentren tripantu rupalu ñi mülemüm Daniel. Rakifuliyiñ 69 ‘semana’—puafuy 483 tripantu—, femngechi puay 29 tripantu tañi mülen Jesu. ¿Chem ruparkey? Kangelu kimeltun peafiyiñ. Ka feypingey ta Daniel ti Mesia ñi lagümngeal ñi kullial kom ñi yafkan nielu pu che (Daniel 9:24-26).

Ti Mesia Longko Ülmen-ngealu wenu mapu mew. Feymew kiñe afmatun perimontun mu, Daniel pey ‘kiñe wentru ñi fotüm reke’ —feyta Mesia ngerkefuy— fey fülkonpuy chew mülemüm Chaw Ngünechen. Feymu Jewba elueeyew ‘ñi longkoleal ka rume ñi yamfalngen ka Ngünenien’, tüfa rumel (molkechi) ngünenieay. Welu ka Daniel pey kiñe afmangechi dungu Mesia ñi ngünenien: ñi Longko Ülmen-ngen trür ngünenieay kiñe trokiñ che engün, ‘Ngünechen ñi dullin (ngümintun) mu’, pingekefuy engün (Daniel 7:13, 14, 27).

Tüfachi Ngünenien apümafi kom pu longkolelu mülelu tüfachi mapu mew. Ngünechen pelon elufi ta Daniel ñi kimal Nabucodonosor ñi pewma mu, rume rakiduamkülelu, ti ülmen longkolelu Babilonia waria mew. Fey Daniel pey kiñe fütra adentun ñi milla longkongelu, ñi rüku ka tañi lipang platangelu, ka ñi pütra ka ñi chang kelü pañilwengelu, ñi luku pañilwengelu ka ñi namun reyülelu pañilwe ka fotra engu. Feymew, ti wingkul mew, tripay kiñe küra fey newen puwi ti fütra adentun yafüngenolu ñi namun mew, fey rüngüfnagi. Feymu Daniel feypifi tati ülmen longkolelu, ti milla longko pengeli ta Babilonia, kangelu kay pu fütrake longko ülmen Mapu mew küpaleay küpalechi antü mu. Ngünechen ñi Ngünenien, ngünenieay petu ñi mülen ti inankülelu longko ülmen Mapu mew —ti namun reyükonkülelu pañilwe ka fotra engu— feymew rüngüfnagi kom pu longko ülmenkülelu kom Mapu mew. Fey wüla rumel (turpu) ngünenietuay kom Mapu (Daniel, kapitulo 2).

Daniel dew füchalu ñi mongen mew, pey chumngechi apümkangey ta Babilonia. Chumngechi feypikünungelu ti pelon dungu, ti longko ülmen Siro pingelu nüpurkefi tüfachi waria. Pichin mu, wechurpulu regle mari tripantu tati pu judio ka tripayngün chew konayenieyngün, ñi wiñotual Jerusalen ñi mapu mew. Feymu fentren pu longko, ka saserdote, ka püntütripakenochi pelon wentru tañi ngüyüleafiel ñi dewmangeal Jerusalen ka ñi küme elkünungeal Jewba ñi ngillatuwe ruka. Welu rupalu 483 tripantu feypikünungelu, ¿chem dungu rupay?

(tuwlu Daniel ñi lifru)