TÁ KÚMANI̱ cháá vá kivi̱ ña̱ naá nuu̱ ñuu Jerusalén, jaá ni̱ tiin na Daniel iin ta̱ ñuu Israel ta̱ ni̱ si̱kuu iin ta̱yiví ndaa̱ nuu̱ Ndio̱s néʼe na kuaʼa̱n na̱ ñuu Babilonia, tá ni̱ si̱kuu ra iin ta̱ lóʼo̱. Ta̱ yóʼo xíʼín na̱ ñuu Judá va̱árá ni̱ si̱ñuʼu na nuu̱ ndáʼa̱ ta̱ ñuu Babilonia, jo ni̱ si̱síʼa va ta̱ yóʼo íchi̱ nuu̱ ná ña̱ ni̱ si̱kee na java ña̱ʼa. Ndijaá kuia̱ ni̱ si̱io Daniel yóʼo nuu̱ ñuu Babilonia ni̱ keemáni̱ ndiva̱ʼo ñaʼá Ndio̱s. Jáchi̱ ni̱ chi̱ndeé sí ra̱ já ko̱ ní siʼi̱ ra̱ tá ni̱ chi̱kaa̱ na ra̱ ini yávi̱ nu̱ú ñúʼu ndikaʼa, ta ni̱ kee si ña̱ ni̱ xini rá ña̱ koo chínuu̱. Tu̱ʼun ña̱ kúnu̱ú chááka̱ ni̱ na̱tiin Daniel nuu̱ Ndio̱s ni̱ si̱kuu tu̱ʼun ña̱ káʼa̱n saʼa̱ Mesías xíʼín Gobiernó si.

Ni̱ ka̱ndaa̱ ini Daniel kivi̱ kasaa̱ Mesías. ¿Ndá nama kánian kandati na̱ ñuu Ndio̱s ña̱ kasaa̱ “Mesías ta kúú Sa̱toʼo na”? Ni̱ na̱kani na xíʼín Daniel ña̱ nda̱ kivi̱ ña̱ taʼnda̱ chuun ña̱ ndajava̱ʼa na ndijaá náma̱ ñuu Jerusalén ya̱ʼa 69 semaná ña̱ kúú kuia̱ jaá kasaa̱ ta̱ yóʼo. Jáchi̱ usa̱ kivi̱ néʼe iin semaná ña̱kán iin semaná ña̱ kúú kuia̱ néʼan usa̱ kuia̱. Kuaʼa̱ ndiva̱ʼo kuia̱ chínuu̱ tá ni̱ ndiʼi ña̱ ni̱ si̱io Daniel já ni̱ taʼnda̱ chuun ña̱ ndajava̱ʼa na náma̱ ñuu Jerusalén, ña̱yóʼo ni̱ si̱kuan kuia̱ 455 tá kúmani̱ kasáʼá kuia̱ 1. Tá nda̱ kuia̱ yóʼo ná kasáʼá yó kaʼvi yó 69 “semaná” ña̱ kúú kuia̱ síno 483 kuia̱, jaá saa̱ yó nda̱ kuia̱ 29 tá sa̱ ni̱ ka̱sáʼá kuia̱ 1. ¿Ndíki̱án ni̱ kuu kuia̱ jaá? Chááka̱ chínuu̱ já kande̱ʼé yó ña̱yóʼo. Jaá ní ni̱ kandaa̱ ini Daniel ña̱ kaʼní ná Mesías já kuu chiya̱ʼvi ra sa̱ʼá kua̱chi ndijaá táʼa̱n na̱yivi (Daniel 9:24-26).

Saa̱ Mesías kukuu ra Rey indiví. Ni̱ naá vá ini Daniel tá ni̱ xini ra iin ña̱ ni̱ naʼa̱ Ndio̱s nuu̱ rá, tá ni̱ si̱nde̱ʼé rá “iin ta̱ kúú tátu̱ʼun de̱ʼe ta̱ ta̱a” ta̱ yóʼo ni̱ si̱kuu Mesías, ta ni̱ ku̱yati ra kuaʼa̱n ra̱ nu̱ú nákaa̱ Ndio̱s indiví saʼndá si chuun. Ikáa kúú nu̱ú ni̱ si̱ʼa Jeová Ndio̱s “chuun kaneʼe ra xíʼín ña̱ñúʼú xíʼín ndée̱ ña̱ kaʼnda ra chuun”, ta ndijaá táʼa̱n kivi̱ kaʼnda ra chuun. Tá ni̱ ndiʼi já ni̱ ka̱ndaa̱ taʼni ini Daniel inga̱ ña̱ʼa saʼa̱ Gobiernó Mesías yóʼo: ña̱ ndóyi va java ka̱ na̱ kaʼnda chuun xíʼín ta̱ Rey yóʼo “na̱yivi kúú kuendá Ndio̱s na̱ kandoyi indiví” (Daniel 7:13, 14, 27).

Jándíʼi Gobiernó yóʼo nuu̱ ndijaá táʼa̱n gobiernó ñuyíví. Ni̱ si̱ʼa Ndio̱s ña̱ ndichí nuu̱ Daniel já ni̱ kuu ni̱ na̱kani ra ndíki̱án kúni̱ kachi iin sa̱ni ña̱ ni̱ kee ña̱ ni̱ na̱kani ndiva̱ʼo ini Nabucodonosor ta̱ rey Babilonia. Jáchi̱ ni̱ xini ta̱ yóʼo iin naʼná chi̱káʼno ña̱ káa tátu̱ʼun iin ta̱yiví, ta ka̱a kuaán kúú xini̱ ta̱ yóʼo, ta ka̱a ku̱xí kúú yika̱ rá xíʼín ndáʼa̱ rá, ta ti̱xi rá xíʼín xíi̱n ji̱ʼin ra kúú ñá ka̱a cobré, ta ji̱ʼin ra kúú ña̱ ka̱a, ta saʼa̱ rá kúú ña̱ ka̱a ni̱ jaka̱ táʼan xíʼín ndeʼei̱. Ta jaá, ni̱ kana iin yuu̱ ni kisi ña xini̱ iin yúku̱ ta ni̱ ña̱ni ña saʼa̱ naʼná yóʼo ta ni̱ ja̱ndúan ña̱ ñúʼu̱ ya̱ká. Ta ni̱ na̱kani Daniel xíʼín ta̱ rey yóʼo ña̱ xini̱ naʼná yóʼo ña̱ kúú ña̱ ka̱a kua̱án kúni̱a̱n kachian ñuu Babilonia, ta iin níí naʼná yóʼo kúni̱a̱n kachian java ka̱ gobiernó náʼno ñuyíví yóʼo ña̱ kisi chááka̱ chínuu̱. Ta kivi̱ ña̱ kandoyi gobiernó náʼno nu̱jandíʼí —ña̱ kúú saʼa̱ ka̱a xíʼín ndeʼei̱— jaá ví kía̱n kasaa̱ Gobiernó Ndio̱s ta jándíʼan nuu̱ ndijaá táʼa̱n gobiernó ñuyíví yóʼo. Jaá kía̱n ndijaá táʼa̱n kivi̱ kaʼnda ña chuun nuu̱ iníí kúú ñuyíví yóʼo (Daniel, capítulo 2).

Ni̱ xini va Daniel tá ni̱ naá nuu̱ ñuu Babilonia jáchi̱ takú i̱í vá rá tá ni̱ si̱io ña̱yóʼo. Ko̱ kuaʼa̱ ví kivi̱ ni̱ ya̱ʼa, tá ni̱ si̱no uni̱ xiko uxi̱ kuia̱ ña̱ ni̱ kana na ñuu mií ná ta ko̱ íin ka̱ ni̱ síndoyi nu̱án, jaá kía̱n ni yaa̱ va na ñuu Judá nuu̱ ndáʼa̱ ta̱ Babilonia, ta ni̱ ka̱ndeé ta̱ rey Ciró ni̱ ki̱ʼvi ra nuu̱ ñuu Babilonia tátu̱ʼun ni̱ kachi na ña̱ koo. Sa̱ʼá ña̱ ni̱ chi̱ndeé ñaʼá kua̱ʼá ta̱ néʼe chuun, xíʼín java ta̱ jutu̱ xíʼín java ta̱ profetá ta̱ ni̱ ka̱chúun ndaa̱ nuu̱ Ndio̱s, ni̱ nda̱java̱ʼa na̱ ñuu Judá yóʼo ñuu Jerusalén xíʼín veʼe nu̱ú ni̱ si̱keekáʼno na Jeová Ndio̱s. Jo tá ni̱ ya̱ʼa 483 kuia̱ ña̱ si̱ ni̱ kachi na ña̱ ya̱ʼa, ¿ndíki̱án ni̱ kuu?

(Ña̱yóʼo va̱sian nuu̱ tutu Daniel.)