DANIELI, ono matua si lö faröi, la’ohe ia ba Mbabilona fatua lö tekiko Yeruzalema. Danieli ba awönia tanö bö’ö—ono matua ni’oloi’ö moroi ba Yehuda—la’omasi’ö ira sangoloi’ö ya’ira. Sagötö fe’aso Danieli ba Mbabilona, ifahowu’ö ia Lowalangi, te’efa’ö ia moroi ba mbawa zingo, oroma khönia gangilata salua ba zi so föna. Sabölö ifa’ele’ö Danieli ya’ia da’ö sanandrösa ba wa’atohare Mesia ba famatörönia.

I’ila Danieli hawa’ara tohare Mesia. Te’ombakha’ö khö Danieli hawa’ara latötöna niha gulidanö we’aso ”Mesia, Salawa”, ya’ia da’ö 69 migu ndröfi me no aefa labe’e goroisa ba wangehaogö osali ba Yeruzalema. Si to’ölönia si samigu fitu ngaluo, si samigu andre lafotöi ia ba ndröfi, si fitu ngaluo eluahania fitu fakhe. Ara me no aefa götö ndra Danieli awena labe’e goroisa andrö me döfi 455 SM. Ba da’ö tebörötaigö zi 69 ”migu” andrö irugi ndröfi 29 M, fa’arania fefu 483 fakhe. Ba nga’örö afuriata moroi ba mbuku andre, ba da’ö ta’ila hadia zalua ba ndröfi da’ö. No te’ombakha’ö göi khö Danieli, wa samuza ma’ökhö ”tetimba” Mesia, mazui labunu, si tobali höli ba horö niha gulidanö.​—Danieli 9:24-26.

Tobali Razo Mesia ba zorugo. Ba gangilata Danieli oroma khönia zorugo, i’ila Mesia ’zi hulö nono niha’, i’ondrasi dadaoma Yehowa. Ibe’e khönia Yehowa ”wa’abölö ba fa’ebua döi ba fa’asalawa”. Ba lö tebulö wamatörönia irugi zi lö aetu. So nasa ni’ila Danieli sadöni dödöda ba wamatörö Mesia—ya’ia da’ö so nawö Mesia ba wamatörö dania, da’ö nifotöi ”niha ni’amoni’ö khö Wondrege zalawa”.​—Danieli 7:13, 14, 27.

Famatörö Mesia zangohori fefu famatörö si so ba gulidanö. Ibe’e Lowalangi wa’atua-tua khö Danieli ena’ö i’ila ifo’eluaha wangifi Nebukanesa, Razo Mbabilona. Ba wangifi razo Nebukanesa, i’ila sambua nadu sebua, högönia moroi ba mbalaki, tötö’a ba ta’ionia moroi ba wirö, talu ba lafoyo moroi ba döla garamba, fahania moroi ba zi’öli, ba ahenia si’öli si faruka la’uri. Aefa da’ö, so sambua gowe nitaba moroi ba hili ba göna ba gahe nadu sebua, ba arasa gahenia andrö irege aso’a nadu andrö tobali gawu-gawu. I’ombakha’ö Danieli wa ndroto-ndroto nadu sebua andrö amaedola razo samatörö ba gulidanö, razo si föföna ya’ia da’ö Babilona si no amaedola högö moroi ba mbalaki. I’ila Danieli, ba gafuriata wamatörö razo ba gulidanö si lö sökhi andre, ba da’ö tohare Wamatörö Lowalangi. Famatörö da’ö zangohori fefu amatöröwa ba gulidanö. Ba Famatörö Mbanua Lowalangi lö tebulö irugi zi lö aetu.​—Danieli, faza 2.

Anau gölö Danieli irege i’ila me adudu Mbabilona. Razo Kiro zondru-ndrugö banua andrö, alua zimane si no tefa’ele’ö. Lö ara aefa da’ö, te’efa’ö niha Yehuda moroi ba Mbabilona me no irugi—70 fakhe Yeruzalema lö niha-niha. Börö wanuturu lala moroi khö ndra kumandru, ere, ba sama’ele’ö si lö faröi, lafuli lafasindro Yeruzalema niha Yehuda ba lafuli lafazökhi gosali khö Yehowa. Hadia zalua ba gafuriata ndröfi 483?

​—Te’odane-dane ba mbuku Danieli.