DANIEL tʼah ániid naagháago Jiihóvah bikʼeh hóʼı̨́ı̨́jí jótąʼ. Éí Jerúsalem tʼáh doo ábiʼdildįįhgóó Bábilangóó hoʼdisnááh. Daniel dóó Jew dineʼé łaʼ, Júdahdóó dahasʼnááhígíí haa shı̨́ı̨́ níłtsogo tʼóó há ndahasʼą́ą́ ńtʼééʼ. Daniel éí Bábilangi jiináago God hakʼihodlíí ńtʼééʼ. Łah éí náshdóítsoh bitsiijįʼ daditłʼooígíí shijééʼ góneʼ bitsʼąą yisdájííyá. Áádóó God bitsʼą́ą́dóó náasdi áhodooníłígíí jiiłtsą́. Mesáíyah áádóó Hojooʼáał dooígi, éí Daniel íiyisí yaa nahasneʼ.

Daniel éí Mesáíyah doogááł góneʼ bił bééhoozin. Daniel éí kóbiʼdooʼniid, Mesáíyah “Diyin Kʼehgo Atsʼáltíinii” kweʼé nahalzhiishgo nideinóhłíi doo. Éí Jerúsalem hashtʼe doolníiłgo bee nihootʼánę́ę dóó bikʼijįʼ, 69 damóo nináháhááhígíí azlı̨́įʼjįʼ nideinóhłíi doo. Tʼáá łaʼ damóojįʼ éí 7 yiłkááh; ndi damóo nináháhááhígíí éí 7 nááhaigo áhyiłní. Jerúsalem hashtʼe doolnííł haʼnínę́ę, éí 455 B.C.E yihah góneʼ bee nihootʼą́. Áko áádóó hahoolzhiizhgo 69 “damóo azlı̨́įʼjįʼ” éí 483 nááhai, díí éí 29 C.E. yihahjįʼ bee nihoolzhiizh. Tʼahádóó díí naaltsoos biiʼ baa daʼíídíilta. Daniel díí ałdóʼ yiyiiłtsą́, Mesáíyah bidiʼyoolyéełgo binahjįʼ ádił niʼiidzííh ádin doo.​—Daniel 9:24-26.

Mesáíyah éí yáʼąąshdi Naatʼáanii dooleeł. Daniel éí Mesáíyah, “Diné Silı̨́įʼii” bidiʼnínę́ę, yáʼąąshdi Jiihóvah bibikááʼdóó nahatʼáii yichʼįʼ niníyáago yiyiiłtsą́. Jiihóvah éí “bee óhólníihii áádóó ayóó átʼéii índa bee óhólnííh bił hazʼáanii” yaah niinílá. Díí Nahatʼaʼ éí hoolʼáágóó hólǫ́ǫ doo. Daniel ałdóʼ díí bił bééhoozin. Éí Mesáíyah Naatʼáanii, “Aláahgo Ayóóʼátʼéii bidiyı̨́ı̨́ʼ,” dabidiʼnínígíí yił dahwéeʼaah doo.​—Daniel 7:13, 14, 27.

God biNahatʼaʼ éí bílaʼashdlaʼii binahatʼaʼ íidoołdįįł. Bábilan binaatʼáanii Nébukadnézzar nayiizyeelgo tʼóó bił náhohłąąh. Áko Daniel éí hazhóʼó bee bił hozhdoolnihgi God hai diníʼą́. Naatʼáanii éí dinéshchíín beʼelyaago ayóó áníłnééz léiʼ baa nijiizyeel. Éí bitsiitsʼiin óola, bijéítsʼiin índa bigaan éí béésh łigaii, binííʼdóó yaago bigodjįʼ béésh łitsoii, bijáád éí béésh nitłʼizii, áádóó bikeeʼjįʼ béésh nitłʼizii áádóó hashtłʼish bił ałtah nínilgo baa nijiizyeel. Dził léiʼ bitsʼą́ą́dóó tsé haalgizhgo bikeeʼ ditʼódígíí yił dzideesneʼgo ałtso dinéshchíín bééʼélyaa yę́ę yidííłbahgo yidiiłtaaʼ. Daniel éí díí dinéshchíín bééʼélyaaígíí hazhóʼó yaa hoolneʼ. Éí níléídę́ę́ʼ bílaʼashdlaʼii binahatʼaʼ ałkééʼ náhoodleełígíí bee bééʼélyaaígíí átʼé ní. Bábilan binahatʼaʼ éí atsiitsʼiinjįʼ óolaígíí jílı̨́įgo bee hahoolzhiizh. Bílaʼashdlaʼii binahatʼaʼ akéeʼdiígíí baa hoolzhiizhgo éí God biNahatʼaʼ yididoołta. Éí bílaʼashdlaʼii binahatʼaʼ ałtso íidoołdįįł. Áádóó God biNahatʼaʼ hoolʼáágóó hooʼáał doo.​—Daniel wóltaʼii 2gi.

Daniel tʼáá yéigo hastihgo, Bábilan binááł ábiʼdisdįįd. God bá dahalneʼii áhodoonííł daa nínę́ęgi átʼéego, Sáíras éí Bábilan kin haalʼáhígíí ałtso íísdįįd. Díí bikééʼdóó tʼáadoo nízaad niholzhíhí Jew dineʼé dabiʼdisnááhdę́ę́ʼ bééʼílniiʼ​—70 nídoohah hakéyahgi hookʼeed doo haʼnínę́ę tʼáá ákweʼé hoolzhishgo hwéé ílniiʼ. Alą́ąjįʼ naazíinii, náádaʼiiłniihii, dóó God yá dahalneʼii éí Jew dineʼé Jerúsalem ánídayiidlaa. Áádóó Jiihóvah bikin biiʼ sohodizin yę́ę ałdóʼ hashtʼéé dayiidlaa. Ákoshąʼ 483 nááhaidóó bikʼijįʼ haa hodoonííł?

​—Naaltsoos Daniel biiʼ baa haneʼ.