JERUSALENTA manaraq ushakätsiyaptinmi, Danielta wamrallaraq këkaptin Babiloniaman preso apakuyarqan. Pë y wakin judïokuna markankunapita juk markaman apashqa këkarpis, librenöran kawayarqan. Tsë markachö kanqan witsankunaqa manam Danielta Dios jaqirqantsu. Jina leonkuna llawiräyanqan uchkupita kawëkar yarqamunampaq y shamoq tiempochö pasanampaq kaqta rikänampaqpis yanaparqanmi. Daniel willakunqan más precisaq profecïakunaqa karqan Mesïaspaq y Gobiernompaqmi.

Mesias chämunan witsan. ¿Ëka tiempotaq “Pushakoq Mesïas[ta]” Diospa markan shuyaränan karqan? Jerusalenpa perqankunata altsayänampaq mandakï kanqampita, 69 wata semänakuna pasariptinraq Mesias chänantam Diosqa Danielta willarqan. Juk semänachöqa qanchis junaqkunam kan, tsëmi juk semänata watakuna nirqa, qanchis wata nikantsik. Jerusalenta altsayänampaq mandakïqa yarqamurqan, m.J.sh. 455 wata witsanchömi, tsëqa karqan Daniel unëna wanukushqanchönam. Tsëpita patsë 69 “semänakunata” o 483 watakunata yupashqaqa, J.sh. 29 watamanmi chärin. ¿Imataq tsë witsanqa pasarqan? Tsëpitanam tsëtaqa rikäshun. Jina Danieltaqa Diosnintsik musyatsirqanmi nunakunapa jutsampita pagakunanrëkur Mesias wanunampaq kaqtapis (Daniel 9:24-26).

Mesïasqa ciëlochömi gobernanan karqan. Juk visionchömi Daniel rikëkurqan “nunapa tsurin rikoq” Diospa trönonman witikaqta, tsëqa Mesïasmi karqan. Tsënam “mandakïta, respetashqa këta y gobiernota” Jehová qorqan, mana imëpis ushakaq gobiernota. Jina tsëpitanam Danielqa juk shumaq willakïta musyarirqan, tsë gobiernoqa juk grupo nunakunawanmi mandakunan karqan, y pëkunaqa “Llapan Janampa Këkaqpa santo nunankunam” kayan (Daniel 7:13, 14, 27).

Patsachö gobiernokunatam ushakätsinqa. Babiloniapa reynin Nabucodonosor suëñokunqan ima ninan kanqanta alläpa yarparaptinmi, Dios willatsirqan Danieltawan. Pëqa jatun imägentam rikashqa karqan, öropita peqayoqta, pëchonwan rikrankuna qellëpita, pachan y tita chankankuna cobrepita, qonqun urëkuna hiërropita y chaki dëdon kaqkunana hiërrowan mitu takushqata. Tsënam, jirkapita juk rumi jeqamur chakinchö ratëkurqan y paqwë ushakäratsirqan. Danielqa reyta willarqan, öropita peqanqa, Babilonia kanqanta y wakin kaq partenkunaqa shamoq tiempochö nunakunapa gobiernon kanqantam. Diospa Gobiernonqa qallëkunan karqan ushanan kaq gobiernokunapa tiemponkunachömi —chaki dëdon hierrowan mitu takushqa kaqchö— y paqwëmi ushakätsinan karqan Patsachö llapan gobiernokunata. Y tsëpitanam jinantin Patsata gobernanan karqan (Daniel, capítulo 2).

Danielqa Babilonia paqwë ushakänampaq kaqta rikänampaq kawarqanraqmi. Willakunqannöllam tsë markata ushakätsinampaq rey Ciro yëkurirqan. Y esclavo këkäyanqan 70 watakuna cumpliriptinllanam, judïokuna tsë markapita librena yarquriyarqan. Gobernantekuna, sacerdötekuna y Diosta sirweq profëtankuna dirigiyaptinmi, Jerusalenpa perqankunata altsayarqan y Jehoväpa templonta yapë rurayarqan. Pero ¿imataq pasakurqan 483 watakuna pasariptinqa?

(Daniel libropita jorqashqam.)