DANIELQA kasukuq israelitam karqa, Jerusalen manaraq puchukachisqa kachkaptinmi mozochallataraq Babiloniaman aparurqaku. Danielqa judiomasinkunawan sirviente kachkaspankupas wakinpiqa favorecesqam karqaku. Arí, Diosqa manam saqerqachu Danieltaqa. Leonkuna mana wañuchinanpaqmi waqaycharqa, qawachirqataqmi hamuq tiempopi imakuna pasananmantapas. Danielqa allintam willakurqa Mesiasmantawan Gobiernonmantapas.

Mesias haykapi rikurimunanmanta. “Akllasqa Kamachikuq”, ¿haykapi rikurimunantataq suyananku karqa Diospa llaqtan? Danielmanmi revelacionninpi nirqa Jerusalen llaqta kaqmanta hatarichisqa kananpaq kamachikuy lloqsiptin 69 semanakuna pasananmanta. Kayqa manam 7 punchawniyoq semanakunachu, aswanqa Bibliapa nisqanman hinaqa sapa semanam 7 watakuna. Jerusalen kaqmanta hatarichisqa kananpaq kamachikuymi lloqsirqa 455 watapi c.t.ñ., Danielpa wañukusqan qepataña. Sichu chay watamantapacha yupasun 69 semanakunata otaq 483 watakunata, chayasunmi c.t. 29 wataman. ¿Imataq chaypi pasarqa? Chaytaqa chaymantañam qawasun. Danielmanqa nirqataqmi runakunapa huchanmanta pagananpaq Mesias “wañuchisqa” kanantapas (Daniel 9:24-26).

Mesias hanaq pachapi Rey kananmanta. Danielqa admirakuypaq revelacionninpim rikurqa Diospa tiyananman “runapa churinman rikchakuq” otaq Mesias hamuchkaqta. Hinaptinmi Jehová Dios qoykurqa respetasqa kananpaq derechota hinaspa wiñaypaq kamachinanpaq gobiernotapas. Danielqa yacharurqataqmi Mesiasqa huk runakunawanpas kamachinanmanta, paykunam sutichasqa kanku ‘Diospaq sapaqchasqa kaqkuna’ nispa (Daniel 7:13, [14, NM], 27).

Diospa Gobiernonmi runapa gobiernonta chinkachinqa. Diosmi Danielta yanaparqa Babiloniapi rey Nabucodonosorpa hukmanyachiq mosqoyninpa ima nisqanta willananpaq. Reymi rikurqa hatunkaray taytachata, umanmi karqa qorimanta, qasqonwan brazonkunañataq qollqemanta, wiksanmanta moqonkamañataqmi broncemanta, moqonmanta chakinkamañataq fierromanta, chakinkunañataq fierrowan chapusqa mitumanta. Hinaptinmi huk orqomanta rumi lloqsiramuspan chay taytachapa chakinpi hapiruspan ñutuparurqa. Danielmi nirqa chay taytachapa qorimanta umanqa Babilonia kasqanta, wakin partenkunañataq manaraq rikurimuq atiyniyoq nacionkuna kasqanta. Diospa Gobiernonqa kamachiytam qallarinan karqa Allpantinpi munaychakuq nacionpa tiemponpi, hinaspam lliw gobiernokunata chinkachinan karqa. Hinaspam enteron pachapi wiñaypaq kamachinqa (Daniel 2 capitulo).

Danielqa kawsakurqaraqmi Babiloniata puchukachiptinku. Diospa nisqanman hinam rey Ciro puchukachirqa. Hinaptinmi 70 wata Jerusalen purmachisqa kasqan cumplikuchkaptin, judiokunaqa libre karqaku. Kamachikuqkunapa, sacerdotekunapawan profetakunapa yanapakuyninwanmi Jerusalenta kaqlla hatarichirqaku, allicharqakutaqmi Diospa templontapas. Ichaqa, ¿imam pasarqa chay 483 watakuna tukuruptin?

(Daniel libromanta.)