YE YÉHOVA a nga volô bôte na be yeme za a ne Messie? Ôwé. Bi tame yene jé Zambe a nga bo. Mimbu mintete minyine mi nga lôt éyoñ éfase kalate Zambe é ne nkobô Hébreu é maneya tiliban. Étisone Nazareth é mbe nord ya Galilée, vôm ate nye ngone minga é mbe jôé na Marie é nga bi njoman atemetem. Éngele a to jôé na Gabriel a nga yené be Marie, a kate nye na Zambe a ye belane ngule jé, mfufup nsisime wé, a bo marie na a nyoñ abum a biaé mon a fam, ja’a na a ngenan éndune ngone minga. A nga kate fe nye na mone wé aye bo Njô bôte be nga ka’ale, nyi aye jôé nnôm éto! Mon ate aye bo Mone Zambe émien, nye Zambe a nga lôme si nyô, a futi ényiñe jé abume be Marie.

Ane Marie a nga sulu émiene si a kañese beta édima jam ate. Kafinda éziñ é to jôé na Joseph, ba Marie be nga to be bili atiñ aluk. Zambe a nga lôme éngele a zu kate Joseph vôm abume mone Marie d’ aso. Mvuse ya été, ane be nga lu’an. Aval avé nkulan ajô ô nga to ô liti’i na Messie a ye bialé Bethléhem ô nga tôéban? (Michée 5:2) Bethléhem a nga to mon étison. Bekilimita 140 be nga to zañe ba Nazareth!

Éjôé ya Rome é nga tyi’i na nlañane bôt wo yiane boban. Môt ase a nga yiane lañeban étison a nga bialé. Ane é nga tôbane na, Joseph ba Marie be nga bialé Bethléhem. Ajô te Joseph a nga nyoñe minga wé a to nduu abum, a ke nye. (Luc 2:3) E ne Marie a nga ke biaé wé. Vôm a nga biaé a nga to teke ngômôtô, ane a nga bôé mone nkeñelé mone nda biyem. Zambe a nga lôme beéngele na be kate beba’ale mintômba be mbe abume nkôle na mon a te bialé a ne Messie be a yange, nge na Krist.

Mvuse ya valé, bôte befe be nga yemete na Yésus a ne Messie. Nkuli mejô Ésaïe a nga jô na môt a ye taté bialé a zu kpwa’é Messie zen. (Ésaïe 40:3) Môt ate a mbe jôé na Jean Baptiste. Éyoñ a nga yene Yésus, a nga bete tyiñe yôp a jô na: “mi lô, mon ntômba Zambe a va mam abé ya si nyô!” Beyé’é be Jean Baptiste beziñe be nga tôñe Yésus. Wua ya été a nga jô na: “bi yeneya Messie (e ne na Christ).”​—Jean 1:29, 36, 41.

Éyoñe mame mete me lôteya, jam afe é nga zu yemete na Yésus a ne Messie. Éyoñe Jean a nga dube Yésus, Yéhova a nga kobô a jô na: “Nyina a ne Mone wom me anye’e, me lô nye mvaé.” (Matthieu 3:16, 17) Messie ya be nga jaé yange a nga yené fo’o!

Jamete é nga bobane éyoñ évé? Mbu 29 É.J., éyoñe mimbu 483 Daniel a na jô mie mi nga kpwaan. Yaa, bifia bi Yéhova bite bi ne beta jam a yemete na Yésus a ne fo’o Messie, nge na Krist. Foé fé a nga kate nté ôse a nga tabe si va?

​—Nkañete ôte wo so kalate Matthieu ataté kabetôlô 1 akekui 3; Marc kabetôlô 1; Luc kabetôlô 2; Jean kabetôlô 1.