¿BAJCHEʼ mi caj i cʌñob winicob xʼixicob jini Mesías? Dios tsaʼ yʌcʼʌ ti cʌjñel bajcheʼ yilal jini Mesías. Tsaʼ ñumi jumbajcʼ (400) jab cheʼ tsaʼ ujti ti tsʼijbuntel jini i Tsʼijbujel Hebreo, juntiquil ángel i cʼabaʼ Gabriel tsiʼ qʼuele María, juntiquil xchʼoc chumul bʌ ti Galilea am bʌ ti norte, yaʼ ti Nazaret. Gabriel tsiʼ sube María chaʼan mi caj i cʌntan juntiquil alʌl. Jiñʌch juntiquil xchʼoc maxto bʌ piʼlebilic i chaʼan winic, yicʼot chʼujul bʌ i yespíritu Dios tsiʼ yʌqʼue i cʌntan jini alʌl. Ili alʌ chʼiton jiñʌch jini Rey albilix bʌ muʼ bʌ caj i chaʼlen yumʌntel ti pejtelel ora. Dios tsiʼ cʼaxtesʌbe i cuxtʌlel jini cojach bʌ i Yalobil cheʼ bʌ yaʼ chumul yicʼot i Tat ti panchan, tiʼ matriz jini María.

Tsiʼ jacʼʌ ti yutslel i pusicʼal jini María tsaʼ bʌ subenti. Jini cʼajtibilix bʌ i chaʼan, i cʼabaʼ José juntiquil xjucʼ teʼ, tsiʼ pʌyʌ jinto cheʼ tsiʼ choco tilel Dios juntiquil ángel chaʼan miʼ tsictesʌben i sujmlel tiʼ tojlel María. Cheʼ jaʼel, yom cʼajal lac chaʼan jini tsaʼ bʌ ajli chaʼan jini Mesías mi caj i yilan pañimil ti Belén, mach yaʼic ti Nazaret (Miqueas 5:2). ¿Bajcheʼ mi caj i tsʼʌctiyel ili albilix bʌ, cheʼ ñajt an ili tejclum lʌcʼʌl 140 kilómetro (90 millas) yaʼi?

Ti wiʼil, juntiquil romano bʌ yumʌl tsiʼ yʌlʌ chaʼan miʼ tsʼijbuñob i cʼabaʼ yaʼ baʼ chʼoyolob. Ti yʌlol, jini i chaʼañoʼ bʌ José yicʼot María yaʼʌch chʼoyolob ti Belén, jini chaʼan tsaʼ majliyob yaʼ ti tejclum cheʼ lʌcʼʌlix mi caj i yʌcʼ ti pañimil jini alʌl (Lucas 2:3). Jesús tsaʼ yila pañimil ti bucʼujib wacax, yaʼʌch baqui tsiʼ ñolchocoyob. Cheʼ jini, yaʼ ti jamil jini xcʌnta tiñʌmeʼob tsiʼ qʼueleyob junmojt ángelob i tsiʼ subeyob chaʼan tsaʼ ujti i yilan pañimil jini Mesías albilix bʌ, o Cristo.

Yicʼot jaʼel an yañoʼ bʌ winicob xʼixicob tsaʼ bʌ i subuyob chaʼan Jesús jiñʌch jini Mesías albil bʌ. Jini xʼaltʼan Isaías albil i chaʼan, chaʼan tal juntiquil muʼ bʌ caj i chajpan jini bij chaʼan i yeʼtel jini Cristo (Isaías 40:3). Jini winic jiñʌch Juan xʼacʼ Chʼʌmjaʼ. An junyajl, cheʼ tsiʼ qʼuele Jesús, tsiʼ yʌlʌ ti cʼam bʌ tʼan: «¡Awilan, jiñʌch i Tiñʌmeʼ Dios muʼ bʌ i chʼʌm majlel i mul pejtelel pañimil!». Ti ora, yonlel jini muʼ bʌ tsajcañob Juan tsiʼ sutqʼuiyob i bʌ ti xcʌntʼan i chaʼan Jesús. An juntiquil tsaʼ bʌ i yʌlʌ: «Tsac taja lojon jini Mesías» (Juan 1:29, 36, 41).

Pero muʼto caj i tsictiyel jini ñumen ñuc bʌ. Cheʼ bʌ tsaʼix i chʼʌmʌ jaʼ Jesús ti cʼʌb Juan, Jehová tsiʼ waʼchoco cheʼ bajcheʼ Mesías tiʼ tojlel chʼujul bʌ i yespíritu, tsiʼ yʌlʌ: «Jiñʌch Calobil muʼ bʌ j cʼuxbin. Wen utsʼat bʌ mij qʼuel» (Mateo 3:16, 17). ¡Tsaʼix juli jini Mesías albil bʌ!

Pero ¿jalix tsaʼ ujti iliyi? Ti jabil 29 cheʼ tsaʼ tsʼʌctiyi jini jumbajcʼ yicʼot uxpʼejl i joʼcʼal (483) jab tsaʼ bʌ i yʌlʌ jini Daniel. Iliyi jiñʌch lamital bʌ mi yʌcʼ ti cʌjñel Jesús chaʼan jiñʌch jini Mesías. Jini chaʼan, ¿chuqui mi caj i sub cheʼ wʌʼan ila ti Lum?

(Loqʼuem yaʼ ti capítulo 1 cʼʌlʌl ti 3 chaʼan Mateo, jini capítulo 1 chaʼan Marcos, jini capítulo 2 chaʼan Lucas yicʼot jini capítulo 1 chaʼan Juan.)