MBELA Jehova okwa li a kwafela ovanhu va didilike mo Messias omuudanekwa? Heeno, osho a li a ninga. Natu ka taleni kwaasho Jehova a li a ninga po. Omafelemido anhe lwaapo konima eshi Omishangwa dOshiheberi da pwa okushangwa, omukainhu umwe omunyasha wedina Maria oo a li ha kala muNasaret, oshilando osho sha li kolundume laGalilea, okwa li a talelwa po komweengeli noine shi teelela. Omweengeli Gabriel oo a li a talela po Maria okwa li e mu lombwela kutya Kalunga ota ka longifa eenghono daye tadi longo, sha hala okutya, omhepo yaye iyapuki, opo Maria a ninge oufimba ndele ta dala okaana okamati, nonande okwa li okakadona natango. Omonamati oo oye a li ta ka kala Ohamba oyo ya udanekwa, oyo tai ka pangela fiyo alushe. Okaana oko oka li ta ka kala Omona waKalunga, molwaashi Kalunga okwa li ta ka lundululila omwenyo wOmona waye moshidalelo shaMaria okudja meulu.

Maria okwa li a tambula ko nelininipiko oufembanghenda wa tya ngaho. Omuvaleki waye, omuhongi woipilangi, Josef, okwa li e mu hombola konima eshi Kalunga a li e mu tumina omweengeli e mu yelifile kutya Maria okwa li a ninga oufimba molwaashi Kalunga okwa lundululila omwenyo wOmona waye moshidalelo shaye. Ndele mbela ongahelipi shi na sha nexunganeko olo kutya Messias ota ka dalelwa muBetlehem? (Mika 5:1) Betlehem osha li oshilando shinini osho sha li kokule naNasaret eekilometa 140 lwaapo.

Omupangeli umwe waRoma oo a li ta pangele pefimbo olo okwa li a pula ovanhu va valulwe. Ovanhu ova li ve na oku ke lishangifa koilando oko va dalelwa. Osha yela kutya Josef naMaria ova dile kuBetlehem, molwaashi Josef okwa li a ya pamwe nomukulukadi waye omufimba kuBetlehem. (Lukas 2:3) Jesus okwa li a dalelwa moshiunda, ndele ina Maria te mu nangeke metemba lokulila oimuna. Eshi Jesus a dalwa, opa li ovafita ovo va li tava lifa keemhunda. Kalunga okwa li a tuma ongudu yovaengeli kovafita ovo ve ke va shiivifile kutya okaana oko opo ka dalwa oko ta ka ka ninga Messias ile Kristus.

Konima yefimbo, ovanhu vamwe navo okwa li yo tava ka yandja oumbangi kutya Jesus oye a li Messias omuudanekwa. Omuprofeti Jesaja okwa li a udaneka kutya otape ke uya omulumenhu umwe oo ta ka longekidila Messias ondjila opo a wanife po oilonga yaye ya fimanenena. (Jesaja 40:3) Omulumenhu oo okwa li Johannes Omuninginifi. Eshi Johannes a mona Jesus, okwa li a popya a ti: “Tala, Odjona yaKalunga tai kufa po omatimba ounyuni.” Okudja opo vamwe vomovahongwa vaJohannes ova hovela okushikula Jesus nopehe na okwoongaonga. Umwe womovahongwa ovo okwa li a popya a ti: “Otwa mona Messias.” — Johannes 1:29, 36, 41.

Opa li yo vali oumbangi umwe oo tau ulike kutya Jesus oye a li Messias omuudanekwa. Eshi Johannes a ninginifa Jesus, Jehova okwa vaeka Jesus nomhepo iyapuki opo a ninge Messias, ndele ta popi okudja meulu ta ti: “Ou Omona wange omuholike, onde mu hokwa.” (Mateus 3:16, 17) Osho osha ulika kutya Messias oo a li a udanekwa okwa li e uya.

Mbela osho osha li sha ningwa naini? Omomudo 29 O.P., eshi omido 483 odo da xunganekwa kuDaniel da xula. Osho osha li yo oumbangi wa kola oo wa li tau ulike kutya Jesus oye Messias ile Kristus. Ndele mbela okwa li a tumwa kombada yedu a udife etumwalaka la tya ngahelipi?

— Oshileshwa eshi osha kanghamena kuMateus etukulwa lo-1 fiyo eti-3; Markus etukulwa lo-1; Lukas etukulwa eti-2; nosho yo Johannes etukulwa lo-1.