PATHIAN Jehova chuan thutiam Messia hre thei tûrin mite chu a ṭanpui ang em? Ṭanpui dâwn e. Pathian thiltih chu ngaihtuah rawh. A hun chu, Hebrai Pathian Lehkha Thute ziak zawh a nih hnu kum zali vêlah a ni a. Galili ram bial hmâr lama awm Nazaret khawpuiah chuan, Mari tih hmingpu nula pakhat chuan rin loh takin mak tak maia tlawhtu a nei a. Gabriela tih hming pu vântirhkoh pakhat chu a hnênah a inlâr a; Mari chu nula thianghlim a ni chung pawhin Pathian chakna chevêl reng, a thlarau thianghlim chuan nau a paitîr ang a, fapa a hring dâwn tih a hrilh a ni. Chu fapa chu hun rei tak ata a lo tiam tawh Lalber, chatuana rorêltu tûr chu a ni! Ani chu Pathianin vâna a nunna chu Mari chhûla a sawnsak tûr, Pathian Fapa ngei a ni.

Mari chuan chu chanvo ropui tak leh pawimawh tak mai chu inngaitlâwm takin a pawm a. Thingrem siamtu, a pasal hual Josefa chuan Pathian vântirhkohvin Mari naupai chhan a hrilhfiah hnu chuan nupuiah a nei ta a ni. Mahse, Messia chu Bethlehemah a piang ang tih zâwlnei hrilh lâwknate chu engtin nge ni ta ang? (Mika 5:2) Chu khaw tê chu mêl 90 vêl laia hla a ni si a!

Rom lal pakhat chuan chhiarpui neih thu a chhuah a. Mite chuan an pianna khuaa hming an ziak luh a ngai a ni. Josefa leh Mari chu Bethlehem khaw chhuak an ni ngei ang; Josefa chuan a nupui rai ṭeuh tawh chu Bethlehem-ah a hruai a. (Luka 2:3) Mari chuan ran in tlâwm takah chuan nau a nei a, ran chaw pêkna thlêngah chuan a muttîr a. Tichuan, Pathianin vântirhkoh tam tak chu, tlâng panga awm berâm vêngtute hnênah tîrin, nausên lo piang chu thutiam Messia, a nih loh leh Krista a nih thu a hriattîr a ni.

A hnuah, mi dangte pawhin Isua chu thutiam Messia a nihzia an sawi bawk a. Zâwlnei Isaia chuan Messia hna pawimawh tak thawh tûr atân kawng sialtu a awm tûr thu a lo sawi lâwk a ni. (Isaia 40:3) Chu chu Baptistu Johana a ni a. Isua a han hmuh chuan: “En teh u, Pathian Berâm No, khawvêl sual kalpuitu tûr saw!,” tiin a au chhuak a ni. Johana hnungzuitu ṭhenkhat chuan Isua hnung chu an zui nghâl thuai a. An zînga pakhat phei chuan: “Messia kan hmu ta,” a ti hial a ni.—Johana 1:29, 36, 41.

Finfiahna dang pawh a la awm. Johana’n Isua baptisma a chantîr khân, Pathian Jehova ngei chuan vân aṭangin thu a sawi a. Thlarau thianghlim hmanga Isua chu Messia ni tûra ruatin: “Hei hi ka Fapa duh tak, ka lawm êm êma chu a ni,” tiin a sawi a ni. (Matthaia 3:16, 17) Hun rei tak ata lo tiam tawh Messia chu a lo lang ta!

Engtik khân nge Messia a lo lan? C.E. 29, Daniela sawi lâwk kum 483 a tâwp hunah a ni. Chu chu Isua hi Messia, a nih loh leh Krista a nih ngeizia finfiahna chiang tak a ni a. Amaherawhchu, he leia a awm chhûngin eng thu nge a puan chhuah ang?

—Matthaia bung 1-3; Marka bung 1; Luka bung 2; Johana bung 1 a ṭanchhan.