¿UPLA nani Misaya ba ya sapa nahki nu takaia sip kan? Gâd kaina manis win Misaya nahki kabia ba. Mani 400 Hibru Ulbanka nani ulban ningkara, insal kum Gabriel nina mâki ba Meri ra param takan. Naha mairka ba Nasaret tawanka ra iwi kan, naha ba Galili tawanka lamara kan. Meri ba waitna kum wal kau prawras kan, sakuna Gâd spiritka holikira wal kwihra takbia. Meri luhpia waitna ba ban kaia ra king aimaki kabia. Jehova Luhpia ba ai Aisa wal heven ra iwi kan, sakuna Jisas rayaka ba brih Meri plauya ra laki mangkan.

Meri ba Gâd warkka daukaia ba aitani lukan. Meri ba kiamda Josep wal marit takaia kan. Baha mita, insal kum Josep ra win dîa taki kan ba. Sakuna kaina manis dahra aisan kan Misaya ba Betlehem ra aisubi takbia, Nasaret ra lika apia (Maika 5:2). Betlehem ba Nasaret wina 150 kilumita bri kan. Baha mita, dahra aisanka ba, ¿nahki aimakbia?

Roman kingka ba win upla sut aisuban tawanka kat ai nina wih ulbia. Josep Meri wal Betlehem wina kan. Meri ba luhpa baikaia lamara kan, sakuna ai tawanka ra waia kan ai nina ulbaia dukiara (Luk 2:3). Jisas bîp nani watla kum ra aisubi takan; bahara Meri ai luhpia aitnikan. Baha pliska lamara insal daknika kum sepad kum kum ra param taki win Misaya apia kaka Kraist ba aisubi takan.

Upla wala nani sin Jisas Misaya kan tânka marikan. Prapit Aiseya ba win upla kum Misaya yabalka ba ridi daukbia (Aiseya 40:3). Baha waitnika ba Jan Tatahbra kan. Yu kum Jan Jisas ra kaikan taim, win: “Naha waitnika aula na sika Gâd Sîpka Luhpia, naha tasba saurka bri saki ba”. Minitka ra Jan nina blablikra kum kum ba Jisas disaipilka takan. Witin nani tila wina kum aisan: “Yang nani Misaya ba sakri”(Jan 1:29, 36, 41).

Sakuna maisa pakanka kum takaia kan Jisas Misaya kan. Jan Tatahbra Jisas ra tahbi daukan taim, Jehova ai spiritka holikira wal Jisas ra Misaya mangkan. Gâd win: “Naha sika Luhpi laitwankira; witin sika bâk saki briri ba” (Matiu 3:16, 17). ¡Misaya ba pat balan kan!

¿Sakuna Misaya ba ahkia balan? Mani 29 yawan piua ra balan. Baha piua ra Daniel mita aisan kan mani 483 tnata alkan. Naha laki kaikan ba wiria baman sa bara wan marikisa Jisas ba Misaya sa. Sakuna, ¿witin ba upla ra dîa smalkbia ki?

(Matiu sapta 1 wina 3, Mark sapta 1, Luk sapta 2 bara Jan sapta 1 wina sakan sa.)