যেহোবানা ৱাশকপিখ্রবা মশীহ অদু মীয়ামদা শক খংনবা তাকপিগদ্রা? তাকপিগনি। ঈশ্বরনা করি তৌখি হায়বদু খন্থবীয়ু। হিব্রুগী লাইরিকশিং ইবা লোইখিবা চহি ৪০০মুক হৌখ্রে। গালীলগী অৱাং থংবদা নাজরেৎ কৌবা সহর অমা লৈরম্মী। ইখং খংহৌদনা মেরি কৌবি নহা ওইবী নুপী অমগী ময়ুমদা লমলানবা অমা লাক্লম্মী। গাব্রিয়েল কৌবা স্বর্গ দুত অদুনা মেরিদা হায়রম্মী। মদুদি ঈশ্বরনা মহাক্কী মথক্তা থৱায় অশেংবা নত্রগা ঈশ্বরগী তৌবা ঙম্বা শক্তি অদু শিজিন্নগনি। মেরিদু লুহোংদ্রীবি নুপী অমা ওইরম্লবশু মচা নুপা অমা পোক্কনি হায়দুনা স্বর্গ দুত অদুনা হায়রম্মী। মদুগী মচানুপা অদুনা ৱশকপিখ্রবা নিংথৌ অদু ওইরক্কনি অদুগা মহাক্না মতম পুম্বগী ওইনা শাসন তৌগনি। মদুগী অঙাং অদু ঈশ্বর মশামক্কী মচানুপা হায়নসু খংনগনি। ঈশ্বরনা মহাক্কী মচানুপা অদুগী পুন্সি অদু স্বর্গদগী মেরিগী গর্ভদা থংথবীগনি।

মেরিনা মসিগী অরুবা থবক অসি নোল্লুকচনা য়াজখি। মহাক অসি যোসেফ কৌবা উশুবা নুপা অমদা লুহোংনবগীদমক হায়নখ্রবিনি। মেরিনা মতৌ করম্না মীরোল্লক্কে হায়বদু স্বর্গ দুত অদুনা যোসেফতা খংহলম্মী। মসিগী মতুং অদুতদা যোসেফনা মেরিবু লুহোংদুনা লৌরম্মী। অদুবু মশীহ অদু বেৎলেহেমদা পোক্কনি হায়দুনা মাংজৌন্না হায়রম্বগী মতাংদুদি করি ওইগনি? (মীকা ৫:২) মদুগী অপিকপা সহর অদু কিলোমিতর ১৪০ থাপ্পি।

রোমগী লৈঙাকপা অমনা মীকোক থিবগী থবক তৌননবা য়াথং পীরম্মী। মীশিংনা মশা মশাগী পোকফমদা চৎতুনা মীং ইখৎকদৌবনি। যোসেফ অমসুং মেরিগী পোকফম বেৎলেহেমদা ওইরম্বা য়াই। মরম অদুনা যোসেফনা মহাক্কী মীরোল্লবি নুপীবু মফম অদুদা পুরম্মী। (লুক ২:৩) মেরিনা অপিকপা শগোল শঙ অমদা মচা অদু পোকলম্মী অদুগা অঙাং অদু শজিক পীজনবা খুদেংদা থম্লম্মী। মদুগী তুংদা ঈশ্বরনা য়াউ শেনবা কাংলুপ অমদা স্বর্গ দুত ময়াম অমা থারক্লম্মী। স্বর্গ দুতশিং অসিনা য়াউশেন্বশিং অদুদা হায়রম্মী মদুদি পোকপদা ঙাইরিবা অঙাং অদু মশীহ নত্রগা খৃষ্ট হায়বদুনি।

তুংদা অতোপ্পা মীওই কয়া অমনশু যীশু অদু ৱাশকপীরম্বা মশীহ অদুনি হায়বগী প্রমান পীগনি। ঈশ্বরগী পাউ তাকথোকপা যিশাইয়ানা মাংজৌন্না হায়রম্মী মদুদি মশীহনা থোক্লকত্রিঙৈদা নুপা অমনা মহাক্না তৌরগদৌবা থবক অদুগীদমক শেম শাবিগনি। (যিশাইয়া ৪০:৩) মদুগী মীশক অদু বাপ্টাইজ তৌবিবা যোহান্নী। যীশুবু উবা মতমদা মহাক্না হায়রম্মী: “য়েংউ, তাইবংপানগী পাপ পুবিবা ঈশ্বরগী য়াউ মচা!” যোহানগী সেবোক খরদি খুদক্তা যীশুগী তুং ইনবা হৌরক্লম্মী। মখোয়গী মরক্তগী অমনা হায়রম্মী: “ঐখোয়না মশীহ ফংলে।”—যোহান ১:২৯, ৩৬, ৪১.

অতোপ্পা প্রমান অতৈশু লৈরম্মী। যোহান্না যীশুবু বাপটাইজ তৌবা মতমদা যেহোবানা স্বর্গদগী ৱা ঙাংলম্মী। মহাক্কী থৱায় অশেংবগী মপান্না যীশুবু মশীহ ওইনা হাপ্লম্মী। মহাক্না হায়রম্মী: “মহাক ঐগী নুংশিজরবা ইচা নিপানি, মঙোন্দা ঐ য়াম্না পেল্লে।” (মাত্থি ৩:১৬, ১৭) অকোনবদা ৱাশকপিখিবা মশীহ অদু থুংলখ্রে!

মসি করম্বা মতমদা ওইখি? মদু ২৯শুবা খৃষ্টগী মতমদা ওইখি। দানিয়েলনা হায়রম্বগুম্না চপচানা চহি ৪৮৩ লোইখ্রবা মতুংদা ওইখি। হোয়, মসিনা যীশু অসি মশীহ, নত্রগা খৃষ্টনি হায়বগী খ্বাইদগী মরুওইবা প্রমান্নি। তৌইগুম্বশুং খৃষ্টগী মতমদগী পৃথিবী অসিদা করি পাউজেল পীররনি?

​—মাত্থি পন্দুপ ১দগী ৩; মার্ক পন্দুপ ১; লুক পন্দুপ ২; যোহান পন্দুপ ১দা য়ুম্ফম ওইবা।