¿KENIJKATSA ueliskia kimatisej ajkia Mesías? ToTeotsij kichiuaskia ma kimatikaj. Kema panotoya 400 xiuitl kema kiijkuilojkej Escrituras Hebreas, se iluikaejketl tlen itoka Gabriel monextik kampa María, se ichpokatl katli itstoya ika norte tlen Galilea, ne Nazaret altepetl. Gabriel kiiljuik María kipiaskia se konetl. Maske ya amo monamiktijtoya, toTeotsij kichiuaskia ika itetikayo o itonal ma konepia. Ni okichpil eliskia nopa Tlanauatijketl katli kiijtojtoyaj ualaskia uan nochipa tlanauatiskia. ToTeotsij kipanoltiskia iachtouiKone inemilis tlen itstoya iluikak ipan María itlakayo.

María kiselik ika kuali kichiuas nopa kuajkualtsi tlamantli tlen toTeotsij kitlajtlaniyaya. Se kuaxinketl katli itoka José mosiuajtik iuaya, teipa kema toTeotsij kititlanki se iluikaejketl ma kiiljuiti tlen panotoya. Ma tikilnamikikaj kiijtojtoyaj Mesías tlakatiskia ne Belén, amo Nazaret (Miqueas 5:2). ¿Kenijkatsa moaxitiskiaj, tlaj nopa altepetl eltoya nechka 150 kilómetros iuejkaka?

Teipa, se tlanauatijketl romaejketl tlanauatik ma kinamaijkuilokaj, uan nochi monekiyaya moamaijkuilotij kampa euayayaj. Uelis José uan María ininchampoyouaj euayayaj Belén, yeka yajkej maske María ya nechka konepiaskia (Lucas 2:3). Jesús tlakatki ipan se xajkali, uan kitejkej san kampa tlakuaj tlapialmej. Uajka nopaya nechka kampa itstoyaj se keskij tlapialmokuitlauianij toTeotsij kintitlanki miakej iluikaeuanij ma kiniljuitij ya tlakajtoya Mesías o Cristo.

Sekinok no kiijtoskiaj Jesús yaya Mesías katli ualaskia. Nopa tlajtolpanextijketl Isaías kiijtojtoya se tlakatl peuaskia tepouilis tlen Cristo iteki katli tlauel moneki (Isaías 40:3). Ni kichijki Juan teAtsonpoliuiltijketl. Se tonali, kema kiitak Jesús, kiijtok: “Yajaya itoka ipilBorregojtsi toTeko pampa elis nopa tlakajkaualistli tlen techkixtilis nochi totlajtlakoljuaj nochi titlakamej ipan ni Tlaltipaktli” Uajka, miakej katli kitokiliyayaj Juan mochijkej Jesús itokilijkauaj. Se kiijtok: “Tijpantijkej nopa Mesías” (Juan 1:29, 36, 41).

Seyok, katli tlauel temachtli nojkia kiijtok. Kema Juan kiatsonpoliuiltik Jesús, Jehová kitokaxtlalik Mesías ika itonal uan kiijtok: “Ya ni Nokone tlen nikiknelia. Nipaki miak ika tlen kichiua” (Mateo 3:16, 17). Uajka, ¡ya asitoya Mesías katli kiijtojtoyaj!

Uan, ¿kema panok ni? Ipan xiuitl 29, kema moaxitik nopa 483 xiuitl tlen kiijtok Daniel. Onka miak tlamantli katli kinextia Jesús yaya Mesías, nikaj tikitakej san se keski. Uan, ¿tlake tlajtoli kimoyauaskia ipan Tlaltipaktli?

(Mokixtijtok ipan Mateo capítulo 1 uan tlami ipan 3, Marcos capítulo 1, Lucas capítulo 2 uan Juan capítulo 1.)