MBELA Jehova okwa li ta ka kwathela aantu ya dhimbulule mo Mesiasa ngoka u uvanekwa? Eeno. Tala kwaashono Kalunga a li a ningi po. Omathelemimvo gane lwaampono konima sho Omanyolo gOshihebeli ga li ga pu okunyolwa. Omukiintu omugundjuka gwedhina Maria ngoka a li a kala muNasaret, oshilando shoka sha li kuumbangalantu waGalilea, okwa li a talelwa po komuyengeli inee shi tegelela. Omuyengeli gwedhina Gabriel okwa li e mu holokele nokwe mu lombwele kutya Kalunga ota ka longitha oonkondo dhe tadhi longo, sha hala okutya, ombepo ye ondjapuki, opo yi mu ningithe etegelelo a mone okanona okamati, nonando ka li a monathana nomulumentu. Okamati haka oka li taka ka ninga Omukwaniilwa ngoka a li u uvanekwa, ngoka ta ka pangela sigo aluhe. Okanona hano otaka ka kala okanona kaKalunga hoka Kalunga ta ka lundululila omwenyo gwako moshivalelo shaMaria okuza megulu.

Maria okwa taamba ko neifupipiko oshinakugwanithwa shika sha simana. Omuyaleki gwe Josef ngoka a li omuhongi gwiipilangi okwa li e mu hokana konima sho Kalunga a li e mu tumine omuyengeli e mu yelithile kutya Maria okwa ningi etegelelo sho Kalunga a lundululile omwenyo gwOmwana moshivalelo she. Mbela ongiini nee kombinga yehunganeko ndyoka tali ti kutya Mesiasa ota ka valelwa muBetlehem? (Mika 5:2) Omukunda ngoka ogwa li omushona pu na oshinano shookilometa 140 lwaampoka okuza muNasaret.

Omupangeli gwaRoma okwa li a gandja elombwelo kutya aantu naya yalulwe. Kehe omuntu okwa li e na oku ki inyolitha koshilando shaandjawo hoka a valelwa. Molwaashoka Josef naMaria oya zile kuBetlehem, Josef okwa li e na okuya nomukulukadhi gwe ngoka a li metegelelo kuBetlehem. (Lukas 2:3) Maria okwa li a monene okanona moshigunda shiimuna nokwe ka langeke metemba lyokulila iimuna. Sho Jesus a valwa aasita yamwe oya adhika taya litha iimuna yawo kiikulundundu. Kalunga okwa li a tumu ongundu yaayengeli ya lombwele aasita yiimuna mboka kutya okanona hoka opo ka valwa oko taka ka kala Mesiasa nenge Kristus omuuvanekwa.

Konima yaashono, yalwe nayo oya ka gandja uunzapo kutya Jesus oye a li Mesiasa omuuvanekwa. Omupolofeti Jesaja okwa li a hunganeke kutya opwa li tapu ke ya omulumentu ngoka a li ta ka longekidhile Mesiasa ondjila opo a gwanithe po iilonga ye ya simana. (Jesaja 40:3) Omulumentu ngoka okwa li Johannes Omuninginithi. Sho a mono Jesus, okwi igidha a ti: “Tala, Onzigona yaKalunga, tayi kutha po oondjo dhuuyuni.” Mbalambala yamwe yomaalongwa yaJohannes oya landula Jesus. Gumwe gwomuyo okwa ti: “Otse otwa mono Kristus nokutya omugwayekwa.”—Johannes 1:29, 36, 41.

Opwa li wo pu na uuyelele wa gwedhwa po tawu ulike kutya Jesus oye a li Mesiasa. Sho Johannes a ninginitha Jesus, Jehova okwa gwayeke Jesus nombepo ondjapuki opo a ninge Mesiasa e ta popi okuza megulu a ti: “Nguka oye Omumwandje omuholike nde mu hokwa.” (Mateus 3:16, 17) Shika osha li shu ulike kutya Mesiasa ngoka a li u uvanekwa nale okwa thika.

Mbela uunake shika sha li sha ningwa? Omo 29 E.N., sho owala oomvula 483 ndhoka dha li dha hunganekwa kuDaniel dha hulu po. Eeno, shika osha li wo sha gandja uuyelele wa gwedhwa po kutya Jesus oye Mesiasa nenge Kristus. Mbela etumwalaka lini a li te ku uvitha pethimbo lyokukala kwe kombanda yevi?

—Uuyelele moshitopolwa shika owa kankamena kuMateus ontopolwa 1 sigo 3, Markus ontopolwa 1; Lukas ontopolwa 2; Johannes ontopolwa 1.