FAOSATÖ 16
Tohare Mesia
I’ombakha’ö Yehowa wa Yesu si otarai Nazareta, Mesia si no ara ifabu’u
HADIA ibe’e wanolo Yehowa ba niha ena’ö la’ila Mesia si no ifabu’u andrö? Ibe’e. Faigi atö hadia nifalua Lowalangi. Alua ia me arakhagö 400 fakhe me no awai lasura Gamabu’ula Li Si Föföna. Ba mbanua sotöi Nazareta, tanö ba gaekhula ba mbanua Galilaia, so samösa nono alawe sotöi Maria, so zangondrasi ya’ia ba zi lö idöna-döna. Samösa mala’ika sotöi Gaberieli i’ombakha’ö khönia wa mo’ono dania ia ono matua moroi ba wa’abölö geheha Lowalangi, hewa’ae lö sangowalu ia nasa. Ononia andrö dania tobali Razo si no ara tefabu’u, ba samatörö si lö aetu! Ono Lowalangi Nono andre, nifawu’ania moroi ba zorugo bakha ba dalu Maria.
Fao fangide-ngide’ö, lö fatimba ba dödö Maria niwa’ö mala’ika andrö. So matuania sotöi Yosefo tuka geu, ihalö Maria me no aefa i’ombakha’ö khönia mala’ika hadia mbörö wa manabina Maria. Hewisa ena’ö alua zi no tefa’ele’ö wa ba Mbetilekhema tumbu Mesia? (Mikha 5:1) Fa’aröu mbanua andrö 140 kilo!
Ibe’e goroisa razo Roma ena’ö lafasura’ö döira ba mbanuara zamösana. Betilekhema mbanua Yosefo ba Maria, ba da’ö i’ohe wo’omonia sanabina. (Luka 2:3) Tumbu nono Maria ba gandra nono mbiri-biri, ifeförö yawa ba luha. Aefa da’ö, ifatenge mala’ikania Lowalangi ba wangombakha khö ndra kubalo si so ba gahe hili wa ono si tumbu andrö ya’ia da’ö Mesia, mazui Keriso, si no ifabu’u.
Ba gafuriata, niha tanö bö’ö göi lafaduhu’ö wa Yesu andrö Mesia si no lafabu’u. No ifa’ele’ö Yesaya wa so samösa ndra matua si tobali sangehaogö lala khö Mesia dania. (Yesaya 40:3) Sangehao lala andrö ya’ia da’ö Yohane Samayagö Idanö. Me awena i’ila Yesu, mu’ao ia, ”Hiza nono mbiri-biri andrö khö Lowalangi, sangeheta horö nösi gulidanö!” So ösa nifaha’ö Yohane zolo’ö Yesu. So ba gotaluara zanguma’ö, ”No masöndra Mesia.”—Yohane 1:29, 36, 42.
So gangilata tanö bö’ö nasa. Me ibayagö idanö Yesu Yohane, muhede Yehowa moroi ba zorugo. Ibayoini Yesu faoma eheha ni’amoni’ö ena’ö tobali Mesia, imane, ”Onogu da’ö, ono omasi’ö, wa’omasigu.” (Matai’o 3:16, 17) Tohare Mesia si no ara ifabu’u!
Hamega alua da’ö? Ba ndröfi 29 M, tefaudu ba ndröfi 483 simane nifa’ele’ö Danieli. Da’ö sambua dandra wa tola faduhu dödöda wa Yesu andrö Mesia, ma Keriso. Hadia manö duria ni’ohenia ba niha sagötö fe’asonia ba gulidanö?
—Te’odane-dane ba Matai’o faza 1 irugi 3; Mareko faza 1; Luka faza 2; Yohane faza 1.
Te Göi Adöni Dödöu
MI’OHIA’Ö WAMATIRA
Ihalö Maria ’Gangetula ba Dödönia’
Salua khö Maria ba Mbetilekhema da’ö zanga’aro’ö famatinia ba nifabu’u Yehowa.
MI’OHIA’Ö WAMATIRA
Yosefo Zolumö’ö, Sanga’asogö, Lö Awuwu Ia
Hadia nifalua Yosefo ba wolumö’ö ösi nomonia? Hana wa i’ohe Maria hegöi Yesu ba Miserai?
