MESÁÍYAH átʼínígíísh, Jiihóvah éí diné yił ííshjání íidoolííł? Aooʼ. Kodóó łaʼ dadíníilʼįįł. Éí 400 dóó baʼaan nááhai Hííbrewjí Diyin Bizaad ałtso bikʼedaʼaschı̨́ı̨́dóó bikʼijįʼ kóhóótʼįįd. Názarethgi chʼikę́ę́h léiʼ Mary wolyéego, níłchʼi naalʼaʼí Géíbriyel wolyéego haa níyáago bikʼee jideesyiz. Áko ábíłní; God éí biníłchʼi diyinii bee adíʼníiltsąąłgo ashkii dííłchííł. Ákondi Mary éí diné tʼah doo łaʼ baa níjítʼįįh da. Díí hayáázh éí Naatʼáanii bee haʼoodzííʼ yę́ę átʼı̨́, éí hoolʼáágóó hooʼáał doo! Díí awééʼ éí God biYeʼ, háálá biníłchʼi diyinii yee beʼiinaʼ yáʼąąshdę́ę́ʼ Mary biishchʼid góneʼ niidoołtééł.

Mary éí díí hąąh niilyáhígíí hoł yáʼíítʼééh. Éí hahastiin dooleełii Jóseph, éí God bá naalʼaʼí łaʼ kóbíłní. God biyeʼ bibee iinaʼ, Mary biishchʼid góneʼ niiníłtı̨́. Jóseph éí Mary yizyeh. Ákoshąʼ Mesáíyah éí Béthlehemgi bidiʼdoochííł haʼníigo tʼáá bítséedi baa hóóneʼ yę́ę? (Micah 5:2) Éí yeeʼ, Názarethdóó Béthlehemjįʼ ayóó ánízáád!

Roman binaatʼáanii, éí diné yídóolta níigo yee nihoníʼą́. Áko diné éí kéyah biiʼ dabiʼdizhchı̨́įgi dabízhiʼ naaltsoos biiʼ daasdzoh. Jóseph dóó Mary éí Béthlehemdę́ę́ʼ nijiʼaash, áko Jóseph éí beʼasdzą́ą́ yiltsánígíí ákǫ́ǫ́ bił níjítʼáázh. (Luke 2:3) Mary éí alı̨́ı̨́ʼ dabighan góneʼ ajishchı̨́, awééʼ éí alı̨́ı̨́ʼ yiiʼ daʼałchozhígíí biih jííłtı̨́. God éí bá ndaalʼaʼí, ndaʼniłkaadii léiʼ yichʼįʼ ayííłʼaʼgo díí bee bił dahodoołnih yiłní. Díí awééʼ éí Mesáíyah bee haʼoodzííʼ yę́ę átʼı̨́, éí Christ ałdóʼ wolyé.

Tʼahádóó łaʼ ádaaní, Jesus éí Mesáíyah bee haʼoodzííʼ yę́ę átʼı̨́. Azáíyah ání hastiin léiʼ doogáałgo Mesáíyah naanish íidoolíłígíí bílą́ąjįʼ yá hashtʼe hodidoolííł. (Isaiah 40:3) Éí John Taah Iiníiłii wolyéh. John éí Jesus jiiłtsą́ągo ájiní: “Diyin God biDibé Yázhí jílíinii dahonółʼı̨́, éí nihokááʼ dineʼé bibąąhági átʼéii yóóʼiidiiʼaahii jílı̨́!” Áko John bídahoołʼaahii łaʼ tʼáá ákǫ́ǫ́ Jesus yikééʼ dah diikai. Łaʼ éí kóní: “Mesáíyah bikʼíniitʼáázh.”​—John 1:29, 36, 41.

Náá ałdóʼ łaʼ kóní. Jesus éí John tó yiih hóółtı̨́, áádóó Jiihóvah yáʼąąshiidę́ę́ʼ haadzííʼ. Jesus éí níłchʼi diyinii bee hakʼihodiiniiʼgo Mesáíyah áhoʼdiilyaa. Áádóó Jiihóvah ání “Díí shiyeʼ ayóóʼóóshʼníinii jílı̨́, tʼáá íiyisí hąą shił hózhǫ́.”(Matthew 3:16, 17) Tʼáá níléídę́ę́ʼ Mesáíyah bee haʼoodzííʼ yę́ę níyá!

Díísh éí hádą́ą́ʼ áhóótʼįįd? Éí 29 C.E. yihah yę́ędą́ą́ʼ, tsʼídá 483jįʼ nídoohah níigo Daniel yaa chʼíhoníʼánę́ęjįʼ ádzaa. Díí éí tʼáadoo bahatʼaadí Jesus éí Mesáíyah, doodaiiʼ Christ ájítʼı̨́. Áko nahasdzáán bikááʼ nijigháago éí haʼátʼíí baa nahojilneʼ doo?

​—Naaltsoos Matthew wóltaʼii 1dóó 3jįʼ; Mark wóltaʼii 1gi; Luke wóltaʼii 2gi; John wóltaʼii 1gi biiʼ baa haneʼ.