¿IMAYNATAM runakuna Mesiasta reqsinmanku karqa? Kikin Diosmi reqsichinan karqa. Hebreo rimaypi Diospa Palabran qellqakusqanmanta 400 wata pasaruptinmi, Gabriel sutiyoq angel rikuriykurqa Maria sutiyoq sipasman, payqa yacharqa Galilea law Nazaret llaqtapim. Angelmi Mariata nirqa wawayoq kananmanta. Payqa doncella kaspanpas, Diospa atiyninwanmi otaq chuya espiritunwanmi wiksayakunan karqa. Chay wawam wiñay kamachinanpaq prometesqa Rey kanan karqa. Arí, Diosmi paywan yachaq piwi Churinpa vidanta Mariapa wiksanman churanan karqa.

Mariaqa humillakuspam chay sumaq rurayta chaskirqa. Paywan casarakunanpaqña Josey sutiyoq carpinterom, Diospa angelnin tukuy pasasqanmanta willaptin Mariawan casarakurqa. Yuyarisuntaq, ñam willasqaña karqa Mesias Belenpi nacenanta, manam Nazaretpichu (Miqueas 5:2). ¿Imaynam chay cumplikunman karqa Nazaretmanta Belenkamaqa yaqa 140 kilometro kachkaptinqa?

Chay punchawkunapim Roma nacionniyoq kamachiq nirqa lliw runakuna may nacesqankupi padronachikunankupaq. Mariapawan Joseypa familianqa Belenmantam karqaku, chaymi Belenman rirqaku, Maria onqokunanpaq pisi tiempollaña kachkaptinpas (Lucas 2:3). Jesusmi nacerqa animalkunapa kasqanpi, chaymi animalkunapa mikunan artesapi siriykachirqaku. Hinaptinmi hichpallankupi kaq michiqkunaman achka angelkuna rikuriykuspa willarqaku prometesqa Mesias otaq Cristo nacerusqanta.

Huk runakunapas qawachirqakum Jesus prometesqa Mesias kasqanta. Isaiasmi willakurqaña, Diospa munayninta Cristo rurananpaq huk runa ñanta alistananmanta (Isaias 40:3). Chay runam Bautizaq Juan karqa. Jesusta rikuruspanmi pay nirqa: “Qawaychik, paymi Diosmanta Hamuq Carneroqa, wañuspanmi runakunapa huchanta pampachanqa”, nispa. Chayllam Juanpa achka qatiqninkuna Jesuspa discipulonkunaña karqaku. Hukninmi nirqa: “Mesiastam tariramuniku”, nispa (Juan 1:29, 36, 41).

Ichaqa karqataqmi huk hatun pruebapas. Jesusta Juan bautizaruptinmi, Jehová Dios chuya espiritunwan Mesias kananpaq akllaspan nirqa: “Paymi kuyasqay Churiy. Payraykum kusisqa kachkani”, nispa (Mateo 3:16, 17). ¡Prometesqa Mesiasmá chayaramurqa!

¿Haykapitaq chay pasakurqa? Cristianokunapa tiemponpi 29 watapim, Danielpa willaskusqanman hina 483 watakuna cumplikuruptin. Kaykunaqa Mesias kasqanta qawachiq wakin pruebakunallam. Hinaptinqa ¿imamantam willakunan karqa kay Pachapi kachkaspanqa?

(Mateo 1-3; Marcos 1; Lucas 2; Juan 1.)