PISI 16
A Mesias e doro
Yehovah e meki sma kon sabi taki Yesus fu Nasaret, na a Mesias di a ben pramisi langa ten kaba
YEHOVAH ben o yepi sma fu kon sabi suma na a Mesias di a ben pramisi? Iya, luku san Gado ben du. A ben de sowan fo hondro yari baka di sma ben kaba skrifi den Hebrew Buku fu Bijbel. Na ini wan foto di nen Nasaret, na a kontren na a noordsei fu Galilea, wan spesrutu fisitiman go na wan yongu uma di nen Maria. Wan engel di nen Gabrièl go na en èn a taigi en taki Gado o gebroiki en krakti, noso en santa yeye fu meki a kisi wan manpikin. Disi ben o pasa aladi Maria ben de wan nyunwenke ete. A manpikin disi ben o tron a Kownu di Gado ben pramisi langa ten kaba. Iya, a ben o tron a sma di ben o tiri fu têgo! A pikin disi ben o de Gado en eigi Manpikin. Gado ben o teki a libi fu en na ini hemel èn poti en na ini a bere fu Maria.
Na wan sakafasi Maria teki a tumusi bigi grani disi. Yosef, di ben de wan temreman, ben meki mofo nanga Maria. Gado seni wan engel fu taigi Yosef taki Maria kon de nanga bere, fu di Gado poti a libi fu en Manpikin na ini Maria bere. Baka dati, Yosef trow nanga Maria. Ma fa a de nanga a profeititori di e taki dati a Mesias ben o gebore na ini Betlehem? (Mika 5:2) A pikin foto dati ben de sowan 140 kilometer fu Nasaret, èn dati ben de moi fara!
Wan tiriman fu Rome ben gi a komando fu teri den sma fu a kondre. Den sma ben musu go skrifi den nen na ini lantibuku na a foto pe den gebore. Soleki fa a sori, dan den famiri fu Yosef nanga Maria ben de fu Betlehem. Fu dati ede, Yosef teki en wefi di ben de nanga bere, èn den go drape (Lukas 2:3). Maria meki a pikin na ini wan presi pe meti e tan, èn baka dati a poti en didon na ini wan nyanyan-baki fu den meti. Baka dati, Gado seni wan engel fu go taigi wan grupu skapuman di ben de na sei wan pikin bergi, taki a pikin di gebore didyonsro na a pramisi Mesias, noso Krestes.
Bakaten, tra sma sosrefi ben o sori krin taki Yesus na a pramisi Mesias. A profeiti Yesaya ben taki na fesi taki wan man ben o kon di ben o sreka a pasi gi a tumusi prenspari wroko fu a Mesias (Yesaya 40:3). A man dati ben de Yohanes a Dopuman. Di Yohanes si a man Yesus, a bari taki: „Luku! A Pikin Skapu fu Gado di e puru a sondu fu grontapu!” Wantewante sonwan fu den disipel fu Yohanes bigin waka baka Yesus. Wan fu den ben taki: „Wi feni a Mesias.”
Tra buweisi ben de taki Yesus na a Mesias. Di Yohanes dopu Yesus, dan Yehovah srefi taki komoto fu hemel. Nanga yepi fu a santa yeye, a salfu Yesus leki a Mesias, èn a taki: „Disi na mi Manpikin, a lobiwan di mi feni bun” (Mateyus 3:16, 17). A Mesias di Gado ben pramisi langa ten kaba, ben doro!
O ten dati ben pasa? Na ini a yari 29, leti na a kaba fu den 483 yari di Danièl ben taki fu den na fesi. Iya, dati na wan fu den krin buweisi di e sori taki Yesus na a Mesias, noso Krestes. Ma sortu boskopu a ben o meki bekènti na a ten di a ben de na grontapu?
Kande yu lobi den tori disi tu
TEKI NA EKSEMPRE FU SMA DI BEN ABI BRIBI
Maria—A ben „aksi ensrefi san den sani disi ben wani taki”
Den sani di Maria ondrofeni na Betlehem tranga en bribi na ini den pramisi fu Yehovah.
TEKI NA EKSEMPRE FU SMA DI BEN ABI BRIBI
Yosef—A kibri den, a sorgu den, èn a horidoro
Na sortu fasi Yosef kibri en osofamiri? Fu san ede a teki Maria nanga Yesus tyari go na Egepte?
A WAKTITOREN
Gado e seti sani fu frulusu libisma
San a Mesias abi fu du nanga a sani di Gado ben pramisi Abraham? Kon sabi fa Gado o fri libisma fu siki, pina nanga dede.
