¿CAM ʼeetec na shiỹaxauapi ishet ỹaỹaten so Mesías? Ñi Dios ỹataqta ỹachaxanapec so maye. Quera cuatrocientos viʼi na mashe leraxanaxac aye Escrituras Hebreas, na lamaxashec ñi Dios lʼenaxat Gabriel yoʼoq aso María. Ara maye huoʼo lauoʼ huetalec paʼaigue ra shiʼu na Galilea ye Nazaret. So Gabriel iaʼaxat aso María, aso maye hualaxai. Qamaleʼ aso maye saronaxanaxangueta, nache ỹataqta Ñi Dios rogoxona so espíritu santo yaqto ỹanoigui ana lcoʼoxoqui aye María, na lcaalaxa lʼauaxanec llalec. Nache seʼeso noxotolec ntaʼa, qataq na lʼonataxanaxac ñi maye, huoʼo qaica ca logaʼt.

Aso María ỹalaxaguet reʼera ỹataqta ltaraic namaxasoxonaxaco. Aso maye huoʼo nauonaxaua lʼenaxat José, so maye ʼepaq lʼo. Nache Ñi Dios ỹanem na lamaxashec piguem lʼec yaqto iʼaxattegue ye José, reʼera aloic. Ra ntoueetaʼac, coʼollaxa iaʼaxat na so Mesías lañoqoʼ huetalec ye Belén, qalaq sa ishet ye Nazaret (Miqueas 5:2). Nache ¿taenʼco ipacchigui reʼera lʼaqtac, ra soua pueblopi iỹoracachi na 140 kilómetros (27 leguas)?

Qaq seʼesoua naʼaxaʼte, nache so nataxala ỹan so lʼaqtac ra ʼenauac na shiỹaxauapi qaỹireuo na lʼenaxatpi ra qanaloqnaʼt, huetaña ye aʼlhua chigoqchiguiña. So José qataq aso María chigoqchiguiña ye Belén nache mashe jec reʼera pueblo, quenaxa ipacchigui ra coʼollaq mashe ivita so laloqoʼ ra recoʼo aso María (Lucas 2:3). Nache so Jesús chigoqchiguiña huetalec ye lquiʼaxaqui nlo shiguiỹacpi. Huetalec sa qaỹapeque nʼonaxa lỹa, so lamaxashec piguem lʼec ñi Dios, iaʼaxateec ñii aloʼogue ana qaguetapi, na chigoqchiguiña so Mesías, taqaʼen qaỹamataʼac so Cristo.

Taqaʼen huoʼo ca shiỹaxauapi lỹa na ỹachaxanapec so Jesús ỹataqta so Mesías. Na raʼaqtaxanapec so Isaías coʼollaxa iaʼaxat, huoʼo shiỹaxaua ỹauoʼo na nqaic yaqto ca lʼonatac ye Cristo (Isaías 40:3). Reʼera shiỹaxaua qaỹamataʼac Juan so nachilaxanataxanaq. Huoʼo naʼaq so maye ilaʼaguet ye Jesús ʼenapecoʼ: “Ña qauloỹa, ʼena chaʼaguet na qagueta llalec maye chigoqoʼot ñi Dios, nam nqat qomeʼ ʼenauac na nasouaxashetpi ana aʼlhua”. Huoʼo qalota nam quetagueʼpi so Juan, nache ỹoʼot nam quetagueʼpi so Jesús. Nache ʼonolec ra mayepi ʼenapec: “Qomiʼ ñauanaxaiʼ ñim qoỹiitega Mesías” (Juan 1:29, 36, 41 DNS).

Qalaq na ltaraic lʼaqtac iaʼaxat Ñi Jehová. Quenaxa ra nachilaxanataguec so Jesús, nache Ñi Jehová ʼenapec: “ʼEra ra ỹalamaxat llalec maye ỹauotaxat. Ra maye ỹataqta ñitootapeguec” (Mateo 3:16, 17 DNS). Sa ishet lqolguetaxanaxac: ¡chaxan lagui lviraxaqui so Mesías!

Qalaq ¿lagui ipactegue reʼera? Ipactegue huetaña ye 29 viʼi. Nache mashe ivita so laloqoʼ ipacchigui nam cuatrocientos ochenta qataq tres viʼi, ca coʼollaxa iaʼaxat so Daniel. ʼEnauac reʼera ỹachaxanapec so Jesús ỹataqta so Mesías. Qalaq nalʼena so maye huetalec ana aʼlhua ¿qanegueʼt ra lʼaqtaxanaxac?

(Qaỹachigoxotaña ye Mateo, capítulopi 1-3; Marcos, capítulo 1; Lucas, capítulo 2; Juan, capítulo 1.)