BUBULIGAN ba ni Jehova an mga tawo nga makilala an iginsaad nga Mesias? Oo. Tagda an Iya ginbuhat. Mga upat ka siglo an naglabay tikang matapos an Hebreo nga Kasuratan, ha syudad han Nasaret, ha norte han Galilea, usa nga batan-on nga daraga nga hi Maria an diri ginlalaoman nga ginbisita hin anghel nga hi Gabriel. An anghel nagsiring ha iya nga gagamiton han Dios an Iya aktibo nga pwersa, o baraan nga espiritu, basi manamkon ngan mag-anak hiya hin lalaki, bisan kon birhen hiya. Ini nga bata amo an maiha na nga iginsaad nga Hadi, an magmamando ha waray kataposan! Ngan, hiya an magigin Anak han Dios mismo, nga an kinabuhi ibabalhin han Dios tikang ha langit ngadto ha tagoangkan ni Maria.

Mapainubsanon nga ginkarawat ni Maria iton importante nga toka. Ginpakaslan hiya ni Jose, an iya uyab nga panday, katapos isumat hin anghel han Dios an tinuod nga hinungdan han iya pagburod. Kondi, nahitabo ba an tagna nga an Mesias matatawo ha Betlehem? (Mika 5:2) Iton gutiay nga bungto mga 140 kilometro an kahirayo tikang ha Nasaret.

Hito nga panahon, usa nga Romano nga magmarando an nagsugo hin pagsensus, salit sadang hira magparehistro ha ira bungto nga natawhan. Hira Jose ngan Maria pariho taga-Betlehem, tungod hito kinahanglan hira kumadto. (Lukas 2:3) Salit didto, nag-anak hi Maria ha kwadra ngan ha balalong iginbutang an minasus-an. Katapos, ginsugo han Dios an damu hinduro nga anghel ha pagsumat hin grupo han magbarantay hin karnero ha usa nga bakilid nga an katatawo pa la nga bata amo an iginsaad nga Mesias, o Kristo.

Ha urhi, ginpamatud-an liwat han iba nga hi Jesus an iginsaad nga Mesias. Igintagna ni propeta Isaias nga may mag-aandam han dalan para ha importante nga buruhaton han Mesias. (Isaias 40:3) Ito amo hi Juan nga Parabaptis. Han hinkit-an niya hi Jesus, hiya nagsiring: “Kitaa, an Karnero han Dios nga nagkukuha han mga sala han kalibotan.” Hito nga takna, an pipira nga disipulo ni Juan sinunod dayon kan Jesus. Usa ha ira an nagsiring: “Amon hin-agian an Mesias.”​—Juan 1:29, 36, 41.

Dugang pa nga napamatud-an nga hi Jesus an Mesias han nagyakan mismo hi Jehova tikang ha langit han bawtismohan hiya ni Juan. Pinaagi han baraan nga espiritu, Iya gindihogan hi Jesus sugad nga an Mesias ngan siniring: “Ini amo an akon hinigugma nga Anak, nga akon nalilipayan.” (Mateo 3:16, 17) Inabot na an Mesias nga maiha na nga iginsaad!

Kakan-o ito nahitabo? Han tuig 29 K.P., ha panahon nga natapos gud an 483 ka tuig nga igintagna ni Daniel. Oo, bahin ito han diri maninigaran nga ebidensya nga hi Jesus an Mesias, o Kristo. Kondi, ano an mensahe nga iya ipapasamwak dinhi ha tuna?

​—Iginbasar ha Mateo kapitulo 1 tubtob 3; Markos kapitulo 1; Lukas kapitulo 2; Juan kapitulo 1.