ANA Yehofa ŵakamucisye ŵandu kuti ammanyilile Masiya juŵamlocesye? Elo. Kwende tulole yiŵatesile Mlungu. Yaliji yili yipite yaka 400 cimalicisye kulemba Malemba Gacihebeli. Mwali jwine lina lyakwe Maliya (Maliyamu), juŵatamaga mu msinda wa Nasaleti, ku upande wa kumpoto kwa Galilaya, ŵapocele mlendo jwakusimonjesya. Mlendoju ŵaliji lilayika lina lyakwe Gabuliyele, lilyam’wonecele ni kumsalila kuti, atamose kuti jwalakwejo ŵaliji mwali, Mlungu cakamulicisye masengo macili gakwe, gagali msimu wakwe weswela kuti Maliyajo akole msigo ni kuŵeleka mwanace jwamlume. Mwanaceju ŵaliji jwakuti caciŵa Mwenye juŵamlocesye kala, soni caciŵa mkulamulila kwa ndaŵi jangamala! Mwanaceju ŵalijisoni jwakuti caciŵa mwanace jwa Mlungu. Mlungu cacigamba kusamisya umi wa mwanacejo kutyoka kwinani kwawula m’citumbo ca Maliya.

Maliya mwakulinandiya ŵakundile kuti yindu yakusosekwayi yimtendecele. Kalipentala jwine lina lyakwe Yusufu, juŵaliji pa uganja ni Maliya ŵamlombile jwamkongweju, Mlungu paŵatumisye lilayika ni kumsalila cenene cacatendekasisye Maliya kuti akole msigo. Ana nambi wuli pakwamba ya kulocesya kwakuti Masiya ŵaliji jwakuti cacipagwila mu Betelehemu? (Mika 5:2) Katawuni keleka kaliji pa lutando lwakwana makilomita 140 kutyocela ku Nasaleti!

Jwakulamulila jwa Ciloma ŵalamwile kuti aŵalanje ŵandu wosope, ni ŵanduwo ŵasosekwaga kuja kulembesya mena gawo ku tawuni jiŵapagwile. Yikuwoneka kuti Yusufu ni Maliya wosope kumangwawo kwaliji ku Betelehemu. Ni Yusufu ŵapite kweleko yimpepe ni ŵamkwakwe ŵaŵakwete msigo. (Luka 2:3) Maliya ŵaŵelecele mwicinga ni ŵaligonece likandilyo mwakulila yilango. Kaneko Mlungu ŵagatumisye malayika gejinji kuti alisalile likuga lya ŵakucinga ngondolo lilyaliji mu ngulugulu litumbi kuti mwanace juŵapagwilejo ŵaliji Masiya, kapena kuti Klistu juŵamlocesye kala.

Panyuma pakwe ŵanesoni ŵaŵecete yakusimicisya kuti Yesu (Isa) ŵaliji Masiya juŵamlocesye jula. Jwakulocesya Yesaya ŵalocesye kuti pacipagwa mundu jwine jucacilinganya litala pamasengo gakusosekwa ga Masiya. (Yesaya 40:3) Jwakulinganya litalaju ŵaliji Yohane M’batisa. Jwalakwe paŵam’weni Yesu, ŵagumisile ni maloŵe gakuti: “Mlole, Mwana ngondolo jwa Mlungu, jwakutyosa ulemwa wa ŵandu ŵa pacilambo cosope capasi!” Ŵakulijiganya ŵane ŵa Yohane ndaŵi jijojo ŵatandite kumkuya Yesu. Jwakulijiganya jwine ŵaŵecete kuti: “Tumsimene Masiya.”—Yohane 1:29, 36, 41.

Wapalisoni umboni wine. Yohane paŵam’batisyaga Yesu, Yehofa msyene ŵaŵecete kutyocela kwinani. Mwa msimu weswela, Yehofa ŵamsagwile Yesu kuŵa Masiya, ni ŵaŵecete kuti: “Jweleju nijo Mwanangu jwele jungumnonyela, ngusanonyelwa najo mnope.” (Matayo 3:16, 17) Sambano yaliji yakuti Masiya juŵamlocesye jula ŵaliji akopocele!

Ana yeleyi yatendece cakaci? Yatendece m’caka ca 29 C.E., payagambile kumala yaka 483 yiŵalocesye Daniyele. Welewu wuli umboni wamacili wakulosya kuti Yesu ali Masiya, kapena kuti Klistu. Nambo ana Masiyaju pandaŵi jiŵaliji pacilambo capasi, ŵaliji jwakuti alalicile utenga watuli?

—Nganiji jityocele pa Matayo caputala 1 mpaka 3; Maliko caputala 1; Luka caputala 2; Yohane caputala 1.