¿BIX kun kʼaj óoltbil le Mesías tumen le máakoʼoboʼ? Dioseʼ tu yaʼalaj bixi. Cuatrocientos jaʼaboʼob tsʼoʼokok u tsʼíibtaʼal le Kiliʼich Tsʼíiboʼob ich Hebreooʼ, chíikpaj tiʼ María utúul ángel ku kʼaabaʼtik Gabriel. Maríaeʼ utúul x-chʼúupal kajaʼan kaʼach tu kaajil Nazaret, tu xaaman u luʼumil Galilea. Gabrieleʼ tu yaʼalajtiʼeʼ yaan u yantal utúul u chaambal. Maríaeʼ maʼ tsʼokaʼan u beeliʼ, le oʼolaleʼ u kiliʼich muukʼ Dios kun beetik u pʼáatal embarazadai. Le chaambal kun síijlaʼ letiʼe rey aʼalaʼan kun gobernar utiaʼal minaʼan u xuuloʼ. Dioseʼ tu chʼaʼaj u kuxtal u Hijo yaan teʼ kaʼanoʼ ka tu máansaj tu jobnel María.

Maríaeʼ yéetel kiʼimak óolal tu kʼamaj le baʼax aʼalaʼabtiʼoʼ. Le máax yéetel u yaʼalmaj u tsʼoʼokol u beeloʼ, utúul carpintero u kʼaabaʼeʼ José. Letiʼeʼ tu yóotaj tsʼoʼokol u beel yéetel María le ka tsoʼoltiʼ tumen utúul angeleʼ Dios kun beetik u yantal le chaambaloʼ. Baʼaleʼ kʼaʼajaktoʼoneʼ aʼalaʼaneʼ tu kaajil Belén kun síijil, maʼ Nazaretiʼ (Miqueas 5:2). U kaajil Beleneʼ ku pʼáatal maas tiʼ 37 leguas (150 kilómetros) tiʼ u kaajil Nazaret, le oʼolaleʼ, ¿bix kun béeytal le baʼax aʼalaʼanoʼ?

Maʼ úuch tiʼ leloʼ, u gobernantei Romaeʼ tu yaʼalaj ka xiʼik tuláakal máak utiaʼal ka tsʼíibtaʼak u kʼaabaʼ teʼ kaaj tuʼux síijoʼ. José yéetel Maríaeʼ tiʼ síijoʼob Beleneʼ, le oʼolal binoʼob utiaʼal ka tsʼíibtaʼak u kʼaabaʼobiʼ, kex chéen upʼíit kʼiinoʼob u bin u síijil Jesús (Lucas 2:3). Jesuseʼ síij tiʼ upʼéel kúuchil tuʼux ku kʼalaʼal baʼalcheʼob, le oʼolal ka síijeʼ chikúuntaʼab teʼ tuʼux ku tsʼaʼabal u yoʼoch le baʼalcheʼoboʼ. Maʼ sen náach teʼeloʼ, chíikpaj u múuchʼ angeloʼob tiʼ u jaats j-kanan tamanoʼob ka tu yaʼaloʼobtiʼob tsʼoʼok u síijil le Mesías, wa Cristooʼ.

Yanchaj xan uláakʼ máakoʼob aʼal Jesuseʼ letiʼ le Mesíasoʼ. Profeta Isaíaseʼ tu yaʼaleʼ yaan utúul máax kun káajsik le meyaj tu beetaj Cristooʼ (Isaías 40:3). Le máax aʼalaʼabaʼ Juan Bautista. Utéenjeakileʼ ka tu yilaj Jesuseʼ tu yaʼalaj: «Ileʼex, lelaʼ u taman Jajal Dios, máax ku lukʼesik u kʼeban yóokʼol kaab». Tu séebaʼanileʼ, yaʼab tiʼ le máaxoʼob tsaypachtik Juanoʼ joʼopʼ u tsaypachkoʼob Jesús. Utúul tiʼ letiʼobeʼ tu yaʼalaj: «Tsʼoʼok nuptáantik le Mesíasoʼ» (Juan 1:29, 36, 41).

Baʼaleʼ yaan uláakʼ máax aʼaleʼ Jesuseʼ jach letiʼ le Mesíasoʼ. Ka tsʼoʼok u tsʼaʼabal u yokjaʼ Jesús tumen Juaneʼ, Jéeobaeʼ tu yéeyaj utiaʼal u beet u Mesíasi le ka tu beetaj u yéemel u kiliʼich muukʼ tu yóokʼoloʼ, yéetel tu yaʼalaj: «Lelaʼ in paal in yaabilaj, tu yoʼolal máax jach kiʼimak in wóol» (Mateo 3:16, 17). Bey úuchik u chíikpajal le Mesías úuch aʼalaʼak u taaloʼ.

¿Baʼax kʼiin ka úuch lelaʼ? Tu jaʼabil 29 tiʼ le yáax siglooʼ, jach le ka tu chukaj le cuatrocientos ochentaitres jaʼaboʼob aʼalaʼan tumen Danieloʼ. U jaajileʼ lelaʼ chéen jujumpʼéel tiʼ le baʼaxoʼob chíikbesik Jesuseʼ letiʼ le Mesíasoʼ. Baʼaleʼ ¿baʼax tu kʼaʼaytaj teʼ kʼiinoʼob tiaʼan way Luʼumoʼ?

(Chʼaʼabaʼan tiʼ Mateo capítulo 1 tak 3, Marcos capítulo 1, Lucas capítulo 2 yéetel Juan capítulo 1.)