KA UAGU labagarida Hesusu ubouagu? Ligía guánarügü ariñagubei: “Gasu giñe níchuguni uganu le luáguti larúeihan Bungiu houn lílana líbiri fulasu, ladüga lun lira nounahóua” (Lúkasi 4:43). Akutiha wamá gádürü inarüni le larufudahabei Hesusu luagu larúeihan Bungiu, luágutima ladimureha lidan lapurichihan.

1. Hesusuba Urúei. Ariñagati Hesusu ligía lan Mesíasibei (Huan 4:25, 26). Ariñagati giñe ligía lan Urúei le larihibei profeta Danieli lidan arufudúni. Ariñagati houn lani apostolugu lachülürüba lan aban weyu lun lañuurun luagu “lala lun larúeihan” ani hádangiñebaña lan ha lunbaña harúeihan luma (Matéu 19:28). Agúahati houn “mudún míbetiña”. Ayanuhati giñe hawagu “amu mudún” ha mama lídangiñetiña furumiñeti sétanu (Lúkasi 12:32, RVA; Huan 10:16).

2. Lanügüba Larúeihan Bungiu irichaü inarüniti. Arufudati Hesusu laransehabei lan Larúeihan Bungiu óunwenbu marichaü le ladügübei Satanási lun liri Bungiu. Ida luba ladügüni? Lau ladügüni liri sándume, arumadahaleime lídangiñe sun iyeeni le ayanuhoubei luagu lúmagiñe ebedaaguni lidan Edén (Matéu 6:9, 10). Arufudati giñe úabei lan himeinwa lan aban gürigia luéi aban lábugiñe Larúeihan Bungiu, ladüga arufudahati houn wügüriña hama würiña, rísitiña hama gudemetiña ani aban labu lóuseruniña. Íbini houn lan ísüraelina lóunahoua apurichiha, áfaaguati lun líderaguniña samariana hama amu néchanigu. Mítaranti meha Hesusu kei alidihatiña relihión lidan lidaani, ladüga hagía wuribati meha hóuseruniña gürigia ha lílana amu néchani ani himeintiña aban gürigia luéi aban.

3. Mamabei lánina ubóu le Larúeihan Bungiu. Lidan aban dan hérenguti lawinwanda Hesusu ladüga lábugiñeñein meha hagumadihan terencha lageira, gama lumoun, mígirunti lun hádaruni lidoun polítika (Huan 6:14, 15). Ariñagati lun aban gumadimati: “Mama lánina ubóu le narueihan” (Huan 18:36). Ariñagati giñe houn lani disipulugu: “Mámaadün ubouaguna” (Huan 15:19). Mígirun lumutiña lun hayusurun árüma, ni lun hageindagun luéigiñe (Matéu 26:51, 52).

4. Lagumadihaba Kristu lau ínsiñeni. Füramaseti Hesusu lawalidagüdübei lan hanügün ha afalarubalin (Matéu 11:28-30). Ani ítara liña ladügüni. Ruti eweridihani huuti houn luagu idiheri lánina ibagari, ínsiñehabuni lun umegeguni, ida luba lan hanaagun houngua hama amu luma luagu ladarirún ugundani (Matéu, kapítulu 5 darí 7). Aban meha wügüri hínsiñehabuti Hesusu, aganba lumutiña sun ha ayarafadutiña lun. Sun gürigia íbini ha gudemebaña ñüdüntiña arihei manufudeuga, ladüga subuditi houn buídubei lan lóuseruniña. Ka mabusenrunbei aban urúei libe lira?

Lun larufuduni le lunbei ladügüni Larúeihan Bungiu, adügati giñe Hesusu saragu milaguru. Ka libihubei lau milaguru burí ligía? Ariha waméi.

(Tídangiñeti liliburun Matéu, Márükosu, Lúkasi luma Huan.)