¿ÑOKÄRE Jesús jatani Kä tibienbätä? Niebare kwe: “Ti abrä ie kukwe kwin Ngöbö gobrain käibätä tä driedre [...], ñobätä ñakare angwane ne ara kräke ti juani” (Lucas 4:43, Ngöbö Täräe, tärä okwä ükaninte). Jesukwe kukwe ketabokä driebare Gobran Ngöbökwe yebätä ye ani mike gare jai, blitabare metrere kwe Gobran yebätä.

1. Jesús rabai Reire. Niara ye Mesías mikani gare metre ta kwe (Juan 4:25, 26). Ne madakäre, ni mikani Reire tuani köböre Danielkwe ye abokän niara ara niebare kwe. Niara rabai “täkänintbe kürä gobrankräbti”, aune nitre apóstol (ye nitre nämene ja kete ben) rabai siba nitre braibe käkwe gobrandi ben ye ngätäite gobrankäre niebare kwe ietre (Mateo 19:28). Nitre braibe ye kädekani kwe “obeja kiakia”. Aune “obeja mda mda” ñaka täi nitre braibe ye ngätäite yebätä blitabare kwe arato (Lucas 12:32; Juan 10:16).

2. Gobran Ngöbökwe köböire kukwe ükaite metre. Satanakwe kukwe blo nuainbare Ngöbö kä rüere ye Gobran Ngöbökwe käkwe ükaiteta niebare Jesukwe. ¿Nuaindi ño kwe? Ngöbö kä ye mikaita deme kwe o mikaita kwin kwe kukwe blo nuin jatani Edén ja känenkäre yebätä (Mateo 6:9, 10). Ne madakäre, Gobran Ngöbökwe yete nitre ñaka mikai tuin ngwarbe jai ye bämikani Jesukwe, ñobätä ñan aune nitre brare aune merire, nitre jondron bökäne aune nitre bobre ye jökrä ie diribare kwe. Niara juani kukwe driere nitre israelita yei, akwa nitre samaritano aune nitre nünanka kä mada madakänti ye jökrä dimikani kwe. Nitre ji ngwanka kukwebätä ye erere ñaka ja ngwani kwe, nitre ye abokän ñaka nämene nitre kain ngäbiti ja erebe aune nämenentre nitre kitete.

3. Nitre gobrainta Satanakwe tä gobrane ye erere Gobran Ngöbökwe ñaka gobrandi. Nitre judío nämene rüre ye käi näire Jesús nünanbare, ñobätä ñan aune juta mada nämene juta ye gobraine. Akwa, ñaka ja mikani jire kwe gobrantre yekri (Juan 6:14, 15). Nämene blite gobran iti ben angwane niebare kwe: “Ni kä nebtä tä jreire, ye kwrere ti ñan rabadre jreire” (Juan 18:36). Aune nitre ja tötikaka kwe yei niebare kwe: “Mun ñaka ja mike nitre kä nebätä yekri” (Juan 15:19, TNM). Ne madakäre, ñaka nitre ye tuanimetre kwe jondron rükäre ye den kisete, aune ñaka tuanimetre kwe ja ngie mike arato (Mateo 26:51, 52).

4. Kristo gobrandi ja tare yebiti. Jesukwe nitre ja tötikaka dimikai käbämikani kwe (Mateo 11:28-30). Aune ye erere nuainbare kwe. Töbikakwe, jondron tua töta nemen krubäte jakwe, ja keta aune nüna kä jutobiti ye kräke kukwe kwin niebare kwe ietre (Mateo, kapitulo 5 nemen 7). Nämene nitre tarere aune blite jäme ni jökrä ben. Nitre ño ño, nitre bobre arato nämene niken töi jämebiti känti, niarakwe nitre ye kai ngäbiti kwin aune mikai ütiäte jai ye nämene gare kwin ietre yebätä. ¿Nire ñan törba ni ye erere tuai ja gobraine?

Gobran Ngöbökwe dre nuaindi ye bämikakäre, Jesukwe jondron ñan tuabare keta kabre nuainbare. ¿Ye köböire dre namani bare? Ani mike gare jai.

(Dianinkä tärä Mateo, Marcos, Lucas aune Juan yebätä.)