СӘВА чь Иса Мәсиһ һатә сәр әʹрде? Әԝи гот: «Гәрәке әз бажаред дьнда жи Мьзгинийа Пʹадшатийа Хԝәде бьдьм, чьмки әз бона ԝе йәке һатьмә шандьне» (Луԛа 4:43). Әме ньһа шьровәкьн чар тʹема дәрһәԛа Пʹадшатийа Хԝәде, кʹижан кӧ Иса бәла дькьр.

1. Иса Мәсиһ Пʹадше Пʹадшатийа Хԝәде йә. Иса хԝәха жи дьгот, ԝәки әԝ Мәсиһе создайи әԝ ә (Йуһʹәнна 4:25, 26). Иса ӧса жи дьгот, ԝәки әԝ ԝе бьбә әԝ Пʹадша, кʹижани кӧ Данийел пʹехәмбәр дитьнока хԝәда дитьбу. Иса готә шагьртед хԝә, ԝәки ԝе рʹожа кӧ әԝ рʹуне сәр «тʹәхте хԝәйә рʹумәт», әԝана жи ԝе рʹунен сәр тʹәхт (Мәтта 19:28). Иса сәр ԝан гот «кәрийе пези бьчʹук», у ԝанарʹа гот кӧ «пәзед . . . дьн жи һәнә», кʹижан кӧ нә жь ве кʹоме нә (Луԛа 12:32; Йуһʹәнна 10:16).

2. Пʹадшатийа Хԝәде, ԝе һәԛийа рʹаст бинә сәр әʹрде. Иса Мәсиһ гот, ԝәки Пʹадшатийа Хԝәде ԝе нәһәԛийед мәзьн бьдә һьлдане. Әԝ ԝе пироз кә наве Йаһоԝа Хԝәде, у тʹәмьз кә ԝе ләкʹе, кʹижан кӧ Шәйтʹан Мире-щьна да сәр наве Хԝәде, ԝәʹде мьԛабьлибуна Еденеда (Мәтта 6:9, 10). Иса фьрԛи нәдькьрә ортʹа мәрийа, у һʹәмушк һин дькьрьн, мер, жьн, дәԝләти у кʹәсиб. Рʹаст ә Иса һатә шандьне щәм Исраелийа, ле әԝи али мәрьвед жь Самәрийе у нәщьһуйа, демәк пʹутпʹарьста жи дькьр. Әԝ нә мина Ферьси у Садуԛийа бу, Иса фьрԛи нәдькьр ортʹа мәрийа.

3. Пʹадшатийа Хԝәде ԝе пʹара ве дьнйайе нибә. Иса Мәсиһ дьжит ль ԝәʹде политика нә рʹьһʹәт. Ԝәлате ԝи бьн ԛоле ԝәлатәки дьнейи зорʹда бу. Ле чахе щьмәʹте дьхԝәст Иса бькьра пʹадша, әԝи нәхԝәст у рʹәви (Йуһʹәнна 6:14, 15). Дәрбәке, Иса готә сәркʹарәки: «Пʹадшатийа мьн нә жь ве дьнйайе йә» (Йуһʹәнна 18:36). Ле шагьртед хԝәрʹа әԝи гьлийе ӧса гот: «Һун нә пʹара дьнйайе нә» (Йуһʹәнна 15:19). Чахе шагьртед Иса хԝәстьн чʹәк бьдьнә хәбате, ԝәки ԝихьлаз кьн, әԝи изьн нәда ԝан (Мәтта 26:51, 52).

4. Сәрԝертийа Иса Мәсиһ ԝе ль сәр һʹиме һʹьзкьрьне бә. Иса щьмәʹтерʹа соз дабу, ԝәки ԝе али ԝан бькә у баре ԝан сьвьк кә (Мәтта 11:28-30). У ӧса жи ԛәԝьми. Ширәтед ԝийә ԛимәт аликʹари дьданә мәрийа. Иса шьровәкьр, кӧ чь әм гәрәке бькьн, ԝәки зәʹф бәрхԝә нәкʹәвьн, тʹәви мәрийа баш бьн, пәй һәбуне нәкʹәвьн у бәхтәԝар бьн (Мәтта, сәре 5-7). Чьмки Иса Мәсиһ мәри һʹьз дькьрьн, ләма жи ԝана шәрм нәдькьр, у нә жи дьтьрсийан бьчуна щәм ԝи. Щурʹә-щурʹә мәрьв, тʹоп дьбун у бәрбь Иса дьчун, мәсәлә, мәрийед кӧ бәр чʹәʹве гьшка рʹәш бун у мәрийед дьлтәнг. Чьмки ԝана заньбу, ԝәки Иса ԝе һьндава ԝанда рʹәʹм бә у ԛәдьре ԝан нәкʹәвә. Бьдьнә һʹәсабе хԝә, Иса ԝе Пʹадшаки чьԛас баш бә!

Чахе Иса Мәсиһ мьзгини дәрһәԛа Пʹадшатийа Хԝәде һин дькьр, әԝи ӧса жи гәләк кʹәрәмәт дькьрьн, ԛәнщ дькьрьн, у мьри рʹадькьрьн. Ле нета ԝи чь бу? Әве йәке әме сәре майинда пебьһʹәсьн.

​—Сәр һʹиме кʹьтебед Мәтта, Марԛос, Луԛа у Йуһʹәнна.