¿KENKE ualajki Jesús ipan Tlaltipaktli? Yaya kiijtok: “Nikiniljuis tlakamej itlajtol toTeko [...], pampa ya nopa nechtitlantok ma nijchiua” (Lucas 4:43). Tikitasej naui tlamantli katli Jesús tlamachtik tlen toTeotsij iTlanauatijkayo, katli tlauel pankiski kema tlajtolmoyajki.

1. Jesús eliskia nopa Tlanauatijketl. Xitlauak kiijtok yaya Mesías (Juan 4:25, 26). No kinextik ya eliyaya Tlanauatijketl katli tlajtolpanextijketl Daniel kiitstoya ipan se temiktli. Jesús kiniljuik iapóstoles asiskia se tonali kema moseuis ‘ipan isiya tlen yejyektsi para tlanauatisʼ uan inijuantij eliskiaj se keskij katli tlanauatiskiaj iuaya (Mateo 19:28). Inijuantij kintokaxtik ‘axmiakejʼ. Nojkia kiijtok itstokej “sekinok” katli amo itstoskiaj san sejko ininuaya (Lucas 12:32; Juan 10:16).

2. ToTeotsij iTlanauatijkayo kichiuaskia ma nelia onka xitlaualistli. Jesús kiijtok toTeotsij iTlanauatijkayo kitlamiltiskia se tlauel ueyi tlamantli tlen amo xitlauak: katli Satanás kichijki ika toTeotsij itoka. ¿Kenijkatsa kichiuaskia? Kiixpolos nochi ika tlen kitelchijtokej katli pejki kema kiijixnamijkej ne Edén (Mateo 6:9, 10). Cristo nojkia kinextik, kema Tlanauatiskia amo techikoitaskiaj, pampa ya kinmachtik nochi tlakamej uan siuamej, tlen tlatominpiaj uan katli amo tleno kipiaj. Uan maske kititlankej ma kinmachti israeleuanij, ya kichijki se ueyi kampeka kinpaleuis samariaeuanij uan tlen sekinok altepemej. Ya amo tekualankaitak yon techikoitak kej tlayakananij tlen religión judía katli onkayaya ne tonali.

3. ToTeotsij iTlanauatijkayo amo tekichiuas kampa Satanás tlanauatia. Jesús itstoya kema onkayaya kualantli ne Judá, pampa nopa altepetl kinauatiyaya se tlanauatijketl tlen seyok altepetl. Kema kinejkej kikalakisej ipan política ya amo kinejki (Juan 6:14, 15). Yeka kema kinojnotstoya se político kiiljuik: “Notlanauatilis kampa na nitlanauatia axmokaua ipan ni Tlaltipaktli” (Juan 18:36). Uan itokilijkauaj kiniljuik: Inmojuantij “axininaxkauaj ni Tlaltipaktli” (Juan 15:19). Nojkia, amo kinkajki ma tlateuikaj, yon kema kinekiyayaj kimanauisej (Mateo 26:51, 52).

4. Cristo tlanauatiskia ika tlaiknelili. Jesús kiijtok kinpaleuiskia itokilijkauaj (Mateo 11:28-30). Uan kej nopa kichijki. Kuali kintlajtolmakak, pampa kiniljuik ma amo motekipachokaj, ma amo tlauel tlapijpiakaj, ma kuali mouikakaj ininuaya sekinok uan kenijkatsa yolpakiskiaj (Mateo, capítulos 5 uan tlami ipan 7). Ya teikneliyaya uan kipaktiyaya ma kinechkauikaj. Katli ueli momakayaya kiitati maske teikneltsi, pampa kimatiyaya kuali kiseliskia uan kitlepanitaskia. ¿Ajkia amo kinekiskia kipias se tlanauatijketl kej ya?

Jesús kichijki uejueyi tlamantli, ika nopa kinextik tlen toTeotsij iTlanauatijkayo kichiuas teipa. ¿Tlake kinekiyaya ma kimatikaj? Ma tikitakaj.

(Mokixtijtok ipan pilamochtsi Mateo, Marcos, Lucas uan Juan.)