ANTO so misyon nen Jesus diad dalin? Inkuan to: ‘Kaukolan ko met ya ipulong so ebanghelyo na panarian na Dios, ta sikato ya so nibakian ko.’ (Lucas 4:43) Imanoen pa so apatiran bengatla ya imbangat nen Jesus nipaakar ed satan a Panarian, say pinagka-tema na impulong to.

1. Si Jesus so magmaliw ya Ari. Imbagan mismo nen Jesus a sikato so insipan a Mesias. (Juan 4:25, 26) Impalinew to met a sikato imay Ari ya anengneng nen propeta Daniel ed sakey a puyan. Imbaga nen Jesus ed saray apostol to a nasabi panaon et sikatoy onyurong ed “trono na gloria” tan sikaray onyurong met ed saray trono. (Mateo 19:28) Tinukoy to iyan grupo na saray manuley bilang “daiset a papastolan,” tan imbaga to met a wala ni ‘arum a karnero’ to ya agkabiangan ed satan a grupo.—Lucas 12:32; Juan 10:16.

2. Iter na Panarian na Dios so tuan inkahustisya. Impanengneng nen Jesus ya ekalen na Panarian so sankagrabian ya ag-inkahustisya diad pamasantos ed ngaran nen Jehova a Dios tan linisan itan a ngaran ed amin a pakabalawan ya imbunton nen Satanas nanlapula’d impanrebelde to. (Mateo 6:9, 10) Diad inagew-agew et impanengneng met nen Jesus ya anggapoy pipilien to diad impanbangat to ed lalaki tan ed bibii man, mayaman odino mairap. Anggaman say manunan misyon to et say pambangat ed saray Israelita, imbangat to met iray Samaritano tan saray Gentil, odino aliwan Judio. Aliwan singa saray kapanaonan ton lider na relihyon, agton balot angipanengneng na paboritismo.

3. Say Panarian na Dios et agkabiangan na sayan mundo. Nambilay si Jesus legan na panaon a walay gulo ed politika. Say nianakan ton nasyon et sinakop na sananey a nasyon. Sanen sikatoy pipiliten na totoo ya onloob ed politika, imbatikan to ra. (Juan 6:14, 15) Oniay inkuan to ed sakey a politiko: “Say panarian ko aliwan taga dia ed mundo.” (Juan 18:36) Inkuan to met ed saray patumbok to: “Aliwa kayo a taga mundo.” (Juan 15:19) Agto ira inabuloyan a mamemben na armas anggano usaren da nin pangidepensa ed sikato.—Mateo 26:51, 52.

4. Nibase ed aro so uley nen Kristo. Insipan nen Jesus ya ikdan toy pakainawaan iray totoo pian nalemewan ira. (Mateo 11:28-30) Tinoor toy imbaga to. Sikatoy angiter na maaro tan praktikal a simbawa pian napaliisay pakakaaburidoan, napaaligwas so relasyon ed arum, nadaeg so materyalismo, tan nawalaay liket. (Mateo, kapitulo 5-7) Lapud sikatoy maaro, mainomay ya asinggeran na amin a klase na totoo. Anggan saray napapairap et agnababaingan ya onasingger ed sikato lapud amta ran sikaray kasian tan pagalangan to. Talagan maong ya Ari si Jesus!

Wala ni epektibon paraan ya imbangat nen Jesus so nipaakar ed Panarian na Dios. Sikatoy nanggawa na dakel a milagro. Akin a ginawa to itan? Nengnengen tayo.

—Nibase ed saray libron Mateo, Marcos, Lucas, tan Juan.