WUATOO kjeem Jesus oppe Ieed? Hee säd: “Ekj mott . . . daut Evangelium von Gott sien Rikj . . . prädjen; wiels daut es wuatoo ekj jeschekjt sie” (Lukas 4:43). Gott sien Kjennichrikj wia de Hauptsach, von waut Jesus prädjen deed. Un waut lieed Jesus aundre doavon? Well wie mol seenen.

1. Jesus wudd Kjennich sennen. Jesus säd daut gaunz frie, daut hee de Messias wia (Johanes 4:25-26). Hee jeef uk to vestonen, daut hee de Kjennich wia, dän de Profeet Daniel en eene Vision jeseenen haud. Hee säd to siene Apostel, daut hee eenen Dach wudd opp eenen “harlichen Troon” setten un daut uk see wudden opp Troons setten (Matäus 19:28). Jesus nand dise Grupp, waut met am toop harschen wudd, de “kjliene Häad”. Hee säd uk, hee haud noch “aundre Schop”, waut nich to dise Grupp jehieeden (Lukas 12:32; Johanes 10:16).

2. Gott sien Kjennichrikj wudd fa Jerajchtichkjeit sorjen. De jratste Ojjerajchtichkjeit es, daut Soton vom Goaden Eden aun Schaund opp Gott sienen Nomen jebrocht haft. Jesus wees doaropp han, daut Gott sien Nomen wudd derch daut Kjennichrikj jeheilicht woaren un von dise Schaund friejemoakt woaren (Matäus 6:9-10). Fa Jesus wieren aule Menschen äwareen. Hee lieed Mana, Frues, Rikje un Oame, onen eenen Unjascheet to moaken. Uk wan Jesus doaropp jekomen wia, de Israeliten to prädjen, deed hee oba uk Samarita un Menschen von aundre Velkja lieren. Hee wia gaunz aundasch aus de Gloowesleidasch to siene Tiet, dee jieren jewesse Menschen väatrocken.

3. Gott sien Kjennichrikj wudd nich von dise Welt sennen. To Jesus siene Tiet wieren de Menschen sea ontofräd met de Rejierunk. Daut Launt, wua hee läwd, wort von Framde beharscht. Oba Jesus leet sikj nich en de Rejierungssachen met endreien (Johanes 6:14-15). “Mien Kjennichrikj es nich von dise Welt”, säd hee to eenen Harscha (Johanes 18:36). Uk to siene Nofolja säd Jesus, see wieren “nich von dise Welt” (Johanes 15:19). Jesus siene Jinja sullen nich daut Jewäa nämen, nich mol toom am beschitzen (Matäus 26:51-52).

4. Christus wudd met Leew harschen. Jesus vespruak, hee wudd de Menschen halpen äare Lausten droagen (Matäus 11:28-30). Un daut deed hee uk. Hee jeef gooden Rot, woo eena kaun met Sorjen foadich woaren, sikj met aundre kaun bäta vestonen, nich soo no daut irdische sennen un woo eena em Läwen kaun opp iernst mootich sennen (Matäus, Kapitels 5 bat 7). De veschiedenste Menschen jleichten Jesus, wiels dee soo leeftolich wia. Soogoa dee, waut unjadrekjt wieren, streemden no Jesus, wiels dee wisten, daut dee an achten wudd. Waut fa een feina Kjennich Jesus doch sennen woat!

Jesus wees uk derch Wunda, woo daut unja Gott sien Kjennichrikj sennen wudd. Well wie mol seenen, woo.

Stett sikj opp de Bibelbieekja Matäus, Markus, Lukas un Johanes.