MUSHUMO wa Yesu musi e kha ḽifhasi wo vha u ufhio? O ri: “Ndo pfi ndi yo amba mafhungo-maḓifha a muvhuso wa Mudzimu; ndo rumelwa zwenezwo.” (Luka 4:43) Ṱhogomelani zwithu zwiṋa zwe Yesu a zwi funza nga ha Muvhuso, une wa vha tshiṱoho tshawe tsha ndeme musi a tshi huwelela.

1. Yesu o vha a tshi ḓo vha Khosi. Yesu nga dzawe o amba uri o vha a tshi ḓo vha Messia o fulufhedziswaho. (Yohane 4:25, 26) O dovha a sumbedza uri o vha e Khosi ye muporofita Daniele a i vhona kha bono. Yesu o vhudza vhaapostola vhawe uri ḽiṅwe ḓuvha u ḓo dzula kha “khuluṋoni ya vhurena” nahone na vhone vha dzula kha dzikhuluṋoni. (Mateo 19:28) O amba uri tshenetshi tshigwada tsha vhavhusi ndi “sambi ḽiṱuku,” nahone a dovha a ṱhogomela uri u na “dziṅwe nngu,” dzine dza sa vhe tshipiḓa tsha tshenetsho tshigwada.—Luka 12:32; Yohane 10:16.

2. Muvhuso wa Mudzimu u ḓo ḓisa khaṱulokwayo ya vhukuma. Yesu o sumbedza uri Muvhuso u ḓo fhelisa tshiṱalula tshoṱhe nga u ita uri dzina ḽa Yehova Mudzimu ḽi khethwe na u bvisa samba ḽe Sathane a ḽi itela dzina ḽa Yehova u bva kha vhushandukwa ha Edeni. (Mateo 6:9, 10) Yesu o dovha a sumbedza u sa vha na tshiṱalula nge a vha a tshi funza vhanna na vhasadzi, vhapfumi na vhashai ḓuvha ḽiṅwe na ḽiṅwe. Naho mushumo wawe wa ndeme wo vha u wa u funza Vhaisiraele, o dovha a ita vhuḓidini ha u thusa Vhasamaria na Vhannḓa, kana vhathu vhe vha vha vhe si Vhayuda. Nge a vha a sa fani na vharangaphanḓa vha misini yawe, o vha e si na tshiṱalula.

3. Muvhuso wa Mudzimu a u nga ḓo vha tshipiḓa tsha ḽino shango. Yesu o tshila tshifhingani tsha khakhathi dza politiki. Shangohaya ḽa hawe ḽo vha ḽi nga fhasi ha vhuvhusi hu sili. Naho zwo ralo, musi vhathu vha misini yawe vha tshi lingedza u mu ita uri a ṱanganele kha mafhungo a zwa politiki, o mbo ḓi shavha. (Yohane 6:14, 15) O vhudza muṅwe rapolitiki uri: “Muvhuso wanga a si wa shango ḽino.” (Yohane 18:36) O vhudza vhatevheli vhawe uri: “A ni vha shango ḽino.” (Yohane 15:19) O vha a nga si ḓo vha tendela vha tshi shumisa zwiṱhavhani zwa nndwa, na u vha tendela vha tshi mu lwela.—Mateo 26:51, 52.

4. Vhuvhusi ha Kristo vhu ḓo thewa kha lufuno. Yesu o fulufhedzisa vhathu uri u ḓo vha awedza, na u ṱhaḓula mihwalo yavho. (Mateo 11:28-30) Zwe a vha a tshi zwi amba, ndi zwe a vha a tshi zwi ita. O ṋea nyeletshedzo ya lufuno na i shumaho ya u sedzana na mbilaelo, u khwinisa vhushaka, u lwisana na zwithu zwi vhonalaho, na u wana dakalo. (Mateo, dzindima 5-7) Nga ṅwambo wa uri o vha e na lufuno, vhathu vho fhamba-fhambanaho vho vha vha tshi ḓa khae. U katela na vho tsikeledzeaho vhe na fulufhelo ḽa uri u ḓo vha fara nga vhulenda na nga tshirunzi. Yesu o vha a tshi ḓo vha Muvhusi wavhuḓi lungafhani!

Ho vha hu na iṅwe nḓila ye Yesu a vha a tshi funza ngayo nga ha Muvhuso wa Mudzimu. O ita vhuṱolo vhunzhi-vhunzhi. Ndi ngani? Kha ri zwi ṱhogomele.

—Enea mafhungo a wanala kha bugu dza Mateo, Marko, Luka na Yohane.