ZAMBE a nga ve Yésus ngule ya bo mame môt a binam ase ngule ya bo. Yésus a nga bo abui beta mesimba​—biyoñe biziñ, abui bôte be mbe nye mefefel éyoñ a nga too a bo’o me. Mesimba mete me mbe me liti’i na ngule Yésus abili j’adañe besiñe bé, a na, a ne ngule ya va mame mese ya bebo mam abé be se ngule ya va. Bi tame nyoñe bone bive’an.

Zaé. Asimba ôsu Yésus a nga bo é mbe na a nga tyendé mendim a bo me meyok me ne mvaé. Biyoñe bibaé, a nga belane betoyini be bôt, a ve be bidi fo’o ve a mone abime kos, a belet. Biyoñe bite bibaé, bôte bese be nga di a li’i fe mebuka’a.

Akon. Yésus a nga “saé akon mevale mese, a bôte bese be nga ya’a.” (Matthieu 4:23) Mindindim, mindôndok, minzezam, a bekui ésesé, bese be nga yene mvolan a zene ya mesimba me Yésus. A nga saé fe minbôbôk, minyeyem, ja’a ba be mbe nse’ane be nga beta bo mvo’é.

Beta b’akôs. Éyoñe Yésus ba beyé’é bé be nga bet éfunga été, be tyi’ilane Mañe ya Galilée, atemeteme na beta ôkôs a nga vuñ. Nde beyé’é be Yésus be nga ko mbia woñ. Ve a nga same mis a fombô ôkôs a jô na: “Tabe mvo’é, a bo ne mieññ.” Ane mañe me nga ku ne mieññ. (Marc 4:37-39) Môs ôfe, a nga wulu ôsôé yôbe beta ôkôs a vuñu.​—Matthieu 14:24-33.

Mimbia minsisim. Mimbia minsisim mi ne ngul a lôte bôt. Bôt abui be nji bi ngule ya va’a mimbia minsisim mi nga to mi ndeñele be. Biyoñ abui, Yésus a nga ja titane besiñe be Zambe bete be kôlô bôte nyôl, be bo te beta ndumekane be. Yésus a nji ko mimbia minsisime woñ. Mmie mi nga ko Yésus woñ amu mi mbe mi yeme ngule jé.

Awu. Kalate Zambe a loene fe de na “nsiñ a su’ulane.” (1 Becorinthien 15:26) Awu é ne nsiñ; môt a binam éziñ a se ngule ya dañe de. Jame da Yésus a nga wômôlô bewu. Éyoñe nkuse minga ô nga jañelé atyi’i mona fame dé, nde Yésus a nga wômôlô nye a ve nye nyia. Bebiaé be nga jañelé fe mona minga, nde a nga wômôlô nye a ve be mone wop. Jame Yésus a nga bo é fombô’ô Lazare mvôé jé é ne fo’o agôndô a jam. A nga wômôlô nye ézezañe bêta nsamba bôt éyoñ a bômbô ya soñe tañe melu menyin! To’o beta besiñe be Yésus be nji fe beta bi ngule ya sôane mboane ôte.​—Jean 11:38-48; 12:9-11.

Amu bi a yeme na bôte bese Yésus a nga wômôlô be nga beta wu, nde bia sili na, amu jé ñhe Yésus a nga bo bitua bi mame bite? Bitua bi mame Yésus a nga bo bi nga su’ulane bo mbamba be mam. Bi aliti na mengaka’a mese kalate Zambe a nga ka’a na Njô ya Éjôé Messie a ye bo, mame mete mese me aye fo’o bobane. Môt ase ngule ya beta soane na Njô Zambe a nga top a bili ngule ya mane zaé, akon, akôs, ndône mendim, mbia minsisim a awu. Yésus a nga liti na Zambe a nga ve nye ntute ngule ya bo mame mete mese.

​—Nkañete ôte wo so kalate Matthieu, Marc, Luc a Jean.