LOBA a boli Yesu ngińa o bola mambo mena bane̱ bato ba benama ba titino̱ na ba bola. O jita la ngedi Yesu a boli jita lá betańsedi bende̱ne̱ o miso̱ ma mamuti. Be betańsedi be lee̱le̱ ná Yesu a be̱n ngińa omo̱ń a basingedi na omo̱ń a bekeṅan bato ba benama bena ba titi ná ke̱nge̱nge̱ ba si we̱lino̱ buka nate̱na we̱nge̱. Jombweye te̱ byembilan bō̱.

Njai. Betańsedi ba Yesu baboso be ta nde timbise̱le̱ la madiba mao. O ngedi ipe̱pe̱ ibā, ulise̱ mamuti ma lokoli la bato, na ngus’a bewolo na sue bukate̱. Nde o be betańsedi bebane̱, dá di ta jita ońol’a bato be̱se̱, di peta.

Diboa. Yesu a bo̱lise̱ bato ba ta ba be̱ne̱ “ńai a diboa te̱ na ńai a sese ye̱se̱.” (Mateo 4:23) Yesu a bo̱lise̱ bato ba ta ba boa ndima, ndo̱ki, mulo̱ngō̱, mudo̱ngi, b’eboki, ba m’boko na ba nje̱mbe̱le̱. Pat’a diboa to̱ po̱ e si ta e buka mo̱.

Mudio ma bobe. Póndá Yesu na bókwedi bao ba tano̱ bekame̱ne̱ Munja ma Galilea, ngo̱ a mūdi munde̱ne̱ e botea júnga. Bókwedi ba bwa bo̱ngo̱ jita. Yesu ombo nde ni ngo̱ a kwala ná: “Ko̱ ná pī, be̱ ná sao!” O dibokime̱ne̱ mbo̱le̱ ninde̱ne̱ e ko̱. (Marko 4:37-39) O ngedi nipe̱pe̱ a dango omo̱ń a madiba ke̱ ngo̱ ni mabwesane̱ bo̱ngo̱ ńe o júnga.​—Mateo 14:24-33.

Bedi ba bobe. Bedi ba bobe be ngińa jita buka bato ba benama. Bato jita ba si we̱li be̱ ngińa o busise̱ babo̱me̱ne̱ o mā ma bá basingedi ba Loba ba myano ma njo. O ngedi jita Yesu anedi i ńai a bedi ná be buse bato o ńolo, be si be̱ne̱ pe̱ ngińa omo̱ń’abu. A si ta a bwa babo̱ bo̱ngo̱. O diwengisan, ba ta ba bia ná a be̱n doi ba ta pe̱ ba bwa mo̱ bo̱ngo̱.

Kwedi. Kwedi ńe nde musingedi ńena mot’a benama to̱ mō̱ a titino̱ ná a buka. E te̱nge̱n so̱ ná e belabe̱ ná “musingedi nu sukan.” (1 Korinto 15:26) Nde, Yesu a pumbwe̱le̱ ba wedi, a timbise̱le̱ eso̱mb’a muna mome ya mukusa ma muto o longe̱ na eso̱mb’a ngo̱ndedi ńa bayēdi ba ta o ndutu ninde̱ne̱. O ngedi po̱ ni buki ye̱se̱ Yesu a pumbwe̱le̱ diko̱m lao la ndolo Lasaro o miso̱ ma dimuti lena di ta leya mbembe to̱ná nu moto a tano̱ a mawo̱ be̱be̱ na mińa mine̱i! Na basingedi bande̱ne̱ ba Yesu mo̱me̱ne̱ bēmbi ná a boli betańsedi.​—Yohane 11:38-48; 12:9-11.

Ońola nje Yesu a po̱ngino̱ be betańsedi be̱se̱ e? Ye mbale̱ ná ba be̱se̱ bena Yesu óngwane̱no̱ ba timbi o wo̱. Nde be betańsedi ba Yesu be boli bwam bo si be̱n su. Be lee̱le̱ ná bedinge̱ be̱se̱ jombwea bediēdi ba Kiṅ’a Janea la Mesia be be̱n eyoto na mbale̱. Penda to̱ po̱ e titi ná Kiṅe̱ ni po̱so̱be̱ na Loba ńe ná e bo̱le̱ njai, maboa, midio ma bobe, bedi ba bobe na kwedi mo̱me̱ne̱. A  lee̱le̱ ná Loba a boli mo̱ ngińa ye̱se̱.

​—Nika e se̱medi o kalat’a Mateo, Marko, Lukas, na Yohane.