PÁRTE 18
Umi milágro Jesús ojapovaʼekue
Umi milágro ojapovaʼekue Jesús ohechauka mbaʼépa ojapóta ogoverna vove
ÑANDEJÁRA puʼaka rupive Jesús ojapo hetaiterei milágro. Koʼã mbaʼe haʼe ojapo heta hénte rovake. Péicha ohechauka ikatuha ipuʼaka umi mbaʼe vai rehe hetaitéma ombohasa asýva yvyporakuérape. Jahechamína umíva.
Ñembyahýi. Primer milágro ojapórõ guare Jesús ojapo pe ýgui víno, ha péicha ohechauka ikatuha omeʼẽ tembiʼu ha vevída enterovépe. Upe rire dos vése voi omongaru hetaiterei héntepe ha upearã oiporu mbovymi pán ha pira. Hetaitereíramo jepe umi okarúva hembypa la tembiʼu.
Mbaʼasy. Jesucristo omongueravaʼekue ‘opaichagua mbaʼasy’ (Mateo 4:23). Omonguera ohechaʼỹva, ohenduʼỹva, hasýva lépragui ha epilépsiagui. Ndaipóri mbaʼasy haʼe omongueraʼỹva.
Sarambi oikóva tiémpo vai jave. Peteĩ pyharépe Jesús ohasa ohóvo ijapostolkuéra ndive pe lágo oĩva Galiléape. Upeichaháguinte ou hiʼarikuéra peteĩ torménta ndevaipa jepéva. Umi apóstol oñemondyipa, péro Jesús oñakãrapuʼã ha heʼi: “Ekirirĩetéke!”. Ha upepete opa pe yvytu atã (Marcos 4:37-39). Ambue jey katu Jesús oguata pe y ári peteĩ torménta atã jave (Mateo 14:24-33).
Umi ánhel aña. Koʼã ánhel oñehenóiva avei demónio imbareteve ñandehegui. Upéicha rupi hetaiterei yvypóra rehéma oñemboharái. Heta ñande rapicha ndaikatúi ojapo mbaʼeve ojesalva hag̃ua umi demóniogui. Péro Jesús ndokyhyjeiete chuguikuéra. Umi demónio katu oryrýi osusũ ohecha vove Jesúspe. Haʼe heʼíramo chupekuéra osẽ hag̃ua umi héntegui pyaʼeterei osẽ hikuái.
Ñemano. La Bíbliape oñehenói ñemanóme pe “enemígo paha”, ha añetehápe ningo ko enemígo enterovépe ñanderupyty katuete (1 Corintios 15:26 BNP). Péro Jesucrístope g̃uarã vyroite la ñemano, haʼe sapyʼaitépe omoingove jey vaʼekue peteĩ mitãkariaʼy ha peteĩ mitãkuñáme. Ojehecharamoitereivaʼekue omoingove jeýrõ guare iñamígo Lázarope, 4 día omano rire. Iñenemigokuéra ñañaite jepeve ndaikatuivaʼekue onega upe milágro tuichaitéva (Juan 11:38-48; 12:9-11).
Jaikuaa ningo koʼã hénte omano jey hague upe rire. Mbaʼépa upéicharõ ohechauka ñandéve koʼã milágro? Ohechauka umi profesía oñeʼẽva Ñandejára Rréino rehe añeteha. Upévare ñande koʼág̃a jaikuaa porãiterei koʼẽrõitéma Jesucristo oipeʼataha ñembyahýi, mbaʼasy ha ñemano. Avei ndohejamoʼãvéima oiko umi sarambi tiémpo vai rupi, ha ohundipáta umi demoniokuérape. Koʼã mbaʼe haʼe ojapóta Jehová espíritu rupive.
