VAJTSWV pub hwjchim rau Yexus ua tej yam uas tibneeg ua tsis tau. Yexus ua ntau yam txujci tseem ceeb. Ntau zaus nws ua tej txujci ntawd tab meeg rau tibneeg coob coob pom. Tej txujci ntawd qhia tias Yexus muaj hwjchim tshaj nws cov yeeb ncuab. Tej txujci ntawd kuj qhia tias nws muaj hwjchim kho tau tej teeb meem uas tibneeg txhaum kho tsis tau. Cia peb kawm txog tej yam uas Yexus tau ua.

Kev tshaib kev nqhis. Thawj qhov txujci uas Yexus tau ua yog muab dej hloov ua cawv txiv hmab. Yexus kuj ua txujci pub mov rau coob leej noj thiab. Muaj ob zaug Yexus tau muab ob peb tug ntses thiab ob peb lub ncuav faib rau ntau txhiab leej noj. Lawv sawvdaws noj tsis tas li.

Kev mob kev nkeeg. Yexus tau kho “txhua yam mob nkeeg zoo huvsi.” (Mathai 4:23) Yexus tau kho cov neeg dig muag, cov lag ntseg, cov mob ruas, cov qaug dab peg, cov ceg tawv, cov qhuav tes qhuav taw, thiab cov tuag tes tuag taw zoo huv tibsi. Tsis muaj ib yam mob uas Yexus yuav kho tsis tau li.

Huab cua phem. Thaum Yexus thiab nws cov thwjtim tabtom caij nkoj hla Hiavtxwv Kalilais, txawm muaj cua daj cua dub hlob heev los ntsawj lub nkoj, ua rau cov thwjtim ntshai kawg li. Tiamsis Yexus cia li hais kiag rau hiavtxwv tias, “Cia li tus yees, nyob twjywm.” Ces, cua txawm tu kiag tamsid, ua rau dej hiavtxwv nyob tus yees. (Malakau 4:37-39) Tsis tas li ntawd xwb, muaj dua ib zaug, thaum tabtom muaj cua daj cua dub hlob heev, Yexus cia li mus kotaw saum nplaim dej hiavtxwv.​—Mathai 14:24-33.

Cov plig limhiam. Cov plig limhiam, lossis cov dab, muaj hwjchim tshaj tibneeg. Coob leej tsis muaj hwjchim kov yeej Vajtswv cov yeeb ncuab phem ntawd. Tiamsis Yexus muaj hwjchim kov yeej cov dab ntawd. Txhua zaus thaum Yexus ntiab dab tawm ntawm tibneeg, Yexus muaj hwjchim tso tau tus neeg raug dab dim ntawm dab txojkev tswjhwm. Yexus tsis ntshai cov dab ntawd. Tiamsis, cov dab ntawd ntshai Yexus, thiab lawv yeej paub tias Yexus muaj hwjchim kawg li.

Kev ploj kev tuag. Kev ploj kev tuag zoo li ib tug yeeb ncuab uas tibneeg khiav tsis dim li. Twb yog vim li ntawd phau Vajlugkub thiaj muab kev tuag hu ua “tus yeeb ncuab kawg.” (1 Khaulee 15:26) Tiamsis Yexus muaj hwjchim tsa tau cov tuag ciaj sawv rov qab los. Nws tsa tau ib tug poj ntsuam tib leeg tub sawv ciaj rov qab los. Yexus kuj tsa ib tug mentxhais sawv ciaj rov qab los rau nws niam thiab nws txiv. Muaj ib zaug, Yexus tau ua ib qho txujci tseem ceeb kawg li. Yexus tus phoojywg Laxalau twb tuag tau plaub hnub lawm. Txawm li ntawd los, Yexus tseem tsa tau Laxalau ciaj sawv hauv qhov tuag rov qab los rau coob leej pom! Thaum Yexus ua li ntawd, Yexus cov yeeb ncuab uas ntxub nws tshaj, kuj lees tias Yexus tau ua qhov txujci ntawd tiag.​—Yauhas 11:38-48; 12:9-11.

Tom qab no, cov uas Yexus kho thiab tsa sawv rov los, kuj tuag lawm thiab. Yog li, ua cas Yexus ho ua tej txujci ntawd? Yexus tej txujci ua pov thawj tias, tej lus faj lem ntsig txog tus Mexiyas txojkev kav yuav muaj tseeb tiag. Peb yeej cia siab tau tias tus Vajntxwv uas Vajtswv tsa yuav rhuav tshem tau, kev tshaib kev nqhis, kev mob kev nkeeg, tej huab cua phem, tej dab, thiab rhuav tshem kev ploj kev tuag huv tibsi mus. Tus Vajntxwv ntawd twb ua qhia los lawm tias, Vajtswv tau pub hwjchim rau nws ua tej no.

​—Zaj no muaj nyob rau hauv phau ntawv Mathai, Malakau, Luka, thiab Yauhas.