NI̱ SI̱ʼA Ndio̱s ndée̱ nuu̱ Jesús já ni̱ kuu ni̱ kee si ña̱ ko̱ ku̱ú kee java ka̱ na̱yivi. Ta sa̱ʼá ña̱yóʼo ni̱ kee si kuaʼa̱ ndiva̱ʼo milagró, ta kuaʼa̱ na̱yivi ni̱ xini xíʼín nuu̱ ná ña̱yóʼo. Ta xíʼín ña̱yóʼo, ni̱ naʼa̱ si ña̱ kuu va kandeé sí jándíʼi si nuu̱ ndijaá tu̱ndóʼó ña̱ ko̱ ku̱ú kandeé na̱yivi kua̱chi jándíʼi na nuu̱. Ná kande̱ʼé yó java ña̱yóʼo.

Jo̱ko. Milagró ña̱ míínu̱ú ni̱ kee Jesús kúú ña̱ ni̱ kee si ña̱ ni̱ nduu ti̱kui̱í vinó, ña̱yóʼo ni̱ naʼa̱n ña̱ kuu va ki̱ʼa si kuaʼá ña̱ kusáʼan ta ña̱ koʼo na̱yivi. Ta nu̱ú uvi̱ ka̱ taʼndá jaá ni̱ ja̱ndúu kuaʼa̱ sí java ti̱yaká xíʼín java pán já ni̱ si̱ʼa si ña̱ ni̱ sa̱sáʼan mil na̱yivi. Nuu̱ ndin uvi̱ taʼndá yóʼo ni̱ ka̱ndo̱o diʼa va ña̱ kusáʼan na.

Kueʼe̱. Ni̱ ka̱jatatá Jesús na̱ “ndóʼo ndi ndáa mií vá kueʼe̱, ta sa̱nduva̱ʼa na na̱ uʼu̱ ñíi̱” (San Mateo 4:23). Ni̱ ja̱ndúva̱ʼa si na̱ ko̱ túvi nuu̱, na̱ ko̱ táku̱ jo̱ʼo, na̱ ko̱ ku̱ú ka̱ kaka, na̱ ndóʼo kueʼe̱ téíʼi̱, ta na̱ ndóʼo kueʼe̱ xíʼi̱ yi̱ʼí. Ko̱ó míí vá iin kueʼe̱ ña̱ ko̱ ní kúu kajatátá Jesús.

Ni̱ chi̱tivi Jesús tachi̱ xée̱n. Iin si̱kuaá tá xíkanuu Jesús xíʼín ta̱ ni̱ si̱ndíko̱ si nu̱ú ta̱ñuʼu̱ Galilea, ni̱ ka̱sáʼá kána tachi̱ xée̱n. Ta ni̱ yu̱ʼú ndiva̱ʼo ta̱ ni̱ si̱ndíko̱ si, jo chí indiví uun va ni̱ si̱nde̱ʼé Jesús ta ni̱ kachi si: “¡Katuu! Tádi̱ kooón”. Ta vitíʼón vá ni̱ ku̱táxi̱ tachi̱ xée̱n (San Marcos 4:37-39). Tá inga̱ taʼndá jaá ni̱ xika Jesús nu̱ú ti̱kui̱í tá kúun javi̱ xée̱n (San Mateo 14:24-33).

Ni̱ ka̱ndeé Jesús xíʼín espíritu kini. Espíritu yóʼo kúúán ña̱ kini, ta ió ka̱ ví ndée̱ ña̱ kini yóʼo o̱ju̱ú mií na̱yivi. Ta si̱ kuaʼá ndiva̱ʼo na̱yivi kájasísi ña̱yóʼo xíʼín ná, ta kuaʼa̱ ná ko̱ ku̱ú jákúsio na ña̱yóʼo nuu̱ ná. Jo ko̱ ní sí yi̱ʼví Jesús ña̱yóʼo. Mií diʼa va ña̱ kini yóʼo, ni̱ si̱ndei̱ ni̱no uun víán tá ni̱ si̱xinian Jesús ña̱ ni̱ si̱yiʼvía̱n ni̱ si̱kee si, ta tá ni̱ si̱saʼnda Jesús chuun nuu̱án ña̱ ná jándákoan na̱yivi já ni̱ si̱ku̱sioan nuu̱ ná.

Ña̱ xíʼi̱ na̱yivi. Ni iin mií vá na̱yivi o̱kúu ka̱ku na nu̱ú ña̱ xíʼi̱ na̱ (1 Corintios 15:26). Jo ni ña̱ xíʼi̱ na̱yivi ko̱ ní síkuan iin ña̱ ko̱ ní kúu kandeé Jesús xíʼín. Jáchi̱ ni̱ ja̱nátaku si de̱ʼe iin ñá kúaa̱n, ta jaá ní ni̱ ja̱nátaku si iin ñá lóʼo̱. Jo milagró ña̱ xíni̱ chááka̱ na̱ ni̱ kee Jesús kía̱n ni̱ ja̱nátaku si iin ta̱ ni̱ si̱neʼe táʼan va̱ʼa xíʼín sí ni̱ si̱naní Lázaro, nuu̱ kuaʼá ndiva̱ʼo na̱yivi, va̱árá si̱ ni̱ ya̱ʼa kumi̱ kivi̱ ña̱ ni̱ xiʼi̱ ra̱. Ta nda̱ na̱ ni̱ si̱xini iʼvi̱ chááka̱ Jesús ni̱ kanian ni̱ na̱kuni na ña̱ ni̱ si̱io ndiva̱ʼo ndée̱ sí (San Juan 11:38-48; 12:9-11).

Jo tá ni̱ ya̱ʼa kivi̱, ni̱ kiʼin tuku va kueʼe̱ ta ni̱ xiʼi̱ tuku va ndijaá na̱yivi na̱ ni̱ ja̱ndúva̱ʼa Jesús. Sa̱ʼá ña̱yóʼo, ¿ndá chuun ni̱ kee Jesús ndijaá milagró yóʼo? Ña̱ ndáya̱ʼvi ndiva̱ʼo kúúán, jáchi̱ xíʼín ndijaá ña̱yóʼo ni̱ naʼa̱ Jesús ña̱ ió va nu̱ú tiin na̱yivi já kuu kandeé ini na ña̱ saa̱ va ndijaá ña̱ si̱ ni̱ kaʼa̱n Ndio̱s saʼa̱ Gobiernó ta̱ Mesías kooan. Ña̱káa ko̱ káni mií ván nakani kua̱chi ini yó, jáchi̱ kuu va jándíʼi ta̱ Rey ni̱ ka̱si Ndio̱s nu̱ú jo̱ko, nu̱ú kueʼe̱, nu̱ú ndijaá ña̱ játi̱ví nuu̱ Ñúʼu̱ yóʼo, nu̱ú ña̱ kini, ta ña̱ xíʼi̱ na̱yivi. Jáchi̱ si̱ ni̱ naʼa̱ kásí vá ta̱ yóʼo ña̱ ni̱ si̱ʼa Jeová Ndio̱s ndée̱ nuu̱ rá já kuu kee ra ña̱yóʼo.

(Ña̱yóʼo va̱sian nuu̱ tutu San Mateo, San Marcos, San Lucas, xíʼín San Juan.)