တၢ်လၢပှၤဟီၣ်ခိၣ်ဖိမၤဝဲတသ့ဘၣ်န့ၣ် ယ့ၣ်ၡူးမၤဝဲသ့ ခီဖျိလၢကစၢ်ယွၤဟ့ၣ်အီၤ တၢ်စိတၢ်ကမီၤအဃိန့ၣ်လီၤ. ယ့ၣ်ၡူးမၤဝဲတၢ်လီၤလးအါမး ဒီးအါတက့ၢ်န့ၣ် မၤဝဲလၢပှၤအါဂၤအမဲာ်ညါလီၤ. တၢ်လီၤလးတဖၣ်အံၤန့ၣ် ပာ်ဖျါထီၣ်ဝဲလၢ ယ့ၣ်ၡူးအိၣ်ဒီးတၢ်စိတၢ်ကမီၤလၢ ကမၤနၢၤကွံာ်ဝဲပဒုၣ်ပဒါ ဒီးတၢ်သဘံၣ်သဘုၣ်တဖၣ်လၢ ပှၤဟီၣ်ခိၣ်ဖိလၢအတလၢတပှဲၤဘၣ်တဖၣ် မၤဟါမၢ်ကွံာ်ဝဲတသ့ဘၣ်န့ၣ်လီၤ. ဆိကမိၣ်ကွၢ် တၢ်အဒိတနီၤတက့ၢ်.

တၢ်သၣ်ဝံၤသၣ်စ့ၤ. တၢ်လီၤလးအဆိကတၢၢ်လၢ ယ့ၣ်ၡူးမၤဝဲန့ၣ် မ့ၢ်ဒၣ်အဝဲဒုးကဲထီၣ်ထံလၢ စပံးထံန့ၣ်လီၤ. တၢ်ဆၢကတီၢ်အိၣ်ဝဲခံဘျီလၢ ကစၢ်ဟ့ၣ်ဒုးအီၣ်ဝဲပှၤဂီၢ်မုၢ်လၢအကထိတဖၣ်လၢ ကိၣ်ဒီးညၣ်စှၤဘ့ၣ်လီၤ. ပှၤကိးဂၤဒဲး အီၣ်ဝဲဘျဲ (အီၣ်ဝဲလၢအီၣ်) တကးဒံးဘၣ် တၢ်အီၣ်တၢ်အီအိၣ်တ့ၢ်ဒံးဝဲလီၤ.

တၢ်ဆူးတၢ်ဆါ. ယ့ၣ်ၡူးမၤဘျါဝဲ ပှၤလၢအတူၢ်ဘၣ် “ကယဲၢ်တၢ်ဆူးတၢ်ဆါ” တဖၣ်လီၤ. (မးသဲ ၄:၂၃) ကစၢ်မၤဘျါဝဲ ပှၤလၢအမဲာ်ချံတထံၣ်တၢ်ဘၣ်, ပှၤလၢအနၢ်တဟူဘၣ်, ပှၤဘၣ်တၢ်ဆါအၢ, ပှၤလၢအိၣ်ဒီးထိးပျုၢ်တၢ်ဆါ, ဒီးပှၤလၢအခီၣ်ဟးဂီၤတဖၣ်လီၤ. တၢ်ဆါလၢ ကစၢ်မၤဘျါဝဲတန့ၢ်ဘၣ်န့ၣ် တအိၣ်ဝဲနီတမံၤဘၣ်.

မူခိၣ်ကလံၤသီၣ်ဂီၤလၢ အလီၤဘၣ်ယိၣ်ဘၣ်ဘှီ. ဖဲယ့ၣ်ၡူး ဒီးအပျဲၢ်အဘီၣ်တဖၣ် ခီဂာ်ဝဲပီၣ်လဲၣ် ကၤလံၤလါလၢကဘီအခါ ကလံၤမုၢ်လီၤဝဲသတူၢ်ကလာ်လီၤ. အပျဲၢ်အဘီၣ်တဖၣ် ပျံၤတၢ်ဒိၣ်မးလီၤ. ဘၣ်ဆၣ် ဖဲယ့ၣ်ၡူးကွၢ်ဝဲဆူ ကလံၤမုၢ်အအိၣ်ဒီးစံးဝဲ “အိၣ်ဘှီၣ်ဒီးအိၣ်ဂၢၢ်တက့ၢ်” န့ၣ်ကလံၤမုၢ်အိၣ်ပတုာ်ဝဲလီၤ. (မၢ်ကူး ၄:၃၇-၃၉, ခ့ခါစှီၤကျိာ်) အဂၤတဘျီ ဖဲကလံၤမုၢ်ဆူၣ်အဆၢကတီၢ်န့ၣ် ကစၢ်ဟးဝဲလၢထံဖီခိၣ်လီၤ.—မးသဲ ၁၄:၂၄-၃၃.

တၢ်နါတဖၣ်. တၢ်ဝံတၢ်နါတဖၣ် အတၢ်စိတၢ်ကမီၤန့ၣ်ဒိၣ်န့ၢ်ဒံး ပှၤဟီၣ်ခိၣ်ဖိအတၢ်စိတၢ်ကမီၤန့ၣ်လီၤ. ပှၤအါဂၤမၤပူၤဖျဲးအသးလၢ ယွၤအဒုၣ်အဒါတဖၣ်အံၤ အတၢ်စၢဃာ်အဖီလာ်တန့ၢ်ဘၣ်. ဘၣ်ဆၣ်သနာ်က့ ဖဲယ့ၣ်ၡူးမၤလိာ်ဝဲလၢတၢ်နါတဖၣ်ကဟးထီၣ်ကွံာ်ဝဲလၢ ပှၤလိၤ တဘျီလၢ်လၢ်န့ၣ် မ့ၢ်ဒၣ်ကစၢ်မၤပူၤဖျဲးပှၤတဖၣ်အံၤလၢ တၢ်ဝံတၢ်နါအတၢ်စၢဃာ်အဖီလာ်န့ၣ်လီၤ. ယ့ၣ်ၡူးတပျံၤတၢ်ဝံတၢ်နါတဖၣ်အံၤဘၣ်. လၢတၢ်န့ၣ်အလီၢ် တၢ်နါတဖၣ်န့ၣ်သ့ၣ်ညါဝဲ လၢယ့ၣ်ၡူးအိၣ်ဒီးတၢ်စိတၢ်ကမီၤအါမးအဃိပျံၤအီၤန့ၣ်လီၤ.

တၢ်သံ. တၢ်သံလၢဘၣ်တၢ်ကိးအီၤလၢ “ဒုၣ်ဒါလၢခံကတၢၢ်” န့ၣ်မ့ၢ်ဒုၣ်ဒါလၢပှၤဟီၣ်ခိၣ်ဖိတဖၣ် မၤနၢၤဝဲတသ့နီတဂၤဘၣ်. (၁ ကရံၣ်သူး ၁၅:၂၆, ခ့ခါစှီၤကျိာ်) ဘၣ်ဆၣ် ယ့ၣ်ၡူးမၤသမူထီၣ်က့ၤဝဲ ပှၤသံတဖၣ်လီၤ. ပှၤလၢ ယ့ၣ်ၡူးမၤသမူထီၣ်က့ၤအီၤတဖၣ်အကျါပၣ်ဃုာ်ဒီး မုၣ်ကမဲအဖိခွါတဂၤ ဒီးမိၢ်ပၢ်လၢ အပှဲၤဒီးတၢ်သူၣ်အုးသးအုး အဖိမုၣ်ဖိတဂၤလီၤ. ဖဲယ့ၣ်ၡူးအတံၤသကိးစီၤလါစရူး သံဝံၤဘူးကပှဲၤထီၣ်လွံၢ်သီအခါ ကစၢ်မၤသမူထီၣ်က့ၤအီၤလၢ ပှၤဂီၢ်မုၢ်လၢအဟီၣ်ဝဲတဖၣ် အမဲာ်ညါလီၤ. ယ့ၣ်ၡူးအဒုၣ်အဒါလၢ အသးဟ့အီၤတဖၣ်ဒၣ်လဲာ် အၢၣ်လီၤတူၢ်လိာ်ဝဲလၢ အဝဲမၤဝဲတၢ်လီၤလိၢ်လီၤလးအံၤန့ၣ်လီၤ.—ယိၤဟၣ် ၁၁:၃၈-၄၈; ၁၂:၉-၁၁.

ဘၣ်မနုၤအဃိ ယ့ၣ်ၡူးမၤတၢ်လီၤလးတဖၣ်အံၤလဲၣ်. နီၢ်နီၢ် ပှၤလၢကစၢ်မၤစၢၤအီၤတဖၣ်န့ၣ် လၢခံဘၣ်သံကဒီးဝဲလီၤ. ဘၣ်ဆၣ် မ့ၢ်လၢယ့ၣ်ၡူးမၤတၢ်လီၤလးတဖၣ်အံၤအဃိ ဒုးအိၣ်ထီၣ်ဝဲတၢ်အဘျုးအဖှိၣ်လၢ အတလီၤမၢ်နီတဘျီဘၣ်. အဒိ တၢ်လီၤလးတဖၣ်အံၤပာ်ဖျါထီၣ်ဝဲလၢ ဝံအတၢ်စံးပာ်လၢ ဘၣ်ဃးဒီး စီၤပၤမ့းၡံအၤ အတၢ်ပၢန့ၣ် မ့ၢ်တၢ်လၢပနာ်အီၤသ့လီၤ. စီၤပၤလၢကစၢ်ယွၤပာ်ထီၣ်အီၤတဂၤအံၤ မၤဟါမၢ်ကွံာ်ဝဲ တၢ်သၣ်ဝံၤသၣ်စ့ၤ, တၢ်ဆူးတၢ်ဆါ, မူခိၣ်ကလံၤသီၣ်ဂီၤလၢ အလီၤဘၣ်ယိာ်ဘၣ်ဘှီ, တၢ်သံဒီး တၢ်ဝံတၢ်နါတဖၣ်သ့ဝဲသပှၢ်ကတၢၢ်န့ၣ် ပသးဒ့ဒီအလီၢ်တအိၣ်ဘၣ်. ယ့ၣ်ၡူးပာ်ဖျါထီၣ်တ့ၢ်လံလၢ ကစၢ်ယွၤဟ့ၣ်စိဟ့ၣ်ကမီၤအီၤလၢ ကမၤဝဲတၢ်သ့ၣ်တဖၣ်အံၤ ခဲလၢာ်အဂီၢ်န့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ မးသဲ, မၢ်ကူး, လူၤကၣ်, ဒီးယိၤဟၣ်န့ၣ်လီၤ.