XI TQʼOʼN Dios ipumalj te tKʼwaʼl (tkyʼajol) aju bʼajxtaq txi tqʼoʼn te juntl xjal ex tuʼn jlu bʼant nim (bʼampo) milagro tuʼn, nim kyxol qeju milagro lu, e bʼant tuʼn kywitz txqantl xjal. Iktzun tten kubʼ tyekʼun Jesús qa jaku che kubʼ nimaq ajqʼoj kyiʼj xjal tuʼn. Qo xnaqʼtzan kyiʼj junjun.

Aju waʼyij. Aju tnejel milagro bʼant tuʼn Jesús —aju tej tok aʼ tuʼn te vino— tzaj tyekʼun qa jaku tzaj tqʼoʼn nimxix wabʼj ex nimxix kʼabʼj (kʼwabʼj) kye xjal. Toj kabʼetl maj, el nimxix pan tuʼn tiʼj junjun pan ex el nimxix kyiẍ tuʼn tiʼj junjun kyiẍ tuʼn kywaʼn nim xjal. Kyoj kabʼe maj lu atx wabʼj kyaj ten.

Aju yabʼil. «Noq alkyex kyyabʼil» xjal, e bʼanix tuʼn Jesús «kyukʼix qe xjal at kʼixkʼoj kyiʼj» (Mateo 4:23). E qʼanit qe moẍ tuʼn, qe chkin (t-ẍkin), qe kox, qe xjal txʼaʼk kyiʼj ex qeju tok tyabʼ kywiʼ (at ataque kyiʼj). Jakutaq qʼanet alkyexku yabʼil tuʼn.

Aju xitbʼil tuʼnx twitz Txʼotxʼ. Toj jun qonikʼan, tej in bʼettaq Jesús kyukʼex qeju lepchiqeʼktaq tiʼj tibʼaj mar te Galilea, jaw pulin aʼ tuʼn kyqʼiqʼ. E tzajxix xobʼ qeju lepchiqeʼktaq tiʼj Jesús, atzente Jesús oʼkx jax tqʼoʼn twitz twitz kyaʼj ex tqʼama jlu: «Miʼn qʼajta. Numekuya». Lwey naj weʼ aʼ (Marcos 4:37-39). Toj juntl maj, bʼet Jesús tibʼaj aʼ tej in xupentaq kyqʼiqʼ toj mar (Mateo 14:24-33).

Aʼyeju nya bʼaʼn anjel. Mas nim kyipumal nya bʼaʼn anjel, moqa taqʼunal Tajaw il, kywitz xjal. Axpe ikx in che ok ten bʼinchal nya bʼaʼn kyiʼj xjal, ex nimqe xjal mitiʼx jun tiʼ o bʼant kyuʼn tuʼn tel kypan kyibʼ kyiʼj. Atzunte Jesús mitiʼ (tiloʼ) tzaj xobʼ kywitz. Aʼyeqe nya bʼaʼn anjel lu in che tzajtaq luʼlun twitz Jesús ex lweytaq in xi kybʼiʼn aj t-xi tqʼamaʼntaq Jesús kye tuʼn kyetz toj kyanmi xjal.

Aju kyimen. Jteʼxku abʼqʼi iqʼen quʼn, qkyaqilx in kubʼ qiʼj tuʼn kyimen, aju in nok tqʼoʼn Tyol Dios tbʼi te «mankbʼil aj qʼoj» (1 Corintios 15:26). Naqtzen tuʼnj, ax ikx kubʼ tiʼj kyimen tuʼn Jesús, quʼn jaw anqʼin tal jun viud xuʼj tuʼn ex jun tal txin. Naqtzun tuʼnj, aju yekʼbʼil mas nim toklen aju tej tjaw anqʼin Lázaro tuʼn, aju tamiw, kywitz nimku xjal tej otaqxi tzikʼ kyaje qʼij tkyimlen. Axpe ikx qeju ajqʼoj tiʼj ilx tiʼj el kynikʼ qa attaq tipumal Jesús (Juan 11:38-48; 12:9-11).

Naqtzen tuʼnj, tej tbʼet ambʼil, tzajtl kyyabʼ ex e kyimtl qeju xjal onin Jesús kyiʼj. Qa ikju, ¿mitiʼpe kyajbʼen qeju milagro e bʼant tuʼn Jesús? At nimxix kyajbʼen, quʼn in tzaj kyyekʼun qa ax tok qeju tbʼanel yol e kyaj qʼamaʼn toj Tyol Dios tiʼj tKawbʼil Mesías. Aju Kawil o txi tqʼoʼn Dios toklen ok kbʼel tnajsaʼn waʼyij, yabʼil, aju xitbʼil tuʼnx twitz Txʼotxʼ, aʼye nya bʼaʼn anjel, axpe ikx ok kbʼel tnajsaʼn kyimen. A jlu in tzaj tyekʼun qa o txi tqʼoʼn Jehová tipumal Jesús tuʼn tbʼant tkyaqil jlu tuʼn.

(Atz xjatz iqʼet toj uʼj te Mateo, Marcos, Lucas ex Juan.)