JÉ Niná kitsjoale nganʼio je Jesús nga koanle kʼoakisʼin jmeni xi tsín koa̱nle kʼoasʼin jngo chjota. Je Jesús nʼio nkjín kjoaxkón tsakatío, kʼoa sakʼoa nʼio nkjín chjota tsabe nga kʼoakisʼin. Kʼoa kʼoasʼin tsakakó nga koa̱nle kjoaʼaxin jmeni xi tsín kjimale tjíofaʼáxin je chjotasonʼnde. Kataʼyala kʼaa jmeni xi kjoaʼaxin.

Je kjinrá. Kjoaxkón xi títjon kisikʼéjna Jesús kuinga bino kisikʼóya je nandá. Nga tsakʼéjna kjoaxkón jebi kui tsakakó nga koa̱nle tsjoá nandá kʼoa kao tsojmi xi ma chine. Kʼoa jao kʼa nga kʼoati nkjín jmi chjota kisikjen ninga tojngo jao mani je jti̱ kao nioxtila xi tjíole. Kʼoa nga kʼia saʼnda kinjenngile tsojmi.

Je chʼin. Je Cristo “kisinda ngayije chʼin [xi kisʼele chjota], kʼoa ngatsʼi xi aonle” (Mateo 4:23). Kisindaya xi tsín matsenle, xi jtaya, xi tsín ma fi, xi tjíofiʼndojon yaole kʼoa kao xi chʼinxín kisʼele. Tsín chʼin xi tsín koanle kisindaya.

Je kjoaxkón. Ñandia kʼianga chitso tjíoyale Jesús kao chjotale ya jinndáchikon Galilea toʼikoan jngo ntjao̱xkón jaʼaine. Je chjotale nʼio kitsokjon nga kʼoakjima, tonga je Jesús kiskotsenngʼá kʼoa kitsole je ntjao̱xkón: “Jyó tijnai”. Kʼoa nga kʼoakitso kjitʼanangi koanxa̱n je ntjao̱xkón (Marcos 4:37-39). Kʼoa ñandia nga kʼoati tsakʼamjeson je nandá ninga ntjao̱nʼio kifaʼa (Mateo 14:24-33).

Je ánkje tsʼen. Ánkje tsʼen jebi jéní xi na̱i xi ndajin tsole chjota, kʼoa ngisa nʼio tse nganʼio tjínle tikʼoajinni ñá xi chjotaa. Ánkje tsʼen jebi binyáxkónle chjota kʼoa nkjín xi tsín titsjiontʼani. Tonga je Jesús alikui kitsokjonle. Tosa je ánkje tsʼen xokjoan xi kitsokjon nga tsabe je Jesús kʼoa kjoan kitjosjejinle chjota kʼianga tsakʼénele Jesús.

Je kjoabiya. Je kjoabiya kjoanʼio tsaotʼaná ngatsʼiaa xi chjota ʼminá. Je Biblia kontra xi fetʼani tsole je kjoabiya (1 Corintios 15:26). Tonga je Cristo saʼnda kisikinjele je kjoabiya kʼianga kisikjaʼáyale je ʼndíle jngo chjoónkʼan kʼoa kʼianga kisikjaʼáyale jngo tsotiʼndí. Tonga xi ngisa tokʼoamaná kʼiaa nga kisikjaʼáyale ngixko̱n chjotankjín je miyole xi Lázaro tsakʼin, xi je ño nichxin kijnakʼien. Saʼnda je chjota xi nʼio jtike koan, tsabe jme nganʼio xi tjínle Jesús (Juan 11:38-48; 12:9-11).

Xi je ki nichxin, ngatsʼi chjota xi tsakasenkao Jesús kisokochʼin ijngokʼanile kʼoa xijekoan, kʼien ijngokʼani. A toxitsjoani nga kʼoasʼin kisindaya Jesús kʼoa nga kʼoasʼin kisikjaʼáyale. Majain, ali tsa toxitsjoajin. Nga kʼoakisʼin kui tsakakó nga ñaki kʼoatjín je én xi tongini kinokjoa xi tʼatsʼe je Mesías, je Rey xi kiskoejin Niná. Kʼoa alikui jao tjínná kʼianga Rey jebi kjoaʼaxin je kjinrá, je chʼin, je kjoaxkón kʼoa kao je ánkje tsʼen, kʼoa saʼnda kjoaʼaxin kjoabiya, nga je Jeobá je kitsjoale nganʼio nga kʼoasʼin.

(Yaa yʼangini Mateo, Marcos, Lucas kao Juan.)