GÂD ai Luhpia ra karnika yaban sain nani daukaia. Jisas naha sainka nani upla ailal mawanra daukan. Baku natka ra witin marikan upla trabilka nani wapnika mangkaia sip sa. Kaisa sampla kum kum kaikaia.

Jisas upla ra plun bara diaia laya yaban. Jisas sainka pas ba lî ba wain ra lakan. Aima wâl ra brit bara inska wiria wal baman upla kwâra tara kum ra dakakan. Bara plun ailal takaskan.

Siknis nani. Jisas “siknis sât sât upla nani bri kan ba sut sin raki kan” (Matiu 4:23). Jisas ba upla blain, kiama prawan, skahwa, lipar sikniska bri ba bara lasa pruki sikniska bri uplika nani ra sin rakan. Witin ai karnika ba tnata âpu kan.

Pâsa karna nani alki takaskan. Tihmia kum, Jisas bara ai disaipilka nani wal Galili kabuka bâk impaki tauki kan piua ra, pâsa tara kum takan. Disaipil nani ba sirang iwan, sakuna Jisas ba ai lal buki kasbrika purara kaiki win: “¡Sâp bas! ¡Mahka lamni taks!”. (Mark 4:37-39.) Yu wala pâsa karna kum pruki kan taim, Jisas lî purara wapan (Matiu 14:24-33).

Lasa nani ba. Naha spiritka saura nani ba, lasa nani mâki ba, kau karnakira sa yawan ba wal. Witin nani ba upla ailal ra nais munan sa, bara naha uplika nani karnika âpu mapara buaia. Sakuna Jisas lasa nani ra si briras kan. Kau ni, witin nani ba Jisas mawanra kan taim sibrin bla tatatwi kan bara Jisas lasa nani ra aisi kan taim, minitka ra witin bîla wali kan.

Prura ba. Baibil ra naha ba “waihla lâs” nina mâkisa, kan upla kumi sin witin mihta wina sip swakwi takras (1 Korint 15:26). Sakuna Jisas mapara prura ba karnika âpu kan, kan witin piarka mairin kum luhpia pruan kan ba wina kli bukan bara tuktan mairin kum ra sin pruan wina bukan. Sakuna samplika kau tara ba sika Jisas ai pânika Lasarus ra kli bukan. Naha waitnika ba pruan wina yu walhwal bri kan, sakuna Jisas upla ailal mawanra bukan. Jisas wailhka nani sin ai tânka brin witin ba ai karnika tara bri kan (Jan 11:38-48; 12:9-11).

¿Dîa muni Jisas naha sainka nani daukan? Jisas rakan uplika nani kli siknis taki pruan. Sakuna witin naha daukan ba wal tânka marikan ai Kingka lâka piua ra dîa daukbia ba. Gâd mita mangkan Kingka ba plun wahwanka, siknis nani, pâsa karna nani, lasa nani bara prura kat sin âpu daukbia. Jehova Jisas ra karnika yaban sa naha sut daukaia.

(Matiu, Mark, Luk bara Jan wina sakan sa.)