ঈশ্বরনা যীশুদা তোপ তোপ্পা শক্তি খরা পীবিরম্মী। মহাক্না মসিগী শক্তি অসি কনাগুম্বা মীওই অমত্তদা পীরমদে। যীশুনা মীয়াম তিন্বা মরক্তা অঙকপা থবক কয়া তৌরম্মী। মসিগী অঙকপা থবকশিং অদুনা তাক্লম্মী মদুদি যীশুনা মহাক্কী য়েক্নবশিংদগী হেন্না শক্তি লৈ। মঙোন্দা সমস্যা খুদিং থেংননবগী শক্তিদু লৈরম্মী। ইচম-চম্বা মীওইবশিংনা মসিগী থবক অসি মায় পাক্না তৌবা ঙম্লোই। ঐখোয় খুদম খরা য়েংসি।

চাক্লাম্বা। ঈশিংদগী অফবা মখলগী য়ু ওলহনবনা যীশুগী অঙকপা থবকশিংগী মনুংদা খ্বাইদগী অহানবনি। তাংকক অনিরক্তা মহাক্না চাক লাম্লবা মী লিশিং কয়াবু শুপ্নতগী তল খরগা ঙা খরখক্তগনা পীজরম্মী। হায়রিবা থৌদোক অনিমক্তা মী লোইনমক্না লেম পানা চাননবা চিন্জাক লৈরম্মী।

অনা-অয়েক। যীশুনা ‘লায়না খুদিং অমদি অনাবা খুদিং ফহনবিরম্মী।’ (মাত্থি ৪:২৩) মীৎতাংবা, না পঙবা, কুষ্টি পকপা, শারৈহৌবা পুম্নমক মহাক্না শোকপদা ফহল্লম্মী। মহাক্না মখোং তেকপশিং অমদি শোয়নাইরবশিংবু ফহল্লম্মী। যীশুদা মখল খুদিংমক্কী অনাবা ফহন্নবগী শক্তি অদু লৈরম্মী।

খুদোংথিনিংঙাই ওইবা ঈশিং-নুংশিৎকী ফিভম। যীশু অমদি মহাক্কী সেবোকশিংনা গালীলগী সমদ্রগী মথক্তা হি হোন্দুনা চৎলিঙৈদা য়াম্না কন্বা নোংলৈ-নুংশিৎ অমা লাকখি। সেবোকশিংদু য়াম্না কিরম্মী। যীশুনা নোংলৈ-নুংশিৎ অদুদা য়েংলম্মী অদুগা হায়রম্মী “তূমিন্না লৈয়ু, তপথৌ।” খুদক অদুদা পুম্নমক পুংচিক চিক্লম্মী। (মার্ক ৪:৩৭-৩৯) অতোপ্পা মতাং অমদনা নোংলৈ-নুংশিৎ মনুংদা মহাক্না ঈশিং মথক্তা চৎলম্মী।—মাত্থি ১৪:২৪-৩৩.

ভুত প্রেতশিং। ভুত প্রেতশিং অসিনা তাইবং মীওইবদগী হেন্না কল্লী। মখোয়শিংসি য়াম্না ফৎতবা ঈশ্বরগী য়েক্নবশিংনি। মী অয়াম্বনা মাগী মখুৎতগী নানথোকপা ঙমদে। তৌইগুম্বশুং হন্জিন হন্জিন্না যীশুনা ভুত প্রেতশিংদুদা মখোয়না ওৎপীরিবা মীশিং অদুদগী থোক্লক্নবা হায়রম্মী। অদুগুম্বা ভুত প্রেতশিং অদুনা যীশুগী য়াথং অদু ইল্লম্মী। যীশুনা মখোয়বু কিরমদে। মখোয়না যীশু কয়া য়াম্না শক্তি লৈবগে হায়বদু খংলম্মী। মখোয়না যীশুবু কিজরম্মী।

অশিবা। অশিবা হায়বসি তশেংনমক “ইকোন কোনবদা মাঙহনগদবা য়েক্নবা” অদুনি হায়রম্মী। কনাগুম্বা মীওইবা অমত্তনা মসিগী য়েক্নবা অসিবু মায়থীবা পীবা ঙমদে। (১ কোরিন্থীয়া ১৫:২৬) তৌইগুম্বশুং যীশুনা শিখ্রবশিংবু হীঙ্গৎহল্লম্মী। মহাক্না শিরুরবা নহা ওইরিবা নুপা অমবু হিঙ্গৎহনবীদুনা মহাক্কী লুখ্রাবী মমাদুদা শিন্নরম্মী। মহাক্না নুপীমচা অমসু হিঙ্গৎহনবিরবা মতুংদা মহাক্কী মমা মপাদা শিন্নবিরম্মী। তৌইগুম্বশুং যীশুনা য়াম্না তোপ তোপ্পা মখলগী হিঙ্গৎহনবগী থবক অমখক তৌরম্মী। পুক্নিং ৱানা লৈরিবা মীয়াম অমগী মমাংদা যীশুনা মহাক্কী নুংশিরবা মরুপ লাজারসপু হিংগৎহল্লম্মী। লাজারস নুমিৎ মরিনি চুপ্না শিরুরবা মীশক্নি। যীশুগী য়েক্নবশিংনফাওবদা মহাক্না অসিগুম্বা অঙকপা থবক অমা তৌখি হায়বসি মখোয়নসু য়ারম্মী।—যোহান ১১:৩৮-৪৮; ১২:৯-১১.

যীশুনা অসিগুম্বা অঙকপা থবকশিং অসি করিগীদমক তৌরম্লিবনো? যীশুনা হিঙ্গৎহনখিবা মীওই খুদিংমক মতুং তারকপদা অদুম্মক শিখি। মসি চুমদবরা? অচুম্বনি। তৌইগুম্বশুং যীশুনা তৌরম্বা অঙকপা থবকশিং অদু তুংকোইনগী ওইনা অফবা ওইরম্মী। মদুদি মশীহনা নিংথৌ ওইদুনা শাসন তৌরগদৌবগী মতাংদা মাংজৌননা তাকথোক্লম্বা পুম্নমক অচুম্বনি হায়বদু প্রমান তৌখি। মসিদা চীংননিংঙাই অমত্তা লৈতে মদুদি ঈশ্বরনা খনবিখ্রবা নিংথৌ অসিনা চাক্লাম্বা, অনা-অয়েক, খুদোংথিনিংঙাই ওইবা নুংশিৎ-নুংশা, ভুত প্রেত অমদি অশিবা লৌথোকপিগনি। ঈশ্বরনা মঙোন্দা শক্তি পুম্নমক শিন্নরে হায়দুনা মহাক্না হান্ননা উৎথোকখ্রবনি।

​—মাত্থি, মার্ক, লুক অমসুং যোহানদা য়ুম্ফম ওইবা।