TOTEOTSIJ kimakak iKone tetikayotl katli amo aka kipia tlen ika uelki kichijki miak uejueyi tlamantli kampa itstoyaj miakej. Ijkino Jesús kinextik ueliskia kintsontlamiltis ikualankaitakauaj uan tlen kintlaijiyouiltia maseualmej. Ma tikitakaj se keski tlamantli.

Mayantli. Ika achtoui ueyi tlamantli katli kichijki Jesús —kikuepki vino nopa atl— kinextik uelis temakas miak tlakualistli uan tlen kiisej. Nojkia ompa kimiakilik se keski pantsi uan michimej ika kintlamak miakej. Uan mokajki miak tlakualistli.

Kokolistli. Cristo kinchikajki katli tlaijiyouiyayaj pampa “mokokouayayaj ika tlen ueli kokolistli” (Mateo 4:23). Kinchikajki katli amo tlachiayayaj, amo tlakakiyayaj, amo ueliyayaj nejnemij, tlen kipiayayaj lepra uan katli tlapolouayayaj. Nochi ueliyaya kichikaua.

Uejueyi ajakatl tlen tlasojsoloua. Se youali, kema Jesús iuaya itokilijkauaj kiixkotonayayaj ueyi atl Galilea, tlauel tlaajakak uan uetski miak atl. Itokilijkauaj tlauel momajmatijkej, uan Jesús san kitlachilik nopa ajakatl uan kiijtok: “Amo ximolini, san xielto”. Uan ayokmo tlaajakak (Marcos 4:37-39). Seyok tonali kema tlaajakayaya nejnenki aixko (Mateo 14:24-33).

Amo kuali ajakamej. Ni amo kuali ajakamej, kipiaj miak tetikayotl amo kej tojuantij. Kintlaijiyouiltijtokej miakej, uan sekij amo ueltokej momanauiaj. Jesús amo kinimakasiyaya. Uan inijuantij kena kiimakasiyayaj kema itstoya ininnechka uan kema kinnauatiyaya ma kinkauakaj katli kintlaijiyouiltiyayaj nimantsi kineltokayayaj.

Mikilistli. Asi tonali kema nochi timikij, tlen Biblia kitokaxtia ‘tokualankaitakaʼ (1 Corintios 15:26). Yon mikilistli uelki kitsakuilik Cristo ma temakixti, pampa kiyolkuik se siuatl ikone tlen ya miktoya iueue uan se pilichpokatsi. Uan tlauel pankisa kema kiyolkuik iuampo Lázaro, pampa ya panotoya naui tonali ika miktoya uan miakej kiitakej. Yeka katli tlauel kikualankaitayayaj no kiijtojkej Jesús kipiayaya miak tetikayotl (Juan 11:38-48; 12:9-11).

¿Kenke Jesús kichijki nopa uejueyi tlamantli? ¿Tlaj teipa, katli kinpaleuik sampa kipixkej kokolistli uan mijkej? Pampa inoj kinextik nochi tlajtolpanextili tlen Mesías iTlanauatijkayo temachtli moaxitis. Nopa Tlanauatijketl katli toTeotsij kitekitlalik temachtli kichiuas ma ayokmo onka mayantli, kokolistli, uejueyi ajakatl tlen tlasojsoloua, amo kuali ajakamej uan ayokmo aka ma miki. Ya uelis kichiuas nochi, pampa Jehová kimakatok tetikayotl.

(Mokixtijtok ipan pilamochtsi Mateo, Marcos, Lucas uan Juan.)