DIOS kimakak iKonetsin se chikaualis tein kipaleuiskia maj kichiua uejueyi tachiualismej, uan miak kichiuak imin ixtenoj tel miakej. Ika nejin kinextij ke Jesús uelis kinajchiuilis taltikpakneminij nochi tein kintajyouiltia uan amo keman ueli mokixtiliaj. Maj tikitakan seki neskayomej.

Mayan. Ika yekinika taman tein Jesús kichiuak —keman at kikepak tayil⁠— kinextij ke ueli kitemaka miak takual uan tayil. Uan satepan, ojpa kintamakak tel miakej ika sayoj ome eyi pan uan ome eyi amichimej. Uan nochipa mokauak takual.

Kokolismej. Jesús kinpajtij “nochi[n] kokoyanij” (Mateo 4:​23). Kinpajtij tein amo ueliaj tachiayaj, tein amo takakiaj, tein kotoltik katka imin nakayo, tein palantoya imin nakayo uan tein eliuis motsetselouayaj uan yolpoliuiaj. Tein melauj, uelia kipajtiaya nochi taman kokolismej.

Tetsaujmej. Se youak, keman Jesús uan imomachtijkauan kipanauijtoyaj ueyiat Galilea ika se barco, ualaj se chikaujkaejekat. Imomachtijkauan Jesús motelmoujtijkej, uan yejua sayoj moixajokuik uan kiiluij ejekat: “Ximotamatili uan amo ximoolini ok”. Uan niman seujtiaj (Marcos 4:​37-​39). Uan okse tonal, nejnemik aixko maski chikauak taejekatoya (Mateo 14:​24-​33).

Amo kuali espíritus. Amo kuali espíritus okachi chikaujkej ke tejuan. Uan no, kintajyouiltijtinemij tel miakej taltikpakneminij, uan miakej amo uelij moinkixtiliaj. Sayoj ke Jesús amo kinmouiliaya, ta yejuan espíritus kimouiliayaj keman moajsiaj iixpan uan tel niman kitakamatiaj keman kinnauatiaya maj kinkauakan akin kintajyouiltijtoyaj.

Mikilis. Axkan “mikilis [tein] takitskijtinemi nikan taltikpak”, amo akin ueli mokixtilia (1 Corintios 15:​26). Sayoj ke Jesús kemaj, ta oksepa kimakak nemilis se siuapil uan ikonetsin se siuat tein amo nemiaok inamik. Uan tein kichiuak iuan Lázaro okachi moitak ke Jesús ueli oksepa temaka nemilis, ta yejua kiuikayaya naui tonal miket keman oksepa kimakak nemilis imin ixtenoj miakej. Hasta tein okachi kitauelitayaj kijtojkej ke Jesús kemaj kipiaya ichikaualis Dios (Juan 11:​38-​48; 12:​9-​11).

Kemej tikmatij, nochin tein Jesús kinpaleuij, kokolispeujkej uan momikilijkej. Komo ijkon, ¿keyej Jesús kichiuak nejon? Porin kinextij ke tein achtook kijtojka Biblia toni kichiuas Tekiuaj Mesías, melauak mochiuas. Senkis tikneltokaj ke Tekiuaj tein Jiova kiixtalij, kijkuanis mayan, kokolismej, tetsaujmej, amo kuali espíritus uan hasta mikilis. Moyekita ke Jiova kimakatok ichikaualis tein ika uelis kichiuas nochi nejon.

​(Motaksaltia itech amaixmej Mateo, Marcos, Lucas uan Juan.)