GOD éí Jesus adziilii yee nílá, éí bee bílaʼashdlaʼii doo yídaneelʼánígíí ájiilaa. Jesus éí tʼóó ahayóí diné binááł ląʼídi God bibee adziilii bee nijishnish. Éí binahjįʼ díí bééhoozin, Jesus éí anaʼí, dóó daʼníłtłʼaii ádaatʼéhígíí yikʼeh didlı̨́. Díí éí bílaʼashdlaʼii doo bikʼeh dazhdidoodleeł da. Anaʼí dóó daʼníłtłʼaii ádaatʼéhígíí łaʼ baa daʼíídíilta.

Doodlı̨́įłii dóó chʼiyąʼ bídį hóyééʼ. Naakidi Jesus éí ląʼí mííl diné dichin danilı̨́įgo bááh dóó łóóʼ áłchʼı̨́dí ndi, yee yaʼníłtsood. Éí chʼiyáán bilááh danéésʼąąd. Tsʼídá áłtsé God bibee adziilii Jesus yee áʼiilaaígíí éí, tó bee wáin ayóó áhóolniihígíí áyiilaa.

Ąą dahazʼą́. Jesus éí “diné bitahgóó naałniih bąąh dahólóonii tʼáá ałtso áádóó ka nidaakaígíí tʼáá ałtso hadaałtʼé” ándajiidlaa. (Matthew 4:23) Doo daʼooʼíinii, jééhkał, naaljı̨́ı̨́d, dóó łóód atsʼíís yiyáanii, díí tʼáá ałtso Jesus joobaʼgo náʼííłdzííʼ. Ąą dahazʼą́ tsʼídá tʼáá ałtso bikʼeh jideesdlı̨́ı̨́ʼ.

Báhádzidgo níłchʼi ałʼąą ánááʼníłígíí. Jesus dóó bídahoołʼaahii Gálilii beʼakʼidgi tséʼnaah bił daʼéʼeełgo, ńtʼééʼ tʼáá hooshchʼįʼ tó náádiidáahgo ayóó átʼéego deeyol. Ídahoołʼaahii éí nídaasdzííd. Jesus éí díí ayóó átʼéego deeyolígíí ábijiní, “Kʼadí! Hashtʼedítʼeeh!” Áádóó tʼáá hooshchʼįʼ hodiiyeel. (Mark 4:37-39) Áádóó nááná łahda táłkáaʼgi tʼóó báhádzidgo níyolgo Jesus táłkááʼ tázhdííyá.​—Matthew 14:24-33.

Níłchʼi danilı̨́įgo doo yáʼádaashóonii. Éí bílaʼashdlaʼii yiláahgo ayóó ádabóodziil. Áko díí God beʼanaʼí doo daatsʼídígíí, ląʼí diné doo yichʼįʼ dabidziil da. Ndi Jesus éí díí níłchʼi danilíinii ląʼídi, diné biiʼdę́ę́ʼ hááhizhneeshchą́ą́ʼ. Jesus éí doo yináldzid da ńtʼééʼ. Ákondi, Jesus éí bóhólníihgo hoł béédahózinígíí biniinaa béédajildzid.

Anoonééł. Bílaʼashdlaʼii éí anoonééł, “anaʼí akéeʼdi” bidiʼnínígíí doo yikʼeh didoodleeł da. (1 Corinthians 15:26) Ákondi Jesus éí daneeznánę́ęígíí nínéiidiyiiłjééʼ. Éí asdzą́ą́ léiʼ biyáázh tʼah ániid naagháago bitsʼą́ą́ʼ ádin, áko éí bá náábizhdiisá. Áádóó ałdóʼ amá dóó azhéʼé léiʼ atíndindleehgo, beʼawééʼ atʼééd yázhígo bá náábizhdiisá. Łahda ałdóʼ kóhóótʼįįd, tʼóó ahayóí diné daachago, Jesus bikʼis Lázaras hanááł nínéidiisá. Azhą́ shı̨́ı̨́ dı̨́ı̨́ʼ yiskánídą́ą́ʼ dajiztsą́ą ndi, Jesus éí nááhodiisá! Jesus bikʼijįʼ danilínę́ę ádaaní, éí tʼáá aaníí God bibee adziilii bee Lázaras nínéidiisá.​—John 11:38-48; 12:9-11.

Jesus éí haʼátʼíí biniyé díí tʼáá átʼé God bibee adziilii bee nijishnish? Díí diné yíká eelwod yę́ę ałtso ádajídin. Ákondi Jesus éí díí God bibee adziilii bee nijishnishígíí náasdi yee nihíká anáádoolwoł. Mesáíyah hojooʼáałgo ázhdooníłígíí baa hóóneʼ yę́ę, éí doo tʼóó haneʼ átʼéii da. Háálá God díí Naatʼáanii niiníłtínígíí, doodlı̨́įłii dóó chʼiyáán bídį hóyéeʼgi, ąą dahazʼą́, báhádzidgo níłchʼi ałʼąą ánááʼníłígíí, níłchʼi danilı̨́įgo doo yáʼádaashóonii, dóó anoonééł éí íidoołdįįłgo átʼé. Áko Jesus éí God adziilii hąąh niiníláhígíí tʼáá íídą́ą́ʼ ííshjání áyiilaa.

​—Naaltsoos Matthew, Mark, Luke, dóó John biiʼ baa haneʼ.