ଈଶ୍ୱର ଯୀଶୁଙ୍କୁ ଏପରି କିଛି କରିବାକୁ ଶକ୍ତି ଦେଇଥିଲେ ଯାହା ସାଧାରଣତଃ କୌଣସି ବ୍ୟକ୍ତି କରି ପାରିବ ନାହିଁ । ଯୀଶୁ ନାନା ପ୍ରକାର ବଡ଼ ବଡ଼ ଆଶ୍ଚର୍ଯ୍ୟକାମ ଅନେକ ଲୋକମାନଙ୍କ ଆଗରେ କରିଥିଲେ । ଏହି ଆଶ୍ଚର୍ଯ୍ୟକର୍ମଗୁଡ଼ିକ ଦେଖାଏ ଯେ ଯୀଶୁଙ୍କଠାରେ ଶତ୍ରୁଙ୍କୁ ଏବଂ ଯେକୌଣସି ବାଧାବିଘ୍ନକୁ ପ୍ରତିରୋଧ କରିବାର ଶକ୍ତି ରହିଛି, ଯାହା ଅସିଦ୍ଧ ମନୁଷ୍ୟ ଆଜି ପର୍ଯ୍ୟନ୍ତ ସଫଳତାର ସହ କରିପାରି ନାହିଁ । ଆସନ୍ତୁ କେତେକ ଉଦାହରଣଗୁଡ଼ିକୁ ଦେଖିବା ।

ଯୀଶୁ ଖାଦ୍ୟ ଓ ପାନୀୟ ଯୋଗାଇଥିଲେ । ଯୀଶୁଙ୍କ ପ୍ରଥମ ଆଶ୍ଚର୍ଯ୍ୟକର୍ମ ଥିଲା ଜଳକୁ ଦ୍ରାକ୍ଷାରସରେ ପରିଣତ କରିବା । ଅନ୍ୟ ଦୁଇଟି ପରିସ୍ଥିତିରେ ସେ ଅଳ୍ପକେତୋଟି ରୁଟି ଓ ମାଛକୁ ନେଇ ହଜାର ହଜାର ଭୋକିଲା ଲୋକଙ୍କୁ ଖୁଆଇ ଥିଲେ । ଏହି ଉଭୟ ପରିସ୍ଥିତିରେ ପ୍ରତ୍ୟେକଙ୍କ ପାଇଁ ଯଥେଷ୍ଟ ଖାଦ୍ୟ ଥିଲା ।

ଯୀଶୁ ରୋଗୀମାନଙ୍କୁ ସୁସ୍ଥ କରିଥିଲେ । ଯୀଶୁ ଲୋକଙ୍କ “ସମସ୍ତ ପ୍ରକାର ରୋଗ ଓ ସମସ୍ତ ପ୍ରକାରର” ପୀଡ଼ାକୁ ସୁସ୍ଥ କଲେ । (ମାଥିଉ ୪:୨୩) ଅନ୍ଧ, ବଧିର, କୁଷ୍ଠ ଏବଂ ମୃଗୀ ରୋଗୀ ତାହାଙ୍କ ସ୍ପର୍ଶରେ ସୁସ୍ଥ ହେଲେ । ସେ ଛୋଟା, ଲେଙ୍ଗେଡ଼ା ଓ ବିକଳାଙ୍ଗମାନଙ୍କୁ ମଧ୍ୟ ସୁସ୍ଥ କରିଥିଲେ । ଏପରି କୌଣସି ରୋଗ ନାହିଁ ଯାହା ଯୀଶୁ ସୁସ୍ଥ କରି ନ ପାରନ୍ତି ।

ଯୀଶୁ ଝଡ଼ବାତ୍ୟାକୁ ବନ୍ଦ କଲେ । ଯେତେବେଳେ ଯୀଶୁ ଓ ତାହାଙ୍କ ଶିଷ୍ୟମାନେ ଗାଲିଲୀ ସାଗରକୁ ନୌକାରେ ପାର ହେଉଥିଲେ ସେତେବେଳେ ହଠାତ୍‌ ଝଡ଼ବାତ୍ୟା ହେଲା । ଶିଷ୍ୟମାନେ ଅତ୍ୟନ୍ତ ଭୟଭୀତ ହେଲେ । ଯୀଶୁ ଝଡ଼କୁ ଦେଖି କହିଲେ: “ତୁନି ହ, ଚୁପ୍‌ କର୍‌ !” ଏହାପରେ ସବୁ ଶାନ୍ତ ହୋଇ ଥମିଗଲା । (ମାର୍କ ୪:୩୭-୩୯) ଆଉ ଥରେ, ସେ ପ୍ରଚଣ୍ଡ ଝଡ଼ ସମୟରେ ପାଣି ଉପରେ ଚାଲିଥିଲେ ।—ମାଥିଉ ୧୪:୨୪-୩୩.

ଯୀଶୁ ଦୁଷ୍ଟଆତ୍ମାଗୁଡ଼ିକୁ ଦମନ କଲେ । ଦୁଷ୍ଟଆତ୍ମାଗୁଡ଼ିକ ମନୁଷ୍ୟମାନଙ୍କଠାରୁ ବହୁତ ଶକ୍ତିଶାଳୀ । ଈଶ୍ୱରଙ୍କର ଏହି ଶତ୍ରୁମାନଙ୍କ କବଳରୁ ମୁକ୍ତ ହେବାକୁ ଅନେକେ ଅସଫଳ ହୋଇଥିଲେ । କିନ୍ତୁ ବାରମ୍ବାର, ଯୀଶୁ ଯେତେଥର ଦୁଷ୍ଟଆତ୍ମାମାନଙ୍କୁ ଆଜ୍ଞା ଦେଇଥିଲେ ସେତେଥର ସେମାନେ ଲୋକମାନଙ୍କୁ ଛାଡ଼ି ଚାଲିଯାଇଥିଲେ । ସେ କେବେହେଲେ ସେହି ଦୁଷ୍ଟଆତ୍ମାଗୁଡ଼ିକୁ ଭୟକରୁ ନ ଥିଲେ । ଅନ୍ୟ ପକ୍ଷେ, ସେମାନେ ଯୀଶୁଙ୍କ ଅଧିକାରକୁ ଜାଣି ତାହାଙ୍କୁ ଭୟ କରୁଥିଲେ ।

ଯୀଶୁ ମୃତ୍ୟୁକୁ ପରାଜିତ କରିଥିଲେ । ଯଥାର୍ଥଭାବେ ମୃତ୍ୟୁକୁ “ଶେଷ ଶତୃ” କୁହାଯାଏ କାରଣ ଏହା ଏକ ଏମିତି ଶତୃ ଯାହାକୁ କୌଣସି ମନୁଷ୍ୟ କେବେ ପରାଜିତ କରି ପାରେନାହିଁ । (୧ କରିନ୍ଥୀୟ ୧୫:୨୬) ତଥାପି, ଯୀଶୁ ମୃତ ଲୋକଙ୍କୁ ପୁନରୁତ୍ଥାନ କରିଥିଲେ, ଜଣେ ବାଳକକୁ ତାʼର ବିଧବା ମାʼ ଓ ଜଣେ ବାଳିକାକୁ ତାʼର ଶୋକାକୁଳ ପିତାମାତାଙ୍କୁ ଫେରାଇ ଦେଇଥିଲେ । ଅନ୍ୟ ଏକ ବିଶେଷ ପରିସ୍ଥିତିରେ ଯୀଶୁ ଏକ ବିରାଟ ଶୋକାକୁଳ ଜନଗହଳିରେ ନିଜ ପ୍ରିୟ ବନ୍ଧୁ ଲାଜାର ଯାହାର ମରିବାର ପ୍ରାୟ ଚାରିଦିନ ବିତିଯାଇଥିଲା ତାହାଙ୍କୁ ପୁନରୁତ୍ଥାନ କରିଥିଲେ ! ଏପରିକି ଯୀଶୁଙ୍କ ଶତ୍ରୁମାନେ ମଧ୍ୟ ସ୍ୱୀକାର କରିଥିଲେ ଯେ ସେ ଏହି ଅଲୌକିକ କାମ କରିଥିଲେ ।—ଯୋହନ ୧୧:୩୮-୪୮; ୧୨:୯-୧୧.

ଯୀଶୁ କାହିଁକି ଏସବୁ ଅଲୌକିକ କାମ କରିଥିଲେ ? ଏହା କି ସତ୍ୟ ନୁହେଁ ଯେ ସେ ଯାହାକୁ ସାହାଯ୍ୟ କରିଥିଲେ ସେମାନେ ପୁଣି ଥରେ ମରିଥିଲେ । ହଁ ଏହା ସତ୍ୟ ଯେ ଯୀଶୁଙ୍କ ଆଶ୍ଚର୍ଯ୍ୟକାମ କିଛି ସ୍ଥାୟୀ ଉପକାର ଆଣିଥିଲା । ଏହା ପ୍ରମାଣ କରେ ଯେ ମସୀହ ରାଜାଙ୍କ ଶାସନ ନିମନ୍ତେ ଯେଉଁସବୁ ଭବିଷ୍ୟତବାଣୀ କରାଯାଇଥିଲା ସେସବୁର ଏହା ଏକ ମୂଳଦୁଆ ଥିଲା । ଏହା ନିଃସନ୍ଦେହ ଯେ ଈଶ୍ୱରଙ୍କ ଅଭିଷିକ୍ତ ରାଜା ଖାଦ୍ୟାଭାବ, ରୋଗ, ଅଶାନ୍ତ ଜଳବାୟୁ, ଦୁଷ୍ଟଆତ୍ମା ଏପରି ମୃତ୍ୟୁକୁ ମଧ୍ୟ ଦୂର କରିବେ । ସେ ଏହି ସମୟ ମଧ୍ୟରେ ଦେଖାଇ ଥିଲେ ଯେ ଈଶ୍ୱର ତାହାଙ୍କୁ ଏସମସ୍ତ ଶକ୍ତି ଦେଇଥିଲେ ।

—ଏହା ମାଥିଉ, ମାର୍କ, ଲୂକ ଏବଂ ଯୋହନ ପୁସ୍ତକ ଉପରେ ଆଧାରିତ ।