GOTT jeef Jesus butajeweenelje Macht, wuaderch hee väle Wunda doonen kunn. Foaken sagen daut groote Häaden Menschen. Derch siene Wunda bewees Jesus, daut hee de Macht haud, välet äwatsied to schaufen, wuajäajen onvolkomne Menschen nuscht doonen kjennen. Waut biejlikj? See wie mol.

Hunga. Jesus sien ieeschtet Wunda wia, Wota to gooden Wien moaken. Un opp twee Sauz jeef hee dusende Menschen to äten, met bloos een poa Stekja Broot un een poa Fesch. Bie beid Mol jeef daut äwajenuach to äten.

Krankheiten. Väle Menschen kjeemen no Jesus un hee “heeld jieda Krankheit” un Lieden, waut dee hauden (Matäus 4:23). Hee heeld Blinje, Stomme, Lome, Kjräpelje uk soone, waut Lepra ooda Aunstoot hauden. Daut jeef kjeene Krankheit, waut Jesus nich heelen kunn.

Schlemme Owwadasch. Eemol, aus Jesus un siene Apostel metem Boot äwa daut Galiläische Mäa fuaren, kjeem doa een groota Storm opp. De Jinja wort sea angst. Oba Jesus befool dän Wint, dee sull sikj berujen. Un doamet leet de Wint no un daut wort gaunz stell (Markus 4:37-39). Een aundret Mol jinkj Jesus medden en eenen jewaultjen Storm oppem Wota (Matäus 14:24-33).

Beese Jeista. De beese Jeista sent Gott siene Fiend un sent de Menschen wiet äwaläajen. Väle, waut von beese Jeista besäten sent, kjennen sikj nich selfst von dee friemoaken. Oba Jesus haud kjeene Angst fa dee. Emma wan hee de Jeista befool, de Menschen to veloten, musten dee jehorchen. De beese Jeista ferchten sikj fa Jesus, wiels dee wisten, waut fa eene Macht dee haud.

Doot. De Doot woat met Rajcht aus de “latsta Fient” betieekjent, wiels kjeena doajäajen aunkomen kaun (1. Korinta 15:26). Oba Jesus kunn daut. Hee wuak eene Wätfru äaren Sän vom Doot opp un brocht uk eene kjliene Mejal wada toom läwen. Gaunz besonda wia uk, aus Jesus sienen leewen Frint Lazarus ver väle truarende Menschen oppwuak. Lazarus wia aul vea Doag doot jewast! Soogoa Jesus siene jratste Fiend musten toostonen, daut hee dit Wunda jedonen haud (Johanes 11:38-48; 12:9-11).

Wuarom deed Jesus aul dise Wunda? Sent nich aul de Menschen, waut Jesus halpen deed, schlieslich doch jestorwen? Daut es soo. Oba derch siene Wunda wort bewäsen, daut aules, waut de Profeeten äwa dän Messias siene Harschoft verutjesajcht hauden, werkjlich soo komen wudd. Daut jeft kjeenen Twiewel, daut dis Kjennich, dän Gott bestemt haft, met Hunga, Krankheiten un schlemme Owwadasch een Enj moaken kaun. Uk de beese Jeista un soogoa dän Doot kaun hee äwatsied schaufen. Jesus haft kloa bewäsen, daut Gott am doatoo de Macht jejäft haft.

Stett sikj opp de Bibelbieekja Matäus, Markus, Lukas un Johanes.