18 T’AQA
Cristoq ruwasqan milagrokuna
Jesusqa milagrokunata ruwaspan rikuchirqan Rey kaspa imaymana ruwananta
DIOSMI Churinman atiyta qorqan, chaymi payqa imaymana milagrokunata ruwarqan, wakintaqa askha runakunaq rikusqan. Chhaynapin Jesusqa rikuchirqan lliw ñak’ariykunata chinkachiy atisqanta, wakinmanta yachasun.
Yarqayta. Ñawpaq milagrota ruwasqanpin Jesusqa unuta vinoman tukuchirqan, chhaynapin rikuchirqan tukuy ima mikhuytapas askhanpi qoy atisqanta. Iskay kutipin pisi t’antakunallata challwakunatawan askhaman tukuchispa waranqanpi runakunaman qorqan. Chay kutikunapiqa askhan mikhuna puchurqan.
Onqoyta. Cristoqa ‘llapa onqoymanta, llapa nanaymantawanmi runakunata qhaliyachirqan’ (Mateo 4:23). Payqa ñawsakunata, roqt’ukunata, wist’ukunata, lepra, epilepsia onqoyniyoqkunata iman qhaliyachirqan. Paypaqqa manan sasachu karqan ima onqoyta hampiypas.
Hatun wayrata sayachin. Huk kutinmi Jesús qatikuqninkunawan Galilea lamar qochanta botepi rishaqtinku sinchita wayramurqan. Qatikuqninkunaqa mancharikurqankun, Jesusmi ichaqa altota qhawarispa nirqan: “¡Samp’ayay! ¡Upallay!” nispa. Chaymi wayra pasaqtin thak kapurqan (Marcos 4:37-39). Huk kutinpas unu patantan purirqan sinchita wayramushaqtin (Mateo 14:24-33).
Supaykunamanta aswan atiyniyoq. Supaykunaqa runakunamanta aswan kallpayoqmi kanku. Askha runakunatan ñak’arichirqanku, manataqmi chay runakuna ima ruwaytapas atirqankuchu supaykunamanta librakunankupaq. Jesusmi ichaqa mana paykunata manchakurqanchu. Aswanpas supaykunan payta rikuspa manchakuymanta khatatatarqanku, usqhayllataqmi kasukurqanku ñak’arichisqanku runamanta lloqsinankupaq kamachiqtin.
Wañuyta chinkachinqa. Wañuyqa llapallanchismanmi chayamuwanchis (1 Corintios 15:26). Jesuspaqqa manan sasachu karqan wañusqakunata kawsarichiypas, chaymi huk viudaq wawanta huk sipaschatawan kawsarichirqan. Amigon Lazarota kawsarichisqanmi aswan admirakunapaq karqan, paytaqa tawa p’unchay wañusqanmantañan kawsarichirqan askha runakuna rikushaqtin. Chaymi enemigonkunapas mana ima ruwaytapas atirqankuchu ancha atiyniyoq kasqanta rikuspa (Juan 11:38-48; 12:9-11).
Jesuspa qhaliyachisqan runakunaqa tiempowanmi onqorqanku wañupurqanku ima. Chhaynaqa, ¿imapaqtaq chay milagrokunari karqan? Chay milagrokunan rikuchirqan Diospa Gobiernonmanta profeciakuna cheqaqtapuni hunt’akunanta. Arí, Diospa churasqan Reymi chinkachinqa: yarqayta, onqoyta, lloqllakunata, hatun wayrakunata, supaykunata, wañuytapas. Jehová Dios kikinpunin atiyta qon chaykunata ruwananpaq.
