GADO gi Yesus a krakti fu du sani di tra libisma no man du. Yesus ben du bun furu wondru, èn nofo tron a ben du dati na fesi furu sma. Den wondru dati e sori taki Yesus abi a makti fu wini feanti èn fu puru tra sani na pasi di sondu libisma noiti no ben o man puru. Luku wan tu eksempre.

Yesus ben gi sma nyanyan nanga dringi. Na a fosi wondru fu Yesus, a meki watra kon tron bun win. Na tu tra okasi a gi dusundusun sma nyanyan, èn a du dati nanga wan tu brede èn nanga wan tu fisi nomo. Na den tu okasi dati, ala sma ben kisi nyanyan èn nyanyan ben tan abra srefi.

Yesus ben dresi siki. Yesus ben dresi sma di ben abi ’ibri sortu siki nanga ibri sortu mankeri’ (Mateyus 4:23). A ben dresi sma di ben breni, sma di ben dofu, sma di ben abi gwasi, sma di abi fadonsiki, sma di ben lan, nanga sma di ben malengri. Nowan siki ben de di Yesus no ben man dresi.

Yesus ben basi bigi winti. Di Yesus nanga den disipel fu en ben e abra a Se fu Galilea, dan wan bigi winti bigin wai wantronso. Den disipel ben e frede srefisrefi. Yesus luku nomo fa a winti ben e wai, dan a taki: „Tapu! Tan tiri!” Ne a bigi winti saka (Markus 4:37-39). Na wan tra okasi, Yesus ben waka na tapu a watra di wan tranga winti ben e wai.—Mateyus 14:24-33.

Yesus ben abi makti tapu den ogri yeye. Ogri yeye tranga omeni tron moro libisma. Furu sma no ben man komoto na ondro a makti fu den ogri feanti dati fu Gado. Ma toku, ibri leisi te Yesus ben yagi den ogri yeye puru na tapu sma, den ben gowe. Yesus no ben frede den ogri yeye dati. Ma na a tra sei, den ogri yeye ben sabi taki Yesus ben abi makti èn den ben frede en.

Yesus ben gi dedesma wan opobaka. A fiti taki Bijbel e kari dede a „lasti feanti”, fu di nowan libisma man wini en (1 Korentesma 15:26). Ma toku, Yesus ben opo den dedewan baka. A ben gi wan yonkuman wan opobaka èn a gi en baka na en mama di no ben abi masra moro. A ben gi wan meisje wan opobaka tu èn a gi en baka na en papa nanga mama di ben e sari. Wan tumusi moi eksempre, na di Yesus opo en lobi mati Lasarus baka, na fesi fu wan grupu sma di ben e sari. A ben du dati aladi a man disi ben dede pikinmoro fo dei kaba! Srefi den moro bigi feanti fu Yesus, ben taki dati a ben du a wondru disi.—Yohanes 11:38-48; 12:9-11.

Fu san ede Yesus ben du ala den wondru dati? A no de so taki ala den sma di a ben yepi, dede te fu kaba? Iya, ma den wondru di Yesus ben du, tyari bun sani kon. Den wondru dati sori taki ala den moi profeititori di abi fu du nanga a tiri fu a Mesias Kownu, o kon tru seiker. A no abi misi taki a Kownu di Gado poti man puru angri nanga siki, a man basi bigi winti, ogri yeye, èn a man puru dede srefi. Yesus sori kaba taki Gado gi en a makti fu du den sani dati.

—Den tori disi teki puru fu den buku Mateyus, Markus, Lukas, nanga Yohanes.